Esoto 19:1-25
19 KO e mahina ne tolu tali he o mai ai e fanau a Isaraela he motu ko Aikupito, ko e aho ia ni ne hoko ai a lautolu ke he tutakale ko Sinai.
2 Ha kua o mai tuai a lautolu i Refiti, mo e hohoko atu a lautolu ke he tutakale ko Sinai; ti kua he api a lautolu ke he tutakale, kua he api ai a Isaraela ki mua he mouga.
3 Ti hake ai a Mose ke he Atua; ti ui mai e Iehova kia ia mai he mouga, kua pehe mai, Kia vagahau a koe ke he faoa a Iakopo, mo e tala age ke he fanau a Isaraela, kia pehe age,
4 Ne kitia e mutolu e tau mena ne eke e au i Aikupito, ne uta e au a mutolu ki luga he tau tapakau aeto, ne ta mai foki e au a mutolu kia au ni.
5 Hanai, kaeke ke fanogonogo fakamakutu a mutolu ke he haku tau kupu mo e omaoma ke he haku a maveheaga, ti eke ni a mutolu mo koloa uho maku, ke mua ke he tau motu oti, ha ko e haku ni e lalolagi oti.
6 To eke ni a mutolu maku mo kautu he tau ekepoa, mo e motu tapu; ko e tau kupu ia ke vagahau atu e koe ke he fanau a Isaraela.
7 Ti fano a Mose mo e ui atu ke he tau patu he motu, ti tuku atu e ia ki mua ha lautolu e tau kupu oti ia ne poaki mai ai e Iehova.
8 Ti tali atu e motu oti fakalataha, kua pehe atu, Ko e tau mena oti ne tala mai e Iehova, to eke ni e mautolu; ti uta e Mose e tau kupu he motu kia Iehova.
9 Ti pehe mai a Iehova kia Mose, Kitiala, ko e fina atu ne fai au kia koe ke he aolagi uli, kia logona ai he motu ka vagahau atu au kia koe, kia talia foki e lautolu a koe tukulagi. Ne tala age foki e Mose e tau kupu he motu kia Iehova.
10 Kua pehe mai foki a Iehova kia Mose, Kia fano a koe ke he motu, mo e fakatapu e koe a lautolu ke he aho nai mo a pogipogi, kia unu foki e lautolu ha lautolu a tau tapulu;
11 Kia nonofo tauteute foki a lautolu ato anoiha; ha ko anoiha ke hifo ai a Iehova ki mua he motu oti ke he mouga ko Sinai.
12 Kia eke foki e koe e katofia mo e motu ke takai aki, mo e pehe age a koe, A mutolu, neke hake a mutolu ke he mouga, aua foki neke piki atu ke he kala he mouga; kaeke ke piki e taha ke he mouga, ti matepopo ni a ia.
13 Aua neke piki atu ha lima kia ia, ka e pini ni ke he tau maka, po ke fana ni ke he tau fana, po ke manu po ke tagata, nakai ni moui a ia. Ka ulo fakaloa e pu, ti o hake ai a lautolu ke he mouga.
14 Ti hifo mai a Mose he mouga ke he motu, kua fakatapu e ia e motu, ti unu e lautolu ha lautolu a tau tapulu.
15 Ti pehe mai a ia ke he motu, Kia nonofo tauteute a ato anoiha; ua fakatata ke he tau hoana ha mutolu.
16 Kua hoko ke he aho tolu ke he magaaho pogipogi, ti ha i ai i luga he mouga e tau pakulagi, mo e tau uhila, mo e aolagi uli, ko e leo foki he pu kua lahi mahaki ia; ti vivivivi ai e motu oti ha he heaga api.
17 Ti uta ai e Mose e motu mai he heaga api kia feleveia a lautolu mo e Atua; ti tutu ai a lautolu ki lalo he mouga.
18 Ko e mouga foki ko Sinai kua ahua oti ia, ha kua hifo ki ai a Iehova ke he afi; kua hake e ahua tuga ne ahua he gutuumu; ti kua vivivivi lahi ni e mouga oti.
19 Ko e leo foki he pu kua lahi mo lahi ia; kua vagahau atu a Mose, ti tali mai ai e Atua kia ia ke he leo.
20 Ti haele hifo a Iehova ke he mouga ko Sinai, ke he tapunu mouga; kua ui mai foki e Iehova kia Mose ke hake ke he tapunu mouga, ti hake ai a Mose.
21 Ti pehe mai a Iehova kia Mose, Hifo a koe, hataki e motu neke feoho mai ke kitekite kia Iehova, ti mamate ai e tokologa ia lautolu.
22 Ko e tau ekepoa foki kua fakatata atu kia Iehova, kia fakatapu e lautolu a lautolu neke oho atu a Iehova kia lautolu.
23 Ka e pehe atu a Mose kia Iehova, Kua nakai maeke e motu ke hake mai ke he mouga ko Sinai, ha ko koe ni ne fekau a mautolu, kua pehe mai, Kia katofia e mutolu e mouga, mo e fono ai.
24 Ti pehe mai a Iehova kia ia, Fano a, ti hifo, to o mai a mua mo Arona fakalataha mo koe; ka ko e tau ekepoa mo e motu, aua neke feoho mai a lautolu ke hake mai kia Iehova, neke oho atu a ia kia lautolu.
25 Ti hifo ai a Mose ke he motu mo e vagahau atu kia lautolu.