Esekielu 8:1-18
8 KO e tau ono, ko e ono mahina, ko e aho lima he mahina ne nofo ai au ke he fale haku, ne nonofo ai foki e tau patu Iuta ki mua haku, ti hoko mai ai e lima he Iki ko Iehova ki luga ia au.
2 Ti kitekite au, kitiala, ko e fakatai kua tino mai tuga e afi; ne tino mai mai he tokupu hana ke hoko ki lalo tuga e afi; ne tino mai foki mai hana tokupu ke hoko hake ki luga tuga ne kikila he lagi, ne tuga e tino mai he apa kikila.
3 Ne fakaolo mai e ia e fakatino he lima mo e toto e ia au ke he fili lauulu he haku a ulu; ti ta hake he Agaga au ki luga ke he vaha he lagi mo e lalolagi, mo e uta e ia au ke he fakakiteaga mai he Atua ki Ierusalema, ke he mena ne hu atu ai ke he gutuhala i loto ne hagao atu ke he fahi tokelau, ke he mena ne toka ai e tupua he ita tafuā, ne fakatupu ai e ita tafuā.
4 Ti kitiala, ha ha i ai ke he mena ia e lilifu he Atua a Isaraela, ne tino mai ai tuga he kitia e au ke he kelekele tatai.
5 Ti pehe mai a ia kia au, Ko e tama he tagata na e, kia haga hake a a koe ke he puhala ke he fahi tokelau. Ti haga hake au ke he puhala ke he fahi tokelau, ti kitiala, ha ha he fahi tokelau he gutuhala he fatapoa, ko e tupua he ita tafuā hanā ke he mena ne fina atu ai.
6 Ti pehe mai a ia kia au, Ko e tama he tagata na e, kua kitia nakai e koe e tau mena kua eke e lautolu; ko e tau mena vihiatia ko e tau mena lalahi, kua eke he magafaoa a Isaraela i hinai, kia fakamamao ai au mo e haku a faituga? ka kia tafilu a koe ti kitia ai e koe e tau mena ne mua he vihiatia.
7 Ti ta mai e ia au ke he gutuhala he lotopa, ti kitekite ai au, kitiala, ko e pu ke he kaupa.
8 Ti pehe mai a ia kia au, Ko e tama he tagata na e, kia keli a a koe ke he kaupa, ti keli ai au ke he kaupa, ti kitiala, ko e gutuhala.
9 Ti pehe mai a ia kia au, Kia hu atu a mo e kitekite ke he tau mena kelea, ko e tau mena vihiatia kua eke e lautolu ke he mena na.
10 Ti hu atu au, ti kitia ai e au; kitiala, ko e tau fakatino he tau mena totolo, mo e tau manu huifa oti ne vihiatia, mo e tau tupua oti he magafaoa a Isaraela, kua ta ai ke he kaupa ne agaagai ai.
11 Ne tutu ai foki e tau tagata tokofitugofulu he tau patu he magafaoa a Isaraela, ti tu ai foki mo lautolu a Iaasenaia ko e tama a Safana, ko e tagata mo e hana kapiniu ke huhunu ai e tau mena manogi ha ha he lima hana, ti hake ai e ahua lahi he tau mena manogi.
12 Ti pehe mai a ia kia au, Ko e tama he tagata na e, kua kitia nakai e koe e tau mena ne eke he tau patu he magafaoa a Isaraela ke he pouli, takitaha e tagata ke he hana poko ne toka ai e tau fakatino? ha kua pehe a lautolu, Nakai ni fioia e Iehova a tautolu; kua tiaki e Iehova e lalolagi.
13 Kua pehe mai foki a ia kia au, Kia tafilu a koe ti kitia ai e koe e tau mena ne mua he vihiatia ne eke e lautolu.
14 Ti uta e ia au ke he mena ne hu atu ai ke he gutuhala he fale a Iehova ne fehagai mo e fahi tokelau; Kitiala, kua nonofo ai e tau fifine kua tagi ha ko Tamusa.
15 Ti pehe mai a ia kia au, Ko e tama he tagata na e, kua kitia nakai e koe e tau mena nā? kia liu age foki a koe, ti kitia ai e koe e tau mena ne mua he vihiatia ke he tau mena nā.
16 Ti uta e ia au ke he lotopa i loto he fale a Iehova, kitiala, ke he gutuhala he faituga a Iehova, ke he vaha he fakamaluaga mo e fatapoa, ko e tau tagata tokai ko e tokouafulu ma lima, ne haga atu e tau tua ha lautolu ke he faituga a Iehova, ka e hagao atu e tau mata ha lautolu ke he fahi uta, ti fakaveveli fakafohifo ai a lautolu ke he la ke he fahi uta.
17 Ti pehe mai a ia kia au, Ko e tama he tagata na e, kua kitia nakai e koe e tau mena nā? ko e mena māmā kia ke he magafaoa a Iuta he eke e lautolu e tau mena vihiatia kua eke ai e lautolu ke he mena na? ha kua fakapuke e lautolu e motu ke he favale, kua liliu foki fakahogohogomanava mai a lautolu kia au; ti kitiala, kua tuku e lautolu e la akau ke he tau ihu ha lautolu.
18 Ko e mena ia to taui atu e au mo e ita lahi, nakai toka e au a lautolu ti nakai fakaalofa au; pete he tagi mai a lautolu mo e leo lahi kia au, nakai ni fanogonogo atu e au kia lautolu.