Esera 3:1-13
3 KUA hoko ke he fitu mahina, ha ha i ai foki e fanau a Isaraela ke he tau maga ha lautolu, ti fakapotopoto ai e motu tuga ne tagata tokotaha, i Ierusalema.
2 Ti tutu mai ai a Iesua ko e tama a Iosataka, mo e hana tau matakainaga ko e tau ekepoa, mo Serupapelu ko e tama a Salatielu, mo e hana tau matakainaga, ti ati hake ai e lautolu e fatapoa he Atua a Isaraela, kia eke ai ki luga hana e tau poa, tuga ne tohi ai ke he fakatufono a Mose ko e tagata he Atua.
3 Ne fakatu foki e lautolu e fatapoa ke he hana tuaga; ha kua matakutaku a lautolu ke he tau tagata he tau motu ia; ti eke ai e lautolu ki luga hana e tau poa huhunu kia Iehova; ko e tau poa huhunu ke he magaaho pogipogi mo e magaaho afiafi.
4 Ne eke foki e lautolu e galue he tau fale api, tuga e mena ne tohi, mo e tau poa huhunu ke he taha aho mo e taha aho ke lata mo e totouaga, ke lata mo e kotofaaga, ko e aho mo e tau mena ke eke ai.
5 Kua mole atu foki e tau mena ia ko e tau poa huhunu mau, mo e tau poa he tau mahina pula fou, katoa mo e tau galue oti kua fakatapu, katoa mo e tau poa he tau tagata oti ne eke e tau poa ne makai ki ai e tau loto ha lautolu ke eke kia Iehova.
6 Ko e aho fakamua he fitu mahina ne kamata ai e lautolu he eke e tau poa huhunu kia Iehova, ka ko e faituga a Iehova kua nakaila fakave.
7 Ne age foki e lautolu e tau ario ke he tau tagata talai maka mo e tau tufuga; mo e tau mena kai, mo e tau mena ke inu, mo e puke lolo, ke he tau tagata Saitonu, mo e tau tagata Turo, ke fetuku e tau akau ko e tau arasi i Lepanona ki tahi ke uta ki Iopa, tuga he pule mai e patuiki a Peresia ko Kuresa kia lautolu.
8 Ko e tau ua tali he o mai a lautolu ke he fale he Atua i Ierusalema, ko e ua mahina ne kamata ai e Serupapelu ko e tama a Salatielu, mo Iesua ko e tama a Iosataka, mo e ha lautolu a tau matakainaga ne toe ko e tau ekepoa mo e tau tagata Levi, mo lautolu oti ne o mai he paeaaga ki Ierusalema, mo e kotofa ai e lautolu e tau tagata Levi, ke pule ke he gahua he fale a Iehova, ke kamata ia lautolu ne uafulu ha lautolu a tau tau mo lautolu ne fakamua atu.
9 Ti tutu fakalataha ai a Iesua ko e hana tau tama tane, mo e hana tau matakainaga, ko Katamielu mo e hana tau tama tane, ko e fanau a Iuta ne pule ke he ekeaga he gahua he fale he Atua; ko e tau tama tane a Henatati, ko e ha lautolu a tau tama tane mo e ha lautolu a tau matakainaga ko e tau tagata Levi.
10 Ne fakavē he tau tufuga ati fale e faituga a Iehova, ti kotofa ai e tau ekepoa ne tapulu ai a lautolu, ha i ai foki e tau pu ne ulo, mo e tau tagata Levi ko e fanau a Asafo ha i ai e tau kumepalo, kua fakaheke atu a lautolu kia Iehova ke lata mo e pule a Tavita ko e patuiki a Isaraela.
11 Ne lologo fetaliaki a lautolu, he fakaheke mo e fakaaue atu ai kia Iehova, ha kua mitaki a ia, kua tukulagi hana fakaalofa kia Isaraela. Ti kalaga ai e motu oti mo e kalaga lahi he fakaheke atu ai e lautolu kia Iehova, ha kua fakave ai e fale a Iehova.
12 Ne tokologa e tau ekepoa, mo e tau tagata Levi, mo e tau iki ne mua, ko e tau patu ne kitia e fale fakamua, ne tagi a lautolu mo e leo lahi he fakave ai e fale nai ki mua ha lautolu; ko e tokologa foki ne kalaga he fiafia kua leo lalahi a lautolu.
13 Ti nakai mailoga he tau tagata e leo he kalaga fiafia mo e leo he tagi he tau tagata; he kalaga ai e motu mo e kalaga lahi, ne logona atu ai ke he mena mamao.