Eseta 1:1-22
1 KO e vaha ia Ahasueru, (ko Ahasueru haia ne eke mo patuiki, ne kamata ma i Initia ti hoko atu ki Aitiope, ke he tau fahi kautu ne taha e teau uafulu ma fitu;)
2 Ko e vaha ia ne nofo ai e patuiki ko Ahasueru ke he nofoaiki he hana kautu, ha ha i ai i Susana ko e fale he patuiki,
3 Ko e tau tolu hana he eke a ia mo patuiki ne eke ai e ia e galue ma e tau iki oti ha ia ia mo e hana tau fekafekau; ko lautolu ne mua ue atu i Peresia mo Metai, ko e tau iki mo e tau iki he tau fahi kautu ha ha i ai ki mua hana;
4 Kua fakakite atu e ia e tau koloa he hana kautu lilifu, mo e mua ue atu e fulufuluola he hana lilifu, ke he tau aho loga, ko e taha e teau mo e valugofulu e aho.
5 Kua katoatoa e tau aho ia ti eke ai he patuiki e galue ma e tau tagata oti ha ha i Susana ko e fale he patuiki, ko e tau iki katoa mo e tau lalo tagata, ke he tau aho ne fitu ke he lotopa he kaina he fale he patuiki.
6 Ne tautau ai e ie lino hina; ko e ie mitaki mo e ie uli, ne fakamau ai ke he tau afo lino mo e kula uhi ke he tau mama ario mo e tau pou sesa; ha ha i ai e tau mohega auro mo e tau mohega ario i luga he tau maka ati, ko e tau paata, mo e tau sesa, mo e tau tara, mo e tau sokere.
7 Ne age kia lautolu e tau kapiniu auro ke inu ai a lautolu, ko e tau kapiniu kehekehe ni, mo e tau uaina loga he patuiki, tuga ne mena kua lata mo e patuiki.
8 Ne fakalata foki ha lautolu a inu ke he fakatufono, nakai fakamakamaka atu ke he taha, he pehe e poaki he patuiki ke he tau pule oti he hana magafaoa, kia takitaha e tagata mo e eke e mena kua loto a ia ki ai.
9 Ko Vasati foki ko e patuiki fifine, ne eke ai e ia e galue ma e tau fifine ke he fale he patuiki, ko e fale haia he patuiki ko Ahasueru.
10 Ko e aho fitu ne fiafia ai e loto he patuiki he uaina, ne pehe age a ia kia Meumanu, mo Piseta, mo Harepona, mo Pigeta, mo Avageta, ko Setara, mo e Karekase, ko e tau eunuka tokofitu ia, ne fekafekau atu ai ki mua he patuiki ko Ahasueru,
11 Ke ta mai ai e patuiki fifine ko Vasati ki mua he patuiki mo e foufou he patuiki, kia fakakite atu hana mitaki ke he motu mo e tau iki; ha ko e tagata tino mitaki a ia.
12 Ka e nakai mafai e patuiki fifine ko Vasati ke fina age ai he kupu he patuiki ne poaki ai e ia he tau eunuka; ti ita mahaki ai e patuiki, ne hukia lahi ni hana finagalo.
13 Ti pehe age e patuiki ke he tau tagata pulotu, ne iloa ai e tau tau; (ha kua mahani pihia e patuiki kia lautolu oti ne iloa e tau fakatufono mo e tau fakafiliaga;
14 Ne tata age kia ia a Karesena, ko Sitaru, ko Atematu, ko Tasesa, ko Merese, ko Maresena, ko Memukana, ko e tau iki tokofitu a Peresia mo Metai haia ne kitia e lautolu e fofoga he patuiki, ko e tau tagata ne mumua a lautolu ke he kautu;)
15 Ko e heigoa kia e mena ke eke ke he patuiki fifine ko Vasati, ke lata mo e fakatufono, he nakai omaoma a ia ke he kupu he patuiki ko Ahasueru ne poaki atu ai e ia he tau eunuka?
16 Ti tali mai ai a Memukana ki mua he patuiki mo e tau iki, Nakai ko e patuiki hokoia ne mahani hepehepe ki ai e patuiki fifine ko Vasati, ka e katoa foki mo e tau iki oti mo e tau tagata oti he tau fahi kautu oti he patuiki ko Ahasueru;
17 Ha ko e mena to hoko atu e tala ke he patuiki fifine ke he tau fifine oti ti vihiatia ai e lautolu ha lautolu a tau tane, ka talahau ai kia lautolu, Ne poaki age he patuiki ko Ahasueru ke ta mai ai e patuiki fifine ko Vasati ki mua hana, ka e nakai fina age a ia.
18 Ko e tau iki fifine foki a Peresia mo Metai ka logona e lautolu e tala ke he patuiki fifine, to pihia age a lautolu ke he aho nai ke he tau iki oti ha ha he patuiki, ti lahi ai e fakavihia mo e feitaaki.
19 Kaeke kua mitaki ke he patuiki, kia hoko atu hana kupu mai ia ia ni, mo e tohi ai fakalataha mo e tau fakatufono a Peresia mo Metai, nakai hiki, ke aua neke hoko mai foki a Vasati ki mua he patuiki ko Ahasueru; ka kia eke he patuiki taha patuiki fifine ke hukui aki a ia, ko e taha ne mua hana mahani mitaki ke he hana.
20 Ka logona atu foki e pule he patuiki, kua eke ai e ia ke he hana kautu oti, (ha ko e mena lahi haia,) ti fakalilifu atu ai he tau fifine oti ke he tau tane ha lautolu, ko e tau iki katoa mo e tau lalo tagata.
21 Ne mitaki foki e kupu na ke he manatu he patuiki mo e tau iki; ti eke he patuiki tuga ne vagahau atu ai e Memukana.
22 Ne uta ai e tau tohi ke he tau fahi kautu oti he patuiki, ne fakalata ai e tohi ke he taha fahi kautu mo e taha fahi kautu, ke lata foki mo e vagahau he taha motu mo e taha motu, kia takitaha e tane mo e pule ke he hana magafaoa, mo e vagahau ai e ia ke he vagahau he hana motu.