Esoto 25:1-40
25 KUA vagahau mai e Iehova kia Mose, kua pehe mai,
2 Tala age e koe ke he fanau a Isaraela, kia ta mai e lautolu e poa kia au; takitaha e tagata mo e mena kua makai ki ai hana a loto, ke talia mai ai e mutolu e poa maku.
3 Ko e poa foki hanai ke talia ai e mutolu mai ia lautolu, ko e auro, mo e ario, mo e apa kula,
4 Mo e mena uli, mo e kula uhi, mo e kula momoho, mo e ie lino, mo e tau fulu koti,
5 Mo e tau kili mamoe tane kua vali kula, mo e tau kili takesa, mo e akau ko e sitima;
6 Ko e puke lolo ke puho, ko e tau mena manogi ke fakamanogi aki e lolo ke uku, ke eke aki foki e tau mena manogi mitaki ke huhunu;
7 Ko e tau maka soama mo e tau maka ke taute aki e efota, mo e ufi fatafata.
8 Kia eke foki e lautolu e faituga maku, ti nofo ai au ia lautolu;
9 Tuga ne tau mena oti ke fakakite atu e au kia koe, ko e fakatai he faituga, mo e fakatai he hana tau mena oti, kia eke pihia ni e mutolu.
10 Kia eke foki e lautolu e puha ke he akau ko e sitima; ua e kupita mo e hafa kupita hana loa, ko e kupita mo e hafa kupita hana laulahi, ko e kupita mo e hafa kupita hana tokoluga.
11 Kia fakakili aki foki e koe ke he auro mitaki, ko loto mo tua ke fakakili aki e koe; kia eke foki e koe ki luga hana e fakapiki auro ke takai aki.
12 Kia tunu foki e koe e auro ke eke aki fa e veli, ti tuku ai e koe ke he hana tau kaniva ne fa; tuku ua e veli ke he taha fahi, ti ua foki e veli ke he taha fahi.
13 Ti eke e koe e tau akau tauloto ke he akau sitima, mo e fakakili aki he auro;
14 Ti humaki e koe e tau akau tauloto ke he tau veli ke he tau fahi he puha, ke tauloto aki e puha.
15 Ti toka fakaoti ni e tau akau tauloto ke he tau veli he puha, aua neke uta kehe.
16 Ti tuku ni e koe ki loto he puha e fakatufono ke ta atu e au kia koe.
17 Kia eke foki e koe e haeleaga he fakaalofa noa ke he auro mitaki; ua e kupita mo e hafa kupita hana loa, ti taha e kupita mo e hafa kupita hana laulahi.
18 Ti eke foki e koe ua e kerupi ke he auro, kia ta fakapolopolo, mai he na potu ua he haeleaga he fakaalofa noa.
19 Kia eke taha kerupi ke he taha potu, mo e taha kerupi ke he taha potu; ko e mena taha ke eke aki e haeleaga he fakaalofa noa mo e tau kerupi ke he hana tau potu ne ua.
20 To fofola foki he tau kerupi ha laua a tau tapakau ki luga, ke fakamalu aki e haeleaga he fakaalofa noa ke he tau tapakau ha laua; to fakafehagao aki ha laua a tau mata; to hagao atu e tau mata he tau kerupi ke he haeleaga he fakaalofa noa.
21 Kia fakatoka foki e koe e haeleaga he fakaalofa noa ki luga he puha; ti tuku ni e koe ki loto he puha e fakatufono ke ta atu e au kia koe;
22 To feleveia a taua mo au ke he mena ia, ti vagahau atu ai au kia koe mai luga he haeleaga he fakaalofa noa, mai he vaha he na kerupi ua ha i luga he puha he fakatufono, ke he tau mena oti ke poaki ai e au ke he fanau a Isaraela ia koe.
23 Kia eke foki e koe e laulau ke he akau ko e sitima; ua ni e kupita hana loa, ti taha e kupita hana laulahi, ti taha e kupita mo e hafa kupita hana tokoluga.
24 Ti fakakili e koe ke he auro mitaki, ti eke ni ki ai e fakapiki auro ke takai aki.
25 Kia eke foki hana fahi hagatike taha ke takai aki, ti eke foki e kaniva auro ke he hana fahi ke takai aki.
26 Ti eke e koe e tau veli auro ne fa, ti tuku e tau veli takitaha ke he tau hika ne fa, ke he hana tau hui ne fa,
27 Kia fakatata foki e tau veli ke he fahi, ke eke mo mena ke tuku ai e tau akau tauloto ke tauloto aki e laulau.
28 Ti eke e koe e tau akau tauloto ke he akau ko e sitima, mo e fakakili aki ke he auro, ke tauloto aki e laulau.
29 Ti eke e koe hana tau kapiniu lapalapa, mo e hana tau kapiniu, mo e hana tau kumete, mo e hana tau kapiniu ahu, ke liligi ki ai; kia eke e koe e tau mena ia ke he auro mitaki.
30 Ti fakatokatoka e koe ki luga he laulau e tau areto fakatokatoka i mua, kia nakai noa he ha i ai ki mua haku.
31 Kia eke foki e koe e fakatuaga lamepa ke he auro mitaki, ti eke ai e koe e fakatuaga lamepa kia lakuina; ko e hana hui, mo e hana tau la, mo e hana tau kapiniu fakapolopolo, ko e hana tau tepu, mo e hana tau fiti kia eke oti e koe ke he mena ia ni.
32 To o atu ono e la he hana tau fahi, tolu e la he fakatuaga lamepa ke he taha fahi, ti tolu e la he fakatuaga lamepa ke he taha fahi.
33 Tolu e kapiniu fakapolopolo tuga ne sikati, ko e tepu foki katoa mo e fiti ke he taha la; ti tolu e kapiniu fakapolopolo tuga ne sikati ke he taha la, mo e tepu katoa mo e fiti; kia pihia ni ke he tau la ne ono ka o atu he fakatuaga lamepa.
34 Ha i ai foki ke he fakatuaga lamepa fa e kapiniu fakapolopolo tuga ne sikati, ko e hana tau tepu mo e hana tau fiti;
35 Ko e tepu foki ki lalo he hana na la ne ua, mo e tepu ki lalo he hana na la ne ua, mo e tepu ki lalo he hana na la ne ua; ke lata mo e tau la ne ono ne o atu he fakatuaga lamepa.
36 Ko e hana tau tepu mo e hana tau la ke eke aki he mena taha; to eke oti kana ke he auro taha kua mitaki mo e laku.
37 Ti eke foki e koe hana tau lamepa ne fitu, to fakatoka e ia hana tau lamepa ki luga ke fakamaama aki ki mua hana.
38 Ti eke foki hana tau helehele vavae, mo e hana tokaaga helehele vavae ke he auro mitaki;
39 To eke ni he taleni auro mitaki, katoa mo e tau mena oti na.
40 A koe ni, neke nakai eke e koe ke tuga e fakatai ne fakakite kia koe ke he mouga.