Esera 7:1-28
7 KUA mole atu foki e tau mena ia ke he vaha ne patuiki ai a Aretaseta ko e patuiki a Peresia, ne hake ai a Esera ko e tama a Seraia, ko e tama ia a Asaria, ko e tama a a Hilikia,
2 Ko e tama ia a Saluma, ko e tama ia a Satoka, ko e tama ia a Ahitupu,
3 Ko e tama ia a Amaria, ko e tama ia a Asaria, ko e tama ia a Meraiota,
4 Ko e tama ia a Serakia, ko e tama ia a Usi, ko e tama ia a Puke,
5 Ko e tama ia a Apisua, ko e tama ia a Fineaso, ko e tama ia a Eleasaro, ko e tama ia a Arona ko e ekepoa ne mua.
6 Ko Esera haia ne hake i Papelonia; ko e tohikupu iloilo foki a ia ke he fakatufono a Mose, ne foaki mai ai e Iehova ko e Atua a Isaraela; ne foaki mai foki he patuiki kia ia e tau mena oti ne ole ai a ia, ke lata mo e lima a Iehova hana Atua ha ha ia ia.
7 Ne o hake ai foki falu he fanau a Isaraela, mo e falu he tau ekepoa, mo e tau tagata Levi, mo e tau tagata uhu lologo, mo e tau tagata leveki gutuhala mo e tau netini, i Ierusalema, ke he tau fitu he patuiki ko Aretaseta.
8 Ne hoko foki a ia ki Ierusalema ke he lima mahina he tau fitu he patuiki.
9 Ha ko e aho fakamua he mahina fakamua ne kamata ai hana fenoga he hake a ia i Papelonia; ko e aho fakamua foki he lima mahina ne hoko atu ai a ia ki Ierusalema, ke lata mo e lima fakaalofa he hana Atua ha ha ia ia.
10 Ha kua taute e Esera hana loto ke kumi ke he fakatufono a Iehova mo e eke ai, mo e fakaako atu ai e ia kia Isaraela e tau fakatufono, mo e tau fakafiliaga.
11 Ko e tohi hanai ne lagaaki ko e tohi he patuiki ko Aretaseta kia Esera ko e ekepoa ko e tohikupu, ko e tohikupu a ia he tau kupu he tau poakiaga a Iehova, mo e hana tau fakatufono kia Isaraela.
12 Ko e patuiki he tau patuiki ko Aretaseta kia Esera ko e ekepoa, ko e tohikupu he fakatufono he Atua he lagi; kia katoatoa hau a monuina, kua pihia,
13 Kua poaki atu e au, Ko lautolu oti he motu ko Isaraela, mo e tau ekepoa ha lautolu, mo e tau tagata Levi, ha ha he kautu haku, kua loto ke o, kia o a lautolu fakalataha mo koe ki Ierusalema.
14 Ha kua fakafano age a koe he patuiki, mo e tau pule tokofitu ha ha ia ia, ke huhu age kia Iuta mo Ierusalema, ke lata mo e fakatufono he hau a Atua ha ha he lima hau,
15 Ke ta age foki e tau ario mo e tau auro kua foaki atu mo e fakamakai he patuiki, mo e tau pule ha ha ia ia, ke he Atua a Isaraela ko ia ne ha i ai hana faituga i Ierusalema,
16 Katoa mo e tau ario oti mo e tau auro ke moua ai e koe ke he fahi kautu oti a Papelonia, mo e tau mena kua makai ki ai e tau loto he tau tagata ke foaki atu, mo e tau ekepoa, kua foaki atu mo e fakamakai ma e fale he Atua ha mautolu ha ha i Ierusalema;
17 Ko e mena ia kia fakafua mai fakalahi e koe ke he tau tupe na, e tau povi tane, ko e tau mamoe tane, ko e tau punua mamoe, mo e ha lautolu a tau poa mena kai, mo e ha lautolu a tau poa inu, mo e eke poa ai ki luga he fatapoa ke he fale he Atua ha mutolu ha ha i Ierusalema,
18 Ko e mena foki kua mitaki kia koe mo e tau matakainaga hau ke eke mo e tau ario, mo e tau auro ne toe, ke eke ai ke lata mo e finagalo he Atua ha mutolu.
19 Ko e tau kapiniu foki kua ta atu kia koe ke fakafekau ai ke he fale he hau a Atua, kia tuku atu ai e koe ki mua he Atua a Ierusalema.
20 Ko e tau mena foki ne toe kua aoga ai he he fale he hau a Atua, kua manatu e koe ke ta age, kia ta age ai e koe mai he fale ne tatanaki ai e tau koloa he patuiki.
21 Ko au foki, ko au ko e patuiki ko Aretaseta, kua poaki atu e au ke he tau leveki koloa oti ha ha he fahi atu he vailele, kia eke fakaave e mutolu e tau mena oti ka poaki atu ai kia mutolu e Esera ko e ekepoa ko e tohikupu he fakatufono he Atua he lagi,
22 Ke hoko ke he taha teau e taleni ario, ke hoko foki ke he teau e kori saito, ke hoko foki ke he teau e paita uaina, ke hoko foki ke he teau e paita lolo, mo e masima foki nakai tohi hana fafati.
23 Ko e tau mena oti kua poaki mai ai he Atua he lagi, kia eke fakamitaki ai ha ko e fale he Atua he lagi; ha ko e mena hoko mai he ha e ita ke he kautu he patuiki mo e hana tau tama tane?
24 Kua fakailoa atu foki a mautolu kia mutolu ke he tau ekepoa oti, mo e tau tagata Levi, ko e tau tagata uhu lologo, ko e tau tagata ne leveki e tau gutuhala, ko e tau netini, mo e tau tagata eke gahua ke he fale na he Atua, aua neke kotofa atu kia lautolu e tau poa ke ta mai, mo e tau poa ke he tau mena kehekehe, mo e tau poa he tau puhala.
25 Ko koe foki ma Esera na e, kia kotofa ai e koe, ke lata mo e iloilo he hau a Atua ha ha ia koe, e tau fakafili mo e tau pule, kia fakafili ai e lautolu e motu oti ha ha he fahi atu he vailele, ko lautolu oti kua iloa e fakatufono he hau a Atua; kia fakaako atu foki e mutolu a lautolu kua nakai iloa.
26 Ko lautolu foki kua nakai eke e fakatufono he hau a Atua, mo e fakatufono he patuiki, kia fakahala fakalahi a lautolu, po ke fakahala ke mate, po ke fakapaea atu ke he tau motu kehe, po ke fofo ai ha lautolu a tau koloa, po ke tuku ai ke he fale puipui.
27 Kia fakaaue atu kia Iehova ko e Atua he tau matua ha tautolu, kua tuku ai e mena pehenai ke he finagalo he patuiki, ke fakafulufuluola ai e fale a Iehova ha ha i Ierusalema;
28 Mo e fakahoko mai e fakaalofa kia au ki mua he patuiki, mo e hana tau pule, ki mua foki he tau iki malolo oti he patuiki. Ne fakamalolo ai foki au ke lata mo e lima a Iehova haku a Atua ha ha ia au, ne fakapotopoto mai foki e au ia Isaraela e tau iki ke o hake a mautolu fakalataha mo lautolu.