Esoto 10:1-29
10 KUA pehe mai a Iehova kia Mose, Kia hu atu a koe kia Farao, ha kua fakamao e au hana loto mo e tau loto he hana tau fekafekau; kia tuku atu e au haku tau fakamailoga nai ki mua hana;
2 Kia talahau foki e koe ke he tau teliga he hau a fanau, katoa mo e fanau he hau a fanau, e tau mena ne eke e au i Aikupito mo e haku a tau fakamailoga ne tuku atu e au kia lautolu, kia iloa ai e mutolu ko au ni ko Iehova.
3 Ti huhū atu a Mose mo Arona kia Farao, kua tala age a laua kia ia, Kua pehe e vagahau a Iehova ko e Atua he tau tagata Heperu; ato a fe kia he nakai maeke ia koe ke fakatokolalo ki mua haku? Tokai e koe haku motu ke o, kia fekafekau mai a lautolu kia au.
4 Ha ko e mena kaeke ke nakai maeke e koe ke toka haku motu ke o, kitiala, a pogipogi to ta mai ai e au e tau hē akerise ke he hau a motu;
5 Ti galo ai e fuga kelekele, ti nakai maeke ke kitia e kelekele, to kai e lautolu e tau mena ne toe kua hao mo e toe kia mutolu he uha tuli; to kai foki e lautolu e tau akau oti kana ha ne tutupu ma mutolu ke he fonua.
6 To puke ai foki hau a tau fale, mo e tau fale he hau a tau fekafekau oti, mo e tau fale a Aikupito oti kana; nakai kitia ha mena pihia he tau matua hau, po ke tau matua he hau a tau matua, tali mai he aho ne nonofo ai a lautolu ke he lalolagi ato hoko mai ke he aho nai. Ti tafilu atu a ia mo e hu ki fafo ia Farao.
7 Ti pehe age ai e tau fekafekau a Farao kia ia, To eke e tagata na mo hele kia tautolu ato a fe? Ati toka la e tau tagata ke o, kia fekafekau a lautolu kia Iehova ha lautolu a Atua; nakai kia la iloa e koe kua mahakava tuai a Aikupito?
8 Ti liuaki atu a Mose mo Arona kia Farao, ti pehe mai a ia kia laua, O a mutolu, fekafekau kia Iehova ha mutolu a Atua; ka ko mutolu mo hai kia ke o?
9 Ti pehe atu ai a Mose, To o a mautolu mo e ha mautolu a tau fuata, mo e ha mautolu a tau fuakau, mo e ha mautolu a tau tama tane, mo e ha mautolu a tau tama fifine, to o a mautolu mo e ha mautolu a tau fuifui mamoe, mo e ha mautolu a tau fuifui povi; ha ko e mena eke galue a mautolu kia Iehova.
10 Ti pehe mai a ia kia laua, Kia ha i ai pihia a Iehova ia mutolu, kaeke ke toka e au a mutolu ke o mo e ha mutolu a fanau; a mutolu, ha kua toka i mua ha mutolu e kelea ni.
11 Nakai pihia; o a mutolu ko e tau tane ke fekafekau kia Iehova ha ko e mena ia ne manako a mutolu ki ai. Ti vega ai a laua mai mua a Farao.
12 Ti pehe mai ai a Iehova kia Mose, Fakaolo atu hau a lima ki luga he motu a Aikupito ke o mai e tau hē akerise, kia hake mai ki luga he motu ko Aikupito; to kai ni e tau akau mateafu oti he motu, ko e tau mena oti kua toe he uha tuli.
13 Ti fakaolo e Mose hana tokotoko ki luga he motu ko Aikupito, ti fakaagi mai ai e Iehova e matagi uta ke he motu ke he aho oti ia mo e po oti ia; kua hoko ke he magaaho pogipogi, ti ta mai he matagi uta e tau hē akerise;
14 Ti hake ni e tau hē akerise ke he motu oti kana a Aikupito, kua nonofo foki ke he tau fahi oti a Aikupito, kua loga ue atu ni; nakai fai hē akerise pihia ke he vaha fakamua, to nakai tuai pihia foki.
15 Ti galo ai e fuga kelekele oti kana, ti pouligia ai foki e motu; kua kai ai foki e tau akau mateafu oti he motu, katoa mo e tau fua oti he tau akau ne toe he uha tuli, ti nakai toe ni ha lau ke he taha akau, po ke taha akau mateafu ke he fonua he motu oti ki Aikupito.
16 Ti fakaave ai a Farao ke ui kia Mose mo Arona, kua pehe mai foki a ia, Kua hala tuai au ki mua a Iehova ha mutolu a Atua, ki mua foki ha mua;
17 Ko e hanai, kia fakamagalo haku a hala lagataha ni hokoia, kia ole atu foki e mua kia Iehova ha mutolu a Atua, kia uta kehe e ia ia au e mauku nai hokoia.
18 Ti fina atu ai a ia ia Farao, mo e ole atu kia Iehova.
19 Ti fakaliu e Iehova e matagi ke agi mai lao kua malolo lahi ni, ti uta ai ni e tau hē akerise mo e fakato ke he tahi Kula; kua nakai toe ha hē akerise taha ke he motu oti ni a Aikupito.
20 Ka e fakamao e Iehova e loto a Farao, ti nakai toka e ia e fanau Isaraela ke o.
21 Ti pehe mai a Iehova kia Mose, Kia fakaolo ā hau a lima ke he lagi kia pouli ai e motu ko Aikupito, ko e pouli ke amohia.
22 Ti fakaolo ai e Mose hana lima ke he lagi, ti ha i ai e pouli kikio ke he motu oti ko Aikupito kua tolu ni e aho.
23 Nakai fekitiaki e lautolu, ti nakai tu mai ha tagata he mena ne nofo ai, kua tolu ni e aho; ka ko e fanau oti a Isaraela kua maama e tau mena ne nonofo ai a lautolu.
24 Ti ui a Farao kia Mose, mo e pehe mai, Ati o a mutolu, kia fekafekau a mutolu kia Iehova; ko e ha mutolu a tau fuifui mamoe, mo e ha mutolu a tau fuifui povi hokoia ke nonofo, ka e o a mutolu mo e ha mutolu a fanau.
25 Ka e pehe atu a Mose, Kia tuku mai foki e koe kia mautolu e tau poa mo e tau poa huhunu, kia eke poa ai e mautolu kia Iehova ha mautolu a Atua;
26 To o foki ha mautolu a tau manu mo mautolu, nakai toe ni ha manu taha; ha ko e tau mena ia ni ke uta e mautolu ke fekafekau aki kia Iehova ha mautolu a Atua, nakai iloa foki e mautolu e tau mena ke fekafekau aki kia Iehova, ato hohoko atu a mautolu ki ai.
27 Ka e fakamao e Iehova e loto a Farao, ti nakai mafai a ia ke toka a lautolu ke o.
28 Ti pehe mai a Farao kia ia, Fano kehe a koe ia au, a koe ni neke liu foki kitia e koe hoku mata, ha ko e aho ka liu foki kitia e koe hoku mata, to mate ai a koe.
29 Ti pehe atu ai a Mose, To moli ni e kupu hau, nakai tuai kitia e au hau a fofoga.