Esoto 12:1-51
12 TI vagahau mai e Iehova kia Mose mo Arona ke he motu ko Aikupito, kua pehe mai,
2 To eke e mahina nai kia mutolu mo mahina uluaki, ko e mahina fakamua ni kia mutolu ke he tau.
3 Kia tala age e mua ke he fakapotopotoaga oti a Isaraela, kua pehe, Ko e aho hogofulu he mahina nai, kia igatia ai e tagata ia lautolu mo e punua mamoe ke he tau magafaoa he tau matua ha lautolu, ko e magafaoa mo e punua mamoe.
4 Kaeke foki kua tote e taha magafaoa, nakai maeke ke fakaoti e punua mamoe, kia fakalataha ai a ia mo ia kua katofia mo e ha lautolu a magafaoa, fakalata ke he totouaga he tau tagata; kia fakalata e punua mamoe mo e tau tagata ke kai ai.
5 Kia katoatoa e mitaki he punua mamoe ha mutolu, ko e tane ni tau taha, to uta e mutolu mai he fuifui mamoe, po ke fuifui koti.
6 Ti toka ai e mutolu ato hoko ke he aho hogofulu ma fa he mahina nai; ti keli ai he fakapotopotoaga oti katoatoa a Isaraela ke he magaaho afiafi.
7 Kia uta foki e lautolu e maga toto, mo e tuku atu ke he na pou ua he gutuhala, mo e hana akau fakalava he tau fale ka kai ai e lautolu.
8 To kai foki e lautolu e kakano ke he po ia ni, ka tunu ke he afi katao mo e tau areto nakai fakaea, mo e tau lakau kona ke kai aki e lautolu.
9 Aua neke kai ai e mutolu ka e nakai la moho, po ke tunu ke he vai ka e tunu ni ke he afi, ko e hana ulu, mo e hana na hui, mo e hana gakau.
10 Aua foki neke toka ai ha mena ato a pogipogi; ha ko e mena ka toe ato a pogipogi, kia huhunu ia ke he afi.
11 Kia pehe foki ha mutolu a kai ai, kua pipi ha mutolu a tau tokupu, ha mutolu a tau afi aloalohui ke he tau hui ha mutolu, ha he tau lima foki ha mutolu e tau tokotoko ha mutolu, to kai ai e mutolu mo e fakatepetepe; ko e paseka haia kia Iehova.
12 Ha ko e mena fina age au a po ke he motu ko Aikupito, mo e ta e au e tau tama uluaki oti ha he motu ko Aikupito, ko e tau tagata katoa mo e tau manu; to fakahala foki e au e tau atua oti a Aikupito; ko au ni ko Iehova.
13 Ti eke ni e toto mo fakamailoga kia mutolu ke he tau fale ha i ai a mutolu, ka kitia e au e toto, ti fano leva ai au ia mutolu; ti nakai ha ia mutolu e malaia ke mahakava ai, ka ta e au e motu ko Aikupito.
14 To eke foki e aho nai mo fakamanatuaga kia mutolu, to eke ai e mutolu e galue kia Iehova; to eke galue ke he ha mutolu a tau hau a mui, ko e fakatufono tukulagi.
15 Po fitu ni ke kai ai e mutolu e areto nakai fakaea; ko e aho fakamua ke uta kehe ai e mena ke fakaea aki he tau fale ha mutolu; ha ko e mena ka kai e taha e areto fakaea ke he aho fakamua to hoko ke he aho fitu, to vevehe kehe e tagata ia mo Isaraela.
16 To eke e mutolu e fakapotopotoaga tapu ke he aho fakamua, mo e fakapotopotoaga tapu ke he aho fitu; aua neke eke ai ha gahua taha, ka ko e tau mena ke kai ai he tau tagata oti, ko e tau mena ia hokoia ke eke e mutolu.
17 Kia taofi e mutolu e galue he areto nakai fakaea, ha ko e aho nai ni kua ta mai ai e au ha mutolu a tau kau he motu ko Aikupito, ko e mena ia ke taofi ai e mutolu e aho nai ke he tau hau ha mutolu a mui, ko e fakatufono ia tukulagi.
18 Ko e mahina uluaki, ko e aho hogofulu ma fa he mahina, ko e magaaho afiafi ke kai ai e mutolu a areto nakai fakaea, ato hoko ke he afiafi he aho uafulu ma taha he mahina.
19 Ko e tau aho ia ne fitu aua neke moua ai ha mena ke fakaea aki ke he tau fale ha mutolu, ha ko e mena ka kai ai he taha e areto fakaea, to vevehe kehe e tagata ia mo e fakapotopotoaga a Isaraela, po ke tagata kehe a ia, po ke tagata ne fanau ke he motu.
20 Aua neke kai e mutolu taha areto fakaea; kia kai e mutolu e tau areto nakai fakaea ke he tau mena oti kua nonofo ai a mutolu.
21 Ti ui ai a Mose ke he tau patu oti a Isaraela mo e pehe age kia lautolu, Kia tapaki e mutolu mo e uta e tau mamoe mo e tau magafaoa ha mutolu, ti keli ai e mutolu e paseka.
22 Ti uta foki e mutolu e fuhi hisopo mo e fuifui ke he toto ke he kapiniu, to ta aki e akau fakalava ki luga mo e na pou ua he gutuhala ke he toto ha he kapiniu; aua foki neke hu ki fafo taha ia mutolu ke he gutuhala he hana fale ato hoko ke he pogipogi,
23 Ka haele age a Iehova ke ta Aikupito, ti fioia e ia e toto ha he akau fakalava i luga mo e na pou ua he gutuhala, ti fano leva a Iehova he gutuhala ia, mo e nakai toka a ia ne keli ke hu atu ke he tau fale ha mutolu ke keli a mutolu.
24 Kia taofi e mutolu e mena nai, ko e fakatufono kia koe katoa mo e hau a fanau tukulagi ni.
25 Ka hoko atu a mutolu ke he motu ke foaki mai e Iehova kia mutolu, tuga ne talahau e ia, ti taofi ai e mutolu e fekafekauaga nai.
26 Ka pehe mai e fanau ha mutolu kia mutolu, Ko heigoa kia e kakano he fekafekauaga nai kia mutolu?
27 Ti pehe atu ai a mutolu, Ko e poa he paseka hanai kia Iehova, ko ia ne fano leva he tau fale he fanau a Isaraela i Aikupito, he keli e ia a Aikupito, ka e fakahao ha tautolu a tau fale. Ti tukutuku hifo e motu mo e hufeilo.
28 Ti o atu ai e fanau a Isaraela mo e eke e lautolu tuga ne poaki a Iehova kia Mose mo Arona; ne eke pihia ni e lautolu.
29 Kua hoko ke he tuloto po, ti ta ai e Iehova e tau tama uluaki oti ke he motu ko Aikupito, ko e tama uluaki a Farao kua nofo ke he nofoaiki hana, katoa mo e tama uluaki he tagata holataki ha he fale puipui, katoa mo e tau punua uluaki oti he tau manu.
30 Ti matike ai a Farao ke he po, ko ia ni mo e hana tau fekafekau oti, katoa mo Aikupito oti, ha i ai foki i Aikupito e tagi aue lahi; ha kua nakai fai fale kua noa mo e mate.
31 Ti ui ai a ia kia Mose mo Arona ke he po, mo e pehe mai, Kia matike a, kia o kehe a he haku motu, ko mua ni katoa mo e fanau a Isaraela, ti o a mutolu, fekafekau kia Iehova, tuga ne talahau mai e mua;
32 Kia uta foki ha mutolu a tau fuifui mamoe mo e ha mutolu a fuifui povi, tuga ne talahau mai e mua, ti o na mutolu; kia fakamonuina foki e mua au.
33 Kua fakamakamaka foki he tau tagata Aikupito ke he motu, kia fakaave he toka atu a lautolu ke o kehe mo e motu; ha kua pehe a lautolu, Ko e oti ha ne fai a tautolu he mamate.
34 Ti uta ai he motu ha lautolu a tau lakuaga falaoa ka e nakai la fakaea, katoa mo e ha lautolu a tau kumete ke laku ai e falaoa kua afi ke he tau tapulu ha lautolu ki luga he tau ua ha lautolu.
35 Kua eke foki he fanau a Isaraela tuga ne kupu a Mose, kua ole e lautolu ke he tau Aikupito e tau mena ario, mo e tau mena auro, katoa mo e tau tapulu.
36 Ne fakatupu foki e Iehova e fakaalofa a Aikupito ke he motu, kua ta mai e lautolu e tau mena ne ole atu ai; ti fakanofogati ai e lautolu a Aikupito.
37 Ti fenoga atu e fanau a Isaraela i Ramesi ki Sukota, na ko e ono e teau afe he tau tane malolo ne o, ka e kehe e tau tama.
38 Ne hake foki e tau tagata kehe tokologa fakalataha mo lautolu, katoa mo e tau mamoe, mo e tau povi, ko e tau manu loga lahi ni.
39 Ne tunu foki e lautolu e lakuaga falaoa ne ta mai e lautolu i Aikupito, ko e tau falaoa pukupuku kua nakai fakaea; ha kua nakai fakaea ni, ha kua vegavega a lautolu i Aikupito, ti nakai maeke ke fakamule, ti nakai taute foki ha lautolu a oho.
40 Ko e vaha foki ne nonofo ai e fanau a Isaraela i Aikupito, ko e fa e teau ia he tau tau, ti tolugofulu ni.
41 Kua katoatoa ai e tau tau ne fa e teau mo e tolugofulu, kua hoko ke he aho ia ni, ti o kehe ai e kau oti kana a Iehova he motu ko Aikupito.
42 Ko e po ia ni ke taofi ma Iehova, ha kua ta mai ai e ia a lautolu he motu ko Aikupito; ko e po ia ni ke mailoga ma Iehova he fanau oti a Isaraela ke he tau hau ha lautolu a mui.
43 Kua pehe mai foki a Iehova kia Mose mo Arona, Ko e fakatufono hanai he paseka, aua neke kai ai e taha tagata kehe.
44 Ka ko e tau fekafekau oti he tagata kua fakatau ke he tau tupe, ka peritome a lautolu ti kai ai e lautolu.
45 Ko e tagata paea, mo e fekafekau palepale, aua neke kai ai.
46 Taha ni e fale ke kai ai, aua neke uta ha maga ki fafo ni he fale; aua foki neke fati e tau huimotua.
47 To eke e mena ia e fakapotopotoaga oti kana a Isaraela.
48 Kaeke foki kua nofo ia koe ha tagata kehe, ti fia eke e ia e paseka kia Iehova, kia peritome e tau tane oti kana ha ha ia ia, ka oti ia ti fakatata mai a ia ke eke ai; ti eke a ia poke tagata he motu; ka e aua neke kai e taha kua nakai peritome.
49 Taha ni e fakatufono mo e tagata he motu, mo e tagata kehe ka nofo ia mutolu.
50 Ti eke he tau fanau oti a Isaraela tuga ne poaki a Iehova kia Mose mo Arona, ne eke pihia ni e lautolu.
51 Ko e aho ia ni ne ta mai ai e Iehova e fanau a Isaraela he motu ko Aikupito, ke he tau kau ni ha lautolu.