Esera 9:1-15
9 KUA oti e tau mena na, ti o mai ai e tau iki kia au, kua pehe mai, Ko e motu ko Isaraela mo e tau ekepoa, mo e tau tagata Levi, kua nakai vevehe kehe ai a lautolu mai he tau tagata he tau motu kehe, ka kua eke e lautolu ke lata mo e tau mena vihiatia ha lautolu, ko e tau tagata Kanana, ko e tau tagata Heti, ko e tau tagata Perisi, ko e tau tagata Iepusi, ko e tau tagata Amoni, ko e tau tagata Moapi, ko e tau tagata Aikupito, mo e tau tagata Amori.
2 Ka kua fai hoana ai a lautolu ke he tau tama fifine ha lautolu, ko lautolu katoa mo e tau tama tane ha lautolu, mo e fiofio ai e fanau tapu mo e tau tagata he tau motu ia, kua homo atu foki e tau iki mo e tau pule ke he mahani kelea na.
3 Ne logona e au e tau kupu ia ti hehe ai e au haku a tapulu mo e haku a tapulu loa, mo e futi e au haku a tau lau ulu, mo e haku hafe, mo e nofo au ki lalo kua hopo haku ate.
4 Ti fakapotopoto mai ai kia au a lautolu oti ne matakutaku ke he tau kupu he Atua a Isaraela, ha ko e hala ha lautolu he paeaaga; ne nofo ai foki au kua hopo haku ate, ato hoko ke he magaaho ne eke ai e poa afiafi.
5 Kua hoko ke he magaaho ne eke ai e poa afiafi, ti matike ai au he haku a mamahi, mo e haku a tau tapulu kua mahehe, katoa foki mo e haku tapulu loa, ti fakatokotui ai au ke he haku tau tulihui, mo e fakaolo atu e au haku tau lima kia Iehova haku Atua,
6 Mo e pehe atu au, Haku Atua na e, kua ma au, mo e ma au ke haga hake ai kia koe, haku Atua na e; ha kua loga ha mautolu a tau mahani kelea kua hoko ki luga he tau ulu ha mautolu, mo e tutupu lahi ha mautolu a tau hala kua hoko ni ke he lagi.
7 Tali mai he vaha he tau matua ha mautolu ha ha ia mautolu e tau hala loga kua hoko ni ke he aho nai; ko e tau mahani kelea foki ha mautolu ne tuku atu ai a mautolu, ko e tau patuiki ha mautolu, mo e ha mautolu a tau ekepoa, ke he tau lima he tau patuiki he tau motu, ke he pelu, ke fakapaea ai, ke fofo ai he tau, mo e ma ai a mautolu, tuga he eke ai ke he aho nai.
8 Ka ko e vaha nai, tuga e magaaho ke kemo ai e mata, kua fakaalofa mai ai a Iehova ha mautolu a Atua, ke toe kia mautolu a lautolu kua hao, mo e foaki mai ai e ia kia mautolu e fao ke he hana mena tapu, ke fakamaama mai he Atua ha mautolu, ha mautolu a tau mata, ke foaki mai ai foki e fakamouiaga tote, he eke ai a mautolu mo tau tupa.
9 Ka ko e tau tupa a mautolu, ka e nakai tiaki a mautolu he Atua ha mautolu, he nonofo fakatupa ai a mautolu, ka kua fakahoko mai e ia e fakaalofa kia mautolu ki mua he patuiki a Peresia, ke foaki mai ai kia mautolu e fakamouiaga, ke fakatu ai e fale he Atua ha mautolu, mo e taute e tau mena ha i ai ne maona, mo e tuku mai e ia kia mautolu e kaupa i Iuta mo Ierusalema.
10 Hanai, ha mautolu a Atua na e, ko e heigoa kia ke tala atu ai e mautolu kia koe ha kua eke ai e tau mena na? ha kua tiaki e mautolu hāu a tau poaki,
11 Ne poaki ai e koe ke he hau a tau fekafekau ko e tau perofeta kua pehe mai, Ko e motu kua o a mutolu ki ai ke eke ma mutolu ko e motu kua kelea ha ko e tau mena kelea ne eke he tau tagata he motu ia, ke he ha lautolu a tau mena vihiatia kua puke ai e motu ke kamata mai he taha fahi ke hoko atu ke he taha fahi ke he tau mena kelea ne eke e lautolu.
12 Hanai, aua neke age e mutolu e tau tama fifine ha mutolu ke he tau tama tane ha lautolu, aua neke ta mai foki e mutolu ha lautolu a tau tama fifine ma e tau tama tane ha mutolu, ti ua kumi tukulagi e mutolu e mena ke mafola ai po ke monuina ai a lautolu; kia malolo ai a mutolu, mo e kai ai e mutolu e tau mena mitaki he kelekele, mo e eke ai mo e tau tama ha mutolu tukulagi.
13 Kua oti he hohoko mai e tau mena oti ia kia mautolu ha ko e ha mautolu a tau mahani kelea, mo e ha mautolu a tau hala loga, ha ko koe ha mautolu a Atua na e, kua nakai fakahala a mautolu ke lata mo e tau mahani kelea ha mautolu, mo e fakahao pehenai e koe a mautolu.
14 Kaeke ke holi foki e mautolu hau a tau poaki, mo e fakafetauaki a mautolu mo e tau tagata kua eke e tau mena vihiatia na, nakai kia ita mai a koe kia mautolu ato fakaoti ai a mautolu, kia nakai toe ai taha, po ke fakahao ai ha tagata?
15 Iehova na e, ko e Atua a Isaraela, kua tututonu a koe; ha kua toe ai a mautolu, kua fakahao a mautolu, tuga he eke ai ke he aho nai; kitiala, ha ha i ai ki mua hau a mautolu mo e ha mautolu a tau hala; ha ko e mena na kua nakai maeke a mautolu ke tutu ai ki mua hau.