Esoto 20:1-26
20 TI vagahau mai e Atua ke he tau kupu oti nai, kua pehe mai.
2 Ko au ko Iehova hau a Atua ne ta mai a mutolu he motu ko Aikupito, ko e mena ne nonofo fakatupa ai;
3 Aua neke eke e koe māu e tau atua kehe hoku mua.
4 Aua neke eke e koe māu ha tupua kua ta, po ke taha fakatai he taha mena ha he lagi i luga, po ke ha he fonua i lalo, po ke ha he tahi i lalo he fonua;
5 Aua neke hufeilo a koe ki ai, aua foki neke fekafekau ki ai; ha ko au ko Iehova hau a Atua, ko e Atua ita tafua au, to taui atu e au ke he fanau e mahani hepehepe he tau matua ha lautolu, ke hoko ke he hau ne tolu mo e fa ha lautolu kua fakavihia au;
6 Ka e fakaalofa au ke he afe he tau hau ha lautolu kua fakaalofa kia au, mo e omaoma ke he haku a tau poaki.
7 Aua neke totoku teao e higoa a Iehova hau a Atua; ha kua nakai toka noa e Iehova a ia kua totoku teao hana higoa.
8 Kia manatu e aho sapati ke fakatapu ai.
9 Ono ni e aho ke gahua ai a koe, mo e eke ai hau a tau gahua oti kana;
10 Ka ko e aho fitu ko e sapati haia kia Iehova hau a Atua; aua neke eke ai e koe ha gahua taha, ko koe, mo e hau a tama tane, mo e hau a tama fifine, ko e hau a fekafekau tane, mo e hau a fekafekau fifine, ko e hau a tau manu foki, mo e tagata kehe kua nofo mo koe.
11 Ha ko e mena ono ni e aho ne eke ai e Iehova e lagi, mo e lalolagi, katoa mo e tahi, mo e tau mena oti ha ha i ai, ti okioki ai a ia ke he aho fitu; ko e mena ia ne fakamonuina ai e Iehova e aho sapati mo e fakatapu ai.
12 Kia fakalilifu a koe ke he hau a matua tane, mo e hau a matua fifine kia loga ai hau a tau aho ke he motu kua foaki mai e Iehova hau a Atua kia koe.
13 Aua neke kelipopo tagata a koe.
14 Aua neke faivao a koe.
15 Aua neke kaiha a koe.
16 Aua neke fatipiko a koe ke he taha tagata.
17 Aua neke manako a koe ke he fale he taha tagata, aua neke manako a koe ke he hoana he taha tagata, po ke hana fekafekau tane, po ke hana fekafekau fifine, po ke hana povi, po ke hana asini, po ke taha mena kehe he taha tagata.
18 Kua kitia he motu oti e tau pakulagi, mo e tau uhila, mo e leo he pu, mo e mouga kua ahua, kua kitia ai he motu ti vivivivi mo e tutu mamao atu.
19 Ti pehe atu a lautolu kia Mose, Kia vagahau mai a koe kia mautolu, ti fanogonogo ai a mautolu; ka e aua neke vagahau mai e Atua kia mautolu neke mamate a mautolu.
20 Ti pehe mai a Mose ke he motu, Ua matakutaku a mutolu, ha kua haele mai e Atua ke kamatamata a mutolu, kia ha ia mutolu e matakutaku kia ia, kia nakai hala a mutolu.
21 Ti tutu mamao atu e motu, ka e fakatata atu a Mose ke he mena pouli ha i ai e Atua.
22 Kua pehe mai foki a Iehova kia Mose, Kia tala age pehe a koe ke he fanau a Isaraela, Kua kitia tuai e mutolu kua vagahau e au kia mutolu mai he lagi;
23 Aua neke eke e mutolu e tau atua ario ke lafilafi kia au, aua foki neke eke e mutolu e tau atua auro ma mutolu.
24 Kia eke e koe e fatapoa kelekele maku, ti eke poa ai e koe ki luga hana, ko e hau a tau poa huhunu, mo e hau a tau poa fakaaue, ko e hau a tau mamoe mo e hau a tau povi; ko e tau mena oti ke fakailoa e au haku a higoa, to fina atu ai au kia koe, mo e fakamonuina ai e au a koe.
25 Kaeke ke ati e koe e fatapoa maka maku, aua neke ati e koe ke he tau maka tātā, ha ko e mena ka fakahoko e koe hau a tofi ki ai, ti kelea ai ia ha ko koe.
26 Ti ua hake a koe ke he hala poke papahi ke he haku fatapoa, neke toka noa ai hau a kakano.