Esoto 18:1-27
18 KUA logona e Ieteru ko e ekepoa a Mitiana, ko e matua fugavai a Mose e tau mena oti ne eke he Atua kia Mose mo Isaraela hana motu, ha kua ta mai e Iehova a Isaraela i Aikupito;
2 Ti uta ai e Ieteru ko e matua fugavai a Mose e hoana a Mose ko Sipora, ha kua liuaki atu fakamua a ia,
3 Mo e hana na tama tane tokoua, ko e higoa he taha ko Keresoma ia, ha kua pehe a ia, Ko e tagata paea au ke he motu kehe;
4 Ka ko e higoa he taha ko Elisara ia, ha kua pehe a ia, Ko e Atua he haku matua, ko e haku a lagomatai ia, kua laveaki foki e ia au mai he pelu a Farao.
5 Ti kua o a Ieteru e matua fugavai a Mose, mo e hana na tama tane, mo e hana hoana, kua o kia Mose ke he tutakale, ke he mena ne he api ai ke he mouga he Atua.
6 Ti pehe mai a ia kia Mose, Ko au nai ko Ieteru e matua fugavai hau, kua o mai tuai a mautolu kia koe, ko mautolu ni, mo e hoana hau, mo e na tama tokoua hau kua fakalataha mo ia.
7 Ti fina atu ai a Mose ke fonofono hana matua fugavai, kua tukutuku hifo kia ia, ti figita na laua; kua feofanaki a laua, ti o age ai ke he fale ie.
8 Kua talatala e Mose ke he hana matua fugavai e tau mena oti ne eke e Iehova kia Farao mo Aikupito, ha ko Isaraela, mo e ha lautolu a tau matematekelea oti ke he magahehala, ka e laveaki ni e Iehova a lautolu.
9 Ti fiafia ai a Ieteru ha ko e tau mena mitaki oti kana ne eke e Iehova ma Isaraela, he laveaki e ia a lautolu mai he lima a Aikupito.
10 Na pehe mai foki a Ieteru, Fakaaue a kia Iehova, ko ia ne laveaki a mutolu mai he lima a Aikupito, mai he lima foki a Farao, ko ia ne laveaki hana motu mai he lima a Aikupito.
11 Hanai, kua iloa e au kua mua a Iehova ke he tau atua oti kana; ha ko e mena ne fakatokoluga ai a lautolu, kua kautu ai a ia kia lautolu.
12 Ne eke foki e Ieteru e matua fugavai a Mose e poa huhunu mo e tau poa ke he Atua; ti o age ai a Arona mo e tau patu oti a Isaraela ke kai mena fakalataha mo e matua fugavai a Mose ki mua he Atua.
13 Kua hoko ke he pogipogi ti nofo ai a Mose ke fakafili e motu; ti tutu mai e motu ki mua a Mose, kua kamata he mogoho pogipogi ti hoko ni ke he afiafi.
14 Kua kitia he matua fugavai a Mose e tau mena oti ne eke e ia ke he motu, ti pehe mai a ia, Heinoa e mena ia kua eke e koe ke he motu? Ko heigoa e mena ne nofo tokotaha ai a koe, ka e tutu mai e motu oti ki mua hau kua kamata he mogoho pogipogi ti hoko ke he afiafi?
15 Ti pehe atu a Mose ke he hana matua fugavai, Ko e mena o mai e motu kia au ke kumi ke he Atua.
16 Ka ha i ai ia lautolu ha mena, ti o mai ni a lautolu kia au; ti fakafili e au e mena he taha tagata mo e taha tagata, ti fakailoa atu foki e au ki ai e tau poaki he Atua mo e hana tau fakatufono.
17 Ti pehe mai e matua fugavai a Mose kia ia, Kua nakai mitaki e mena kua eke e koe.
18 Ko e mate pipili ne fai a koe, katoa mo e tau tagata nai kua fakalataha mo koe; ha kua mamafa ue atu e mena ia kia koe, nakai fahia a koe eke tokotaha.
19 Hanai, kia fanogonogo mai a koe kia au, to fakatonu atu e au kia koe, ti ha i ai e Atua ia koe, kia eke a koe mo hulalo mo e motu ki mua he Atua, ti fakahoko atu ha lautolu a tau kupu ke he Atua.
20 To fakamaama atu foki e koe a lautolu ke he tau poaki mo e tau fakatufono, ti fakakite e koe kia lautolu e puhala ke o ai a lautolu, mo e tau mahani ke eke e lautolu.
21 Kia fifili foki e koe mai he motu oti e tau tagata malolo, kua matakutaku ke he Atua, ko e tau tagata fakamoli, kua vihiatia e velevelemena; ti kotofa e koe a lautolu ke pule kia lautolu, ke eke mo tau iki he takiafe, mo tau iki he takiteau, mo tau iki he takilimagofulu, mo tau iki he takihogofulu;
22 Ti fakafili e lautolu ni e motu ke he tau aho oti; ka ko e tau mena lalahi oti to ta mai ia kia koe, ka e fakafili e lautolu e tau mena oti kua ikiiki; ti fakamama ai kia koe, to lagomatai a lautolu kia koe.
23 Kaeke ke eke e koe e mena ia, ka poaki pihia foki he Atua kia koe, ti fahia ai a koe ke tumau; ko e motu oti nai foki, to o atu a lautolu ke he tau mena kua nonofo ai mo e monuina.
24 Kua fanogonogo a Mose ke he matua fugavai hana, mo e eke e tau mena oti ne tala mai e ia.
25 Ti fifili ai e Mose e tau tagata malolo mai ia Isaraela oti kana, ti kotofa a lautolu ke pule ke he motu, ko e tau iki he takiafe, ko e tau iki he takiteau, ko e tau iki he takilimagofulu, mo e tau iki he takihogofulu.
26 Kua fakafili e lautolu e motu ke he tau aho oti, ko e tau mena uka kua uta kia Mose, ka ko e tau mena ikiiki oti, kua fakafili e lautolu ni.
27 Ti toka ai e Mose hana matua fugavai ke fano; ti fano ai a ia ke he hana motu.