Eseta 3:1-15
3 KUA mole atu e tau mena ia ti fakalilifu atu he patuiki ko Ahasueru kia Hamanu ko e tama a Hametatu ko e tagata Akako, mo e fakatokoluga ai a ia, mo e eke e ia hana nofoa ke mua ke he tau nofoa oti he tau iki oti ne fakalataha mo ia.
2 Ti tukutukuhifo ai mo e fakaveveli fakafohifo ai kia Hamanu e tau fekafekau oti he patuiki ha ha i ai ke he gutuhala he patuiki; ha kua poaki age e patuiki kia eke ai pihia; ka e nakai tukutukuhifo ai a Moretikai, ti nakai fakaveli fakafohifo ai a ia.
3 Ti pehe age e tau fekafekau he patuiki ha ha he gutuhala he patuiki kia Moretikai, Ko e heigoa kia e mena kua holi ai e koe e poaki he patuiki?
4 Ne tala age ai e lautolu kia ia ke he taha aho mo e taha aho, ka e nakai fanogonogo a ia kia lautolu; ti tala age ai a lautolu kia Hamanu, ke kitekite po ke tumau nakai e tau mena a Moretikai; ha kua fakakite age e ia kia lautolu ko e tagata Iuta a ia.
5 Ne kitia e Hamanu kua nakai tukutukuhifo a Moretikai ti nakai fakaveli fakafohifo ai a ia; ti ita lahi ai a Hamanu.
6 Ne vihiatia e ia ke fakahoko atu hana lima kia Moretikai tokotaha, ha kua fakakite atu e lautolu kia ia e motu a Moretikai; ti manako ai a Hamanu ke fakaoti e tau tagata Iuta oti ko e motu a Moretikai, ha ha i ai ke he kautu oti a Ahasueru.
7 Ko e mahina fakamua, ko e mahina ko Nisana haia, ko e tau hogofulu ma ua ne patuiki ai a Ahasueru, ne eke ai e lautolu e Puro, ko e vili haia, ki mua a Hamanu ke he taha aho mo e taha aho, ke he taha mahina foki mo e taha mahina, ke hoko ke he mahina hogofulu ma ua, ko e mahina ko Atara haia.
8 Ti pehe age ai a Hamanu ke he patuiki ko Ahasueru, Ha ha i ai taha motu kua fakamavehevehe mo e nonofo a lautolu hoko lautolu fakalataha mo e tau tagata he tau fahi kautu oti he hau a kautu. Kua kehe foki ha lautolu a tau fakatufono mo e tau fakatufono he tau motu oti, mo e nakai omaoma a lautolu ke he tau fakatufono hāu ko e patuiki; ko e mena ia kua nakai lata ke he patuiki ke toka a lautolu ke nonofo ai.
9 Kaeke kua mitaki kia koe ko e patuiki, kia tohi kia fakaoti ai a lautolu; ti fafati atu e au hogofulu e afe taleni ario ke he tau lima ha lautolu kua leveki e tau mena he patuiki, kia ta age ai e lautolu ke he mena ne tatanaki ai e tau koloa he patuiki.
10 Ti aki ai he patuiki hana mama he lima hana, mo e ta age ai kia Hamanu ko e tama a Hametatu ko e tagata Akako, ko ia ne fai fi ke he tau tagata Iuta.
11 Ne pehe age foki e patuiki kia Hamanu, Kua foaki atu kia koe e ario, katoa mo e motu na, kia eke a e koe ki ai e mena kua mitaki kia koe.
12 Ti ui ai ke he tau tohikupu he patuiki ke he aho hogofulu ma tolu he mahina fakamua, ti tohi ai ke lata mo e tau mena oti ne poaki age ai e Hamanu ke he tau tui he patuiki, mo e tau pule, ko lautolu ne pule ke he taha fahi kautu mo e taha fahi kautu, ko e tau iki foki he taha motu mo e taha motu, ke lata ai e tohi ke he taha fahi kautu mo e taha fahi kautu, ke lata foki mo e vagahau he taha motu mo e taha motu; ne tohi ai ke he higoa a Ahasueru, ne fakamau fakamailoga foki ke he mama he patuiki.
13 Ti tafepoi e tau fekau mo e uta ai e tau tohi ke he tau fahi kautu oti he patuiki, kia fakaoti mo e kelipopo, mo e fakamahakava ai e tau tagata Iuta oti kana, ko e tau fuata mo e tau fuakau, ko e tau tama ikiiki katoa mo e tau fifine, ke he aho taha, ko e aho hogofulu ma tolu haia he mahina hogofulu ma ua, ko e mahina ko Atara haia; mo e tau mena ha lautolu kia eke ia mo tau mena ne fofo he tau.
14 Ne lagaaki e tohi ne uta ke eke mo fakatufono ke he taha fahi kautu mo e taha fahi kautu ke he tau fahi kautu oti, ti fakailoa atu ai ke he tau motu oti kia tauteute ai a lautolu ke he aho ia.
15 Ne tafepoi age fakaave e tau fekau ke lata mo e poaki he patuiki; ne fakamatala ai foki e fakatufono i Susana, ko e fale he patuiki. Ti nonofo ai e patuiki mo Hamanu mo e inu mena ai a laua; ka e fakaatukehe ai e maga ko Susana.