Esoto 15:1-27
15 TI lologo ai e Mose mo e fanau a Isaraela e lologo nai kia Iehova, kua talahau e lautolu, kua pehe; To lologo au kia Iehova, ha kua kautu ue atu a ia; ko e solofanua mo ia ne heke ai kua palu hifo e ia ke he tahi.
2 Ko Ioha, ko e haku a malolo ia, mo e haku a lologo, kua eke tuai a ia mo fakamouiaga haku; ko e haku Atua hanai, to nava au ki ai; ko e Atua he haku matua, to fakaheke au ki ai.
3 Ko Iehova ko e toa a ia, ko Iehova ko e hana higoa ia.
4 Ko e tau kariota a Farao mo e hana tau kau kua liti e ia ke he tahi; ko e hana tau toa fifili foki kua tomo ke he tahi Kula.
5 Kua ufitia a lautolu he moana, kua hifo a lautolu ke he mena hokulo tuga ne maka.
6 Ko e hau a lima matau, Iehova na e, kua lilifu ia ke he malolo; ko e hau a lima matau, Iehova na e, kua lipilipi a ia ne fai fi mai.
7 Ko e lahi he hau a malolo kua fakaotioti e koe a lautolu ne tutu mai kia koe; kua fakafano atu e koe hau a ita, kua kai ai a lautolu, tuga ne gutugutu saito.
8 Ko e fafagu mai foki he hau a tau pokoihu kua hake ai e tahi tuga ne tumutumu; na tu hake e tau au tahi tuga ne pēpē, na tuli e moana ki loto he tahi.
9 Ne pehe a ia ne fai fi mai, To tutuli e au, to moua ni e au; to tufatufa e au e tau mena fofo mai, to makona ai ni hoku loto; to āki e au haku a pelu, to kelipopo a lautolu he haku lima.
10 Ne fakaagi mai e koe hau a matagi, ti ufitia ai a lautolu he tahi; kua tomo a lautolu tuga ne pulu fana ke he moana lahi.
11 Iehova na e, ko hai kia e taha he tau atua ke tuga na koe? Ko hai kia taha ke tuga na koe, kua lilifu to tapu, kua matakutakuina ke he tau fakahekeaga, kua eke mana?
12 Ne fakaolo e koe hau a lima matau, ti folo fua ai he kelekele a lautolu.
13 Ko e hau a fakaalofa kua takitaki mai e koe e motu nai kua fakamoui ai e koe; ko e hau a malolo kua takitaki mai ai e koe a lautolu ke he hau a haeleaga tapu.
14 To fanogonogo ki ai e tau motu, kua vivivivi a lautolu; kua moua he mamahi a lautolu kua nonofo i Filisitia.
15 Ti fakaatukehe ai e tau patu a Etoma; ko e tau iki a Moapi to moua a lautolu he vivivivi; kua fakalolelole a lautolu oti kana kua nonofo i Kanana.
16 Kua to kia lautolu e hopo ate mo e matakutaku; ha ko e hau a lima malolo kua nakai gahuahua ai a lautolu, tuga ne maka; ato mole age hau a motu Iehova na e, ato mole age e motu nai kua fakafua e koe.
17 To fakahoko atu e koe a lautolu, ti to e koe a lautolu ke he mouga kua eke māu; ko e mena kua taute ai e koe, Iehova na e, ke haele ai a koe; ko e mena tapu, ma Iki na e, kua fakamau he hau a tau lima.
18 Kua eke a Iehova mo patuiki tukulagi tukumuitea.
19 Ha kua hu atu ke he tahi e solofanua a Farao, mo e hana tau kariota, mo e hana tau kau heke solofanua, ti liuaki e Iehova e puke tahi ki luga ia lautolu; ka ko e fanau a Isaraela ne o atu a lautolu ke he hala toka momo ki loto ni he tahi.
20 Ko Miriama e perofeta fifine, ko e mahakitaga a Arona, kua uta e ia e topa ke he hana lima kua o atu foki e tau fifine oti kua mumui atu kia ia mo e tau topa mo e koli ni.
21 Kua tali atu e Miriama kia lautolu, Kia lologo a mutolu kia Iehova, ha kua kautu ue atu a ia; ko e solofanua mo ia ne heke ai, kua palu hifo e ia ke he tahi.
22 Ti toka ai e Mose mo Isaraela e tahi Kula, kua hohoko atu ke he tutakale ko Sura; kua o a lautolu po tolu ke he tutakale, ka e nakai moua ha vai.
23 Kua hoko foki a lautolu ki Mara; ka e nakai maeke ke inu e lautolu e tau vai i Mara, ha kua kona ni; ko e mena ia ne higoa ai e mena ia ko Mara.
24 Ti loma ai e motu kia Mose, kua pehe, To inu ha ha e mautolu?
25 Ti tagi atu ai a ia kia Iehova, ti fakakite e Iehova kia ia e akau; kua liti e ia ke he vai, ti humelie ai e vai; kua tuku atu e ia kia lautolu ke he mena ia e fakatufono mo e fakafiliaga, kua kamatamata foki e ia a lautolu ke he mena ia.
26 Ti pehe mai a ia, Kaeke ke fanogonogo fakamakutu a koe ke he tau kupu a Iehova hau a Atua, mo e mahani tonu a koe ki mua hana, ka fakateliga foki a koe ke he hana tau poaki mo e omaoma a koe ke he hana tau fakatufono oti, ti nakai tuku atu e au kia koe e taha he tau gagao oti ne tuku atu e au ke he tau tagata Aikupito; ha ko au ni ko Iehova kua fakamalolo a koe.
27 Ti hohoko ai a lautolu ki Ailima, ha i ai hogofulu ma ua e vaipuna, mo e tau pama ne fitugofulu; kua he api a lautolu tata age ke he tau vai.