Eseta 2:1-23
2 KUA mole atu e tau mena ia, kua maulu foki e ita he patuiki ko Ahasueru, ti manatu ai e ia a Vasati mo e mena ne eke e ia, katoa mo e fakatufono ne eke kia ia.
2 Ti pehe age e tau fekafekau ne fekafekau ai ke he patuiki, Kia kumi mai ma e patuiki e tau tama fifine ko e tau tamafine ikiiki tino mitaki.
3 Kia kotofa foki he patuiki e tau tagata ke pule ke he tau fahi kautu oti he hana kautu, kia fakapotopoto ai e lautolu e tau tamafine ikiiki oti ne tino mitaki ki Susana ko e fale he patuiki, ke he fale he tau fifine, kia Hege ko e eunuka he patuiki, ko ia ne leveki e tau fifine; mo e ta age e ia kia lautolu e tau mena ke fakamea aki a lautolu.
4 Ko e tama fifine foki kua fiafia ki ai e patuiki kia uta a ia mo patuiki fifine ke hukui aki a Vasati. Ne mitaki e tau kupu ia ke he manatu he patuiki; ti eke ai e ia pihia.
5 Ha ha i ai i Susana ko e fale he patuiki ko e tagata Iuta, ko Moretikai hana higoa, ko e tama a Iairo, ko e tama a Semi, ko e tama ia a Kiso, ko e tagata he magafaoa a Peniamina.
6 Ne fakapaea mai a ia i Ierusalema fakalataha mo e paeaaga ne fakapaea ai fakalataha mo e patuiki a Iuta ko Iekonia, ko lautolu ne uta ai he patuiki a Papelonia ko Nepukanesa.
7 Ne eke a ia mo matua a Hatesa, ko Eseta haia, ko e tama fifine he matakainaga he hana matua tane, ha kua nakai fai matua tane a ia po ke matua fifine; ko e tama fifine foki a ia ne mitaki hana a tino, ne mitaki foki hana mata. Ne mamate hana matua tane mo e hana matua fifine, ti uta ai e Moretikai a ia ke eke mo tama fifine hana.
8 Ne logona ai e kupu he patuiki mo e hana fakatufono, mo e fakapotopoto ai e tau tama fifine tokologa i Susana ko e fale he patuiki kia Hege, ti uta ai a Eseta ke he fale he patuiki kia Hege, ko ia ne leveki a tau fifine.
9 Ne mitaki e tama fifine ke he hana manatu ti ofania e ia a ia; ti ta age fakaave e ia kia ia hana tau mena ke fakamea aki a ia, katoa mo e tau mena ne kotofa mana, mo e tau tama fifine tokofitu ne fifili mai he magafaoa he patuiki ke ta age kia ia; ti uta ai e ia a lautolu mo e hana lafu tama fifine ke he mena ne mua he mitaki ke he fale he tau fifine.
10 Ti nakai fakailoa atu e Eseta hana motu po ke magafaoa hana; ha kua poaki age e Moretikai kia ia, ke aua neke fakailoa atu ai e ia.
11 Ne evaeva ai foki a Moretikai he tau aho oti ki mua he lotopa he fale he tau fifine ke iloa po ke malolo nakai a Eseta; po ke heigoa foki e mena kua eke kia ia.
12 Ne o fetogiaki fakamatafeiga e tau tama fifine takitokotaha ke he ha lautolu a o atu ke he patuiki ko Ahasueru, ka kua katoatoa ai e tau mahina hogofulu ma ua he eke kia lautolu ke lata mo e fakatufono ke he tau fifine; ha kua pehe e katoatoa he tau aho he fakamea ai a lautolu; ko e ono e mahina he takai ai a lautolu ke he puke lolo muro, mo e ono e mahina ke he tau mena manogi, mo e tau mena kua fakamea aki e tau fifine.
13 Ne pehe foki he fina age e tama fifine ke he patuiki; ne age kia ia e tau mena oti ne fia eke e ia ke fina age ai a ia he fale he tau fifine ke he fale he patuiki.
14 Ne fina age ai a ia ke he magaaho afiafi, ko e aho foki a pogipogi ne liu mai a ia ke he fale ne ua aki he tau fifine kia Sasesaka ko e eunuka he patuiki, ko e leoleo a ia he tau hoana fakahoa, nakai fina age foki a ia ke he patuiki ka nakai fiafia ai e patuiki kia ia, mo e ui ai e ia hana higoa.
15 Ne hoko foki kia Eseta ko e tama fifine a Aviaila ko e matakainaga he matua tane a Moretikai, ne eke e ia a ia mo tama fifine hana, ti fina age ai a ia ke he patuiki, nakai ole atu ai e ia ha mena ka ko e tau mena ne kotofa ai e Hege ko e eunuka he patuiki, ne leveki ai e tau fifine. Ne ofania foki a Eseta e lautolu oti ne kitia a ia.
16 Ne uta ai a Eseta ke he patuiki ko Ahasueru ke he fale he patuiki ke he hogofulu mahina, ko e mahina ko Tapeta haia, ke he tau fitu he patuiki ai a ia.
17 Kua mua foki e manako he patuiki kia Eseta ke he tau fifine oti, ne homo atu foki hana fakaalofa kia ia mo e hana fakahelehele kia ia ke he tau tamāfine ikiiki oti; ti tuku atu ai e ia e foufou iki ke he hana ulu mo e eke a ia mo patuiki fifine ke hukui aki a Vasati.
18 Ti eke ai he patuiki e galue lahi ma e tau iki oti ha ha ia ia mo e hana tau fekafekau, ko e galue ha ko Eseta; ti tuku age ai e ia ke okioki ai e tau tagata ke he tau fahi kautu, ne foaki age foki e ia e tau mena fakaalofa tuga e mena ne lata ai mo e patuiki.
19 Ne fakapotopoto ai foki e tau tamāfine ikiiki ko e lagaua ia, ti nofo ai a Moretikai ke he gutuhala he patuiki.
20 Kua nakai talahau atu e Eseta hana magafaoa, po ke hana motu; tuga he poaki atu ai e Moretikai kia ia; ha ko e mena eke e Eseta e tau poaki a Moretikai, tuga he eke e ia he leveki ai e ia a ia.
21 Ko e vaha ia he nofo ai a Moretikai ke he gutuhala he patuiki, ne ita ai a Piketano mo Tiresa, ko e tokoua ia e eunuka he patuiki, ko e tau tagata leveki gutuhala, ne fia fakahoko atu e laua e tau lima ha laua ke he patuiki ko Ahasueru.
22 Ne iloa e Moretikai e mena ia ti fakakite age e ia ke he patuiki fifine ko Eseta; ti tala age ai e Eseta ke he patuiki ke he higoa a Moretikai.
23 Ne kumi e mena, ti iloa ai, ti fakatautau ai a laua ke he akau, Ne tohi ai foki ki mua he patuiki ke he tohi he tau tala ke he tau mena ne tutupu he tau vaha.