Esoto 27:1-21
27 TI eke e koe e fatapoa ke he akau, ko e sitima, lima ni e kupita e loa, ti lima e kupita e laulahi, kia fakafahifa tatai e fatapoa, ti tolu ni e kupita e tokoluga.
2 Kia eke e koe hana tau hoe ki luga he hana tau hika fata ne fa, kia eke ke he mena ia ni hana tau hoe, ti fakakili aki e koe ke he apa kula.
3 Ti eke foki hana tau kumete mo e efuefu afi, mo e hana tau aku, mo e hana tau kapiniu, mo e hana tau huki, mo e hana tau mena uta afi; ko e hana tau mena oti kia eke e koe ke he apa kula.
4 Ti eke e koe hana tokaaga afi ke pūpū poke kupega ke he apa kula; ti eke foki e koe ki luga he mena pūpū e tau veli apa kula ne fa, ke he hana tau hika ne fa;
5 Ti tuku ai e koe ki lalo hifo he kala ki loto he fatapoa, ti hoko e mena pūpū ke he lotoga he fatapoa.
6 Kia eke foki e koe e tau akau tauloto mo e fatapoa, ko e tau akau tauloto he akau ko e sitima, ti fakakili aki he apa kula.
7 To humaki e tau akau tauloto ke he tau veli, to ha i ai e tau akau tauloto ke he na fahi ua he fatapoa ke tauloto aki.
8 Kia eke ni ke he tau lapa ke takōkō, tuga ne fakakite kia koe ke he mouga, kia eke pihia e lautolu.
9 Kia eke foki e koe e pa he faituga, ke he fahi toga, ke hagao atu ki toga, ko e puipui ie mo e pa, ko e ie lino kua filo tua tote, taha ni e teau kupita e loa ke he taha fahi;
10 Ko e hana tau pou foki ne uafulu, mo e tau fakalago ha lautolu ne uafulu ni to eke ia ke he apa kula; ka ko e tau fao he tau pou, mo e tau fakalava pou, kia eke ia ke he ario.
11 Ti pihia foki e fahi tokelau ke he hana a loa, ko e taha teau kupita ia he loa he puipui ie, ko e hana tau pou foki ne uafulu, mo e tau fakalago ha lautolu kua eke aki he apa kula, uafulu ni; ka ko e tau fao he tau pou, mo e tau fakalava pou kua eke ke he ario.
12 Ko e laulahi foki he pa ke he fahi lalo, ko e puipui ie ko e limagofulu ni e tau kupita e loa, ko e tau pou ha lautolu ne hogofulu, mo e ha lautolu a tau fakalago ne hogofulu.
13 Ko e laulahi foki he pa ke he fahi uta, kua hagao atu ki uta, ko e limagofulu ni e kupita.
14 Ko e puipui ie ne hogofulu ma lima e kupita mo e taha fahi he gutuhala; ko e tau pou ha lautolu ne tolu, mo e tau fakalago ha lautolu ne tolu.
15 Ha i ai foki ke he taha fahi gutuhala e puipui ie hogofulu ma lima e kupita, ko e tau pou ha lautolu ne tolu, mo e tau fakalago ha lautolu ne tolu.
16 Ti taha foki e ie puipui mo e gutuhala he pa uafulu ni e kupita e loa, ko e mena uli, mo e kula uhi, mo e kula momoho, mo e ie lino kua filo tua tote, ko e gahua he tufuga tuitui mena; ko e ha lautolu a tau pou ne fa, mo e ha lautolu a tau fakalago ne fa.
17 Ko e tau pou oti kua takai aki e pa, to tutaki ia ke he ario, to ario foki e tau fao ha lautolu, ka ko e tau fakalago ha lautolu to apa kula ia.
18 Ko e loa he pa, taha teau e kupita ia, ko e laulahi foki limagofulu e kupita ia ke he tau mena oti, ko e tokoluga foki lima e kupita ia he ie lino kua filo tua tote; ko e tau fakalago pou foki ko e apa kulu ia.
19 Ko e tau kapiniu oti kana he faituga kua eke aki hana tau fekafekauaga oti kana, mo e hana tau fao oti kana, katoa mo e tau fao oti he pa, ko e apa kula e tau mena ia.
20 Kia poaki atu e koe ke he fanau a Isaraela, kia ta mai e lautolu kia koe e puke lolo olive tavana kua tukituki, mo afi ni kia puho mai ai e lamepa,
21 Ke he fale uta fano he tutuutaga ke he fahi mai nai he puipui ie, ha i mua he puha he fakatufono; kia taute ai e Arona mo e hana tau tama tane, ke kamata mai he mogoho afiafi ato hoko ke he mogoho pogipogi ki mua ni a Iehova; ke eke ia mo fakatufono tukulagi ke he fanau a Isaraela ke he tau hau ha lautolu a mui.