Esera 5:1-17
5 KO e perofeta ko Hakai, mo Sakaria ko e tama a Ito, ko e na perofeta ia ne perofeta age a laua ke he higoa he Atua a Isaraela ke he tau tagata Iuta, ko lautolu ni ha ha i Iuta mo Ierusalema.
2 Ti tutu ai a Serupapelu ko e tama a Salatielu, mo Iesua ko e tama a Iosataka, mo e kamata ia a laua ke ati e fale he Atua ha i Ierusalema, ha ha ia laua foki e tau perofeta he Atua kua lagomatai ai kia laua.
3 Ko e vaha ia ne o mai ai kia lautolu a Tatenai ko e iki ne pule ke he fahi mai nai he vailele, mo Setara-posenai, mo lautolu ne pule fakalataha mo laua, kua vagahau mai kia lautolu kua pehe mai, Ko hai kia ne poaki atu kia mutolu ke ta e fale nai mo e fakaoti ai he ati e kaupa nai?
4 Ti tala age a mautolu kia lautolu, kua pehe age, ko e tau higoa ni haia he tau tagata kua ta e fale nai.
5 Ka kua kitekite mai ha lautolu a Atua ke he tau patu Iuta, ti nakai pule ai a lautolu kia lautolu ke toka e gahua, ato hoko atu e mena kia Tariu; ti tali mai ai a lautolu ke he mena ia ke he tohi.
6 Ko e tau kupu hanai he tohi a Tatenai ko e iki ne pule ke he fahi mai he vailele, mo Setara-posenai, mo lautolu ne pule fakalataha mo ia ko e tau tagata Afaraseka, ha ha i ai ke he fahi mai nai he vailele, ne fakafano age e lautolu ke he patuiki ko Tariu.
7 Ne fakafano age e lautolu e tohi kia ia, ne tohi foki a loto pehe, Kia ha ha he patuiki ko Tariu e monuina oti kana.
8 Kia iloa he patuiki ne o age a mautolu ke he fahi kautu ko Iuta, ke he fale he Atua ne mua, kua ati ai ke he tau maka lalahi, mo e tau akau kua tuku ai ke he hana tau kaufale; ko e gahua na foki kua eke e lautolu mo e fakamalolo, kua monuina foki ni ke he tau lima ha lautolu.
9 Ti huhu age a mautolu ke he tau patu kua pehe age kia lautolu, Ko hai kia ne poaki atu kia mutolu ke ta e fale nai mo e fakaoti ai e kaupa nai he ati?
10 Ne huhu age foki e mautolu kia lautolu po ko hai e tau higoa ha lautolu ke fakailoa atu kia koe, ke tohi atu ai e tau higoa he tau tagata ne eke mo tau takitaki kia lautolu.
11 Ne pehe foki e tali ha lautolu kia mautolu, kua pehe mai, ko mautolu ko e tau fekafekau he Atua he lagi mo e lalolagi, kua ta e mautolu e fale ne ta ai ke he vaha fakamua ko e loga ia e tau kua mole; ne ta ai he patuiki lahi i Isaraela mo e fakaoti ai e ia e gahua.
12 Ka e fakatupu ai he tau matua ha mautolu e ita he Atua he lagi, ti tuku atu ai e ia a lautolu ke he tau lima he patuiki a Papelonia ko Nepukanesa, ko e tagata Kaletaia, ne ulu moumou foki e ia e fale nai, mo e fakapaea atu e ia e motu ki Papelonia.
13 Ka ko e tau fakamua a Kuresa ko e patuiki a Papelonia, ne poaki mai ai e Kuresa ko e patuiki ke ta ai e fale nai he Atua.
14 Ko e tau mena auro foki mo e tau mena ario ne ha i ai ke he fale he Atua, ne uta e Nepukanesa mai he faituga ha ha i Ierusalema, ti ta age ai e ia ke he faituga i Papelonia, ne ta mai he patuiki ko Kuresa e tau mena ia he faituga i Papelonia, mo e ta age ai e ia kia Sesipasara ko e higoa hanā he iki ne pule ne kotofa ai e ia;
15 Mo e pehe age a ia kia ia, Kia uta la e koe e tau mena nai, kia fano a a koe, mo e tuku ai ke he faituga ha ha i Ierusalema, kia ta ai foki e fale he Atua ke he hana ni a tuagafale.
16 Ti hau ai a Sesipasara na, ti tuku ai e ia e tau fakaveaga he fale he Atua ha ha i Ierusalema; tali mai foki he vaha ia, kua hoko mai ke he vaha nai, kua eke ai e mautolu e fale, ka e nakaila mau.
17 Hanai, kaeke kua mitaki ke he patuiki, kia kumi ai ke he fale he patuiki ha i kunā i Papelonia, po ke poaki moli nakai he patuiki ko Kuresa ke ta ai e fale nai he Atua i Ierusalema; kia tohi mai foki kia mautolu e finagalo he patuiki ke he mena na.