Esoto 17:1-16
17 KUA o e fakapotopotoaga oti he fanau a Isaraela mai he tutakale ko Sina, kua o a lautolu fakalata ke he kupu a Iehova, ti he api a lautolu i Refiti; nakai toka ai ha vai ke inu ai e motu.
2 Ti fetoko atu e motu kia Mose, kua pehe atu a lautolu, Ta mai la ha vai ke inu ai e mautolu. Ti pehe mai ai a Mose kia lautolu, Ko e ha ne fetoko mai ai e mutolu kia au? Ko e heigoa e mena kua kamatamata ai e mutolu kia Iehova?
3 Ti fia inu e motu ke he mena ia, ti loma ni e motu kia Mose, kua pehe a lautolu, ne ta mai mo ha e koe a mautolu i Aikupito ke kelipopo a mautolu, mo e ha mautolu a fanau, mo e ha mautolu a tau manu he fia inu?
4 Ti tagi atu ai a Mose kia Iehova, kua pehe atu, To eke ha e au ke he motu nai, toe tote ti tauliti maka mai e lautolu au?
5 Ti pehe mai a Iehova kia Mose, Kia fano a koe ki mua he motu, ti uta e koe e falu a patu Isaraela; kia uta foki ke he hau a lima e tokotoko hau ne ta aki e koe e vailele, ti fano a koe.
6 Kitiala, to tu au ki mua hau ki luga he kaumaka i Horepa; ti ta e koe e kaumaka, ti hau ai e vai ke inu ai e motu. Ti eke ai pihia e Mose ki mua he tau patu a Isaraela.
7 Kua fakahigoa e mena ia ko Masa, mo Meripa ni, ha ko e taufetoko he fanau a Isaraela, mo e ha lautolu a kamatamata kia Iehova, kua pehe, Ha ha ia tautolu a Iehova, po ke nakai?
8 Ti o mai a Amaleka, kua tau mo Isaraela i Refiti.
9 Ti pehe mai a Mose kia Iosua, Kia fifili e koe ma tautolu e falu a tagata, ti o a mutolu ke tau mo Amaleka; a pogipogi to tu ai au ke he tapunu matiketike, mo e tokotoko he Atua ke he hoku lima.
10 Ti eke ni e Iosua tuga ne vagahau a Mose kia ia ke tau mo Amaleka; ne hake foki a Mose, mo Arona, mo Huro ke he tapunu matiketike.
11 Ka nikiti ki luga e Mose hana lima, ti kautu ai a Isaraela; ka tuku hifo hana lima, ti kautu ai a Amaleka.
12 Ti kua mamafa e tau lima a Mose, ti uta e laua e maka, kua tuku ki lalo hana, ti nofo ai a ia; ka ko Arona mo Huro ne toto hake e laua hana tau lima, ko e taha ke he taha fahi ka e taha ke he taha fahi; ti mau ai hana tau lima ato to e la.
13 Kua tutuli foki e Iosua a Amaleka mo e hana tau tagata ke he pelu.
14 Ti pehe mai a Iehova kia Mose, Kia tohi e mena nai ke he tohi mo fakamanatuaga ti fakamatala kia Iosua, ha ko e mena holoholo kehe e au e fakamanatuaga kia Amaleka mai he lalolagi.
15 Ti ati ai e Mose e fatapoa mo e fakahigoa ai, KO IEHOVA-NISI.
16 Kua pehe a ia, Ha kua nikiti e lima ke he nofoaiki a Ioha, to tau a Iehova mo Amaleka ke he taha hau mo e taha hau.