Esoto 28:1-43
28 KIA uta e koe mai he fanau a Isaraela hau a matakainaga ko Arona, mo e hana tau tama tane fakalataha mo ia, kia eke a lautolu mo tau ekepoa maku, ko Arona, ko Natapu mo Avihu, ko Eleasaro mo Itamaro, ko e fanau a Arona.
2 Ti eke e koe e tau tapulu tapu mo e hau a matakainaga ko Arona, ke lilifu ai mo e fulufuluola ai.
3 Kia fakamatala atu e koe kia lautolu oti kua iloilo, ko lautolu kua fakapuke e au ke he loto iloilo, kia eke e lautolu e tau tapulu ma Arona kia fakatapu ai a ia, kia eke ai a ia mo ekepoa kia au.
4 Ko e tau tapulu hanai ke eke e lautolu, ko e ufi fatafata, mo e efota, mo e tapulu loa, mo e tapulu loto kua tuitui fakafulufuluola, mo e potiki ie, mo e pipi; kia eke e lautolu e tau tapulu tapu ma Arona e matakainaga hau, katoa mo e hana tau tama tane, kia eke a lautolu mo tau ekepoa kia au.
5 Kia uta e lautolu e auro, mo e mena uli, mo e kula uhi, mo e kula momoho, mo e ie lino;
6 Kia eke e lautolu e efota ke he auro mo e mena uli, mo e kula uhi, ko e kula momoho, mo e ie lino kua filo tua tote ko e gahua he tufuga lalaga ie.
7 Ua ni e tukeua ke tataki aki ke he na kala ua, kia fakalataha ai.
8 Ko e pipi foki he efota ha i luga hana, ke tuga e gahua ha i ai, to eke ke he tau mena ia, ko e auro, mo e mena uli, mo e kula uhi, mo e kula momoho, mo e ie lino kua filo tua tote.
9 Kia uta foki e koe ua e maka soama, mo e ta i ai e tau higoa he fanau a Isaraela;
10 Ono e higoa ha lautolu ke he taha maka, ti ono e higoa kua toe ke he taha maka, fakalata ke he fanauaga ha lautolu.
11 Ko e gahua he tufuga ta maka, tuga ne ta e tau maka fakamau fakamailoga kia ta ai e koe e tau higoa he fanau a Isaraela ke he tau maka ua ia, kia eke ai e koe mo e fakakala aki ke he auro.
12 Ti tuku e koe e na maka ua ki luga he tukeua he efota, ko e tau maka ke manatu ai ke he fanau a Isaraela; to uta ni e Arona e tau higoa ha lautolu ki mua a Iehova, ke he hana tau tukeua ne ua ke manatu ai.
13 Kia eke foki e koe e tau fakakala auro;
14 Mo e ua e fakave auro mitaki kua fili, kia eke ai e koe tuga ne tau mena fa fili, ti fakamau e tau fakave auro fili ke he mena ne fakakala aki.
15 Ti eke ni e koe e ufi fatafata he fakafiliaga ke he gahua he tufuga lalaga ie, tuga ne gahua ke he efota kia eke ai pihia; ti eke ni ke he auro, mo e mena uli, mo e kula uhi, mo e kula momoho, mo e lino kua filo tua tote.
16 Ti eke fakafahifa tatai kua pepelu ua, ko e hagatike hana loa, ko e hagatike foki hana laulahi.
17 Ti tuku ai e koe e tau tokaaga maka ke fa e atu maka; ko e atu fukamua ko e salikea, ko e topasi, mo e pereketa, ko e atu fakamua ia.
18 Ko e atu ua, ko e nofeka, ko e safaira, mo e ialoma.
19 Ko e atu tolu, ko e lesema, ko e sivo, mo e aselama.
20 Ko e atu fa, ko e tasisa, mo e soama, mo e iasepi; kia ha i ai ke he fakakala auro mo e ha lautolu a tau tokaaga maka,
21 Kia ha i ai ke he tau maka e tau higoa he fanau a Isaraela, ne hogofulu ma ua fakalata ke he tau higoa ha lautolu, ke tuga ne fa ta e fakamau fakamailoga, ke takitaha mo e hana higoa, fakalata ko he tau magafaoa hogofulu ma ua.
22 Ti eke foki e koe ki luga he ufi fatafata, e tau fakave auro mitaki kna fili, tuga ne fa fili mena.
23 Ti eke foki ki luga he ufi fatafata ua e veli auro, ti tuku e na veli ua ke he tau mata potu ne ua he ufi fatafata.
24 Ti tuku e koe e na fakave auro ua ke he na veli ua ha he tau mata potu he ufi fatafata.
25 Ti tuku foki e koe e tau potu ne ua he na fakave auro ua, ke he na fakakala auro ua, ti tuku ni ke he na tukeua he efota ha i mua hana.
26 Ti eke foki ua e veli auro, mo e tuku e koe ke he na potu ua he ufi fatafata ke he kala hana, kua hagao ke he efota i loto.
27 Ti ua foki e veli auro ke eke e koe, mo e tuku ai ke he na fahi ua he efota ki lalo, ke he fahi i mua, ke tata mo e tutakiaga ki luga he pipi he efota.
28 Kia lili foki e lautolu e ufi fatafata ke he hana tau veli ke he tau pu he efota ke he afo uli, kia ha i ai i luga he pipi he efota, neke fano kehe e ufi fatafata mo e efota.
29 To uta foki e Arona e tau higoa he fanau a Isaraela ke he ufi fatafata he fakafiliaga ke he hana fatafata ka hu atu a ia ke he mena tapu, mo fakamanatuaga ki mua a Iehova ke he tau aho oti.
30 Ti tuku foki e koe e Urima mo e Tumima ke he ufi fatafata he fakafiliaga, kia ha i ai ki luga he fatafata a Arona ka hu atu a ia ki mua a Iehova; ti uta ni e Arona e fakafiliaga he fanau Isaraela ki luga hana fatafata ki mua a Iehova ke he tau aho oti.
31 Kia eke e koe e tapulu loa he efota, kia katoatoa ke he ie uli.
32 To eke e ua ki luga ke he lotoga, to lalaga e mena ne fakakala aki e ua ke takai aki, ke tuga e ua he tapulu tau neke mahe.
33 Ti eke foki e koe ke he hana kala he kelekele e tau rimoni ke he mena uli, mo e kula uhi, mo e kula momoho ke takai aki hana kala; mo e tau logo auro ke he tau vaha rimoni ke takai aki;
34 Ko e logo auro mo e rimoni, ko e logo auro mo e rimoni, ke he kala he tapulu loa ke takai aki.
35 Ti tapulu ai a Arona ka fekafekau ai a ia, kia logona ai hana gatiti mai ka hu atu a ia ke he mena tapu ki mua a Iehova, ka liu foki hu mai, neke mate a ia.
36 Ti eke foki e koe e mena kikila ke he auro mitaki, mo e ta ki ai e tau kupu nai, tuga ne fa ta e tau fakamau fakamailoga, TAPU KIA IEHOVA.
37 Ti tuku ai e koe ke he afo uli, kia ha i ai ke he potiki ie, ke he mua potiki ie ni.
38 Kia ha i ai ke he muale a Arona, to uta ni e Arona e hala he tau mena tapu, ne fakatapu ai e fanau Isaraela ke he tau poa tapu oti ha lautolu; kia ha i ai muatua ke he hana muale, kia ofania ai a lautolu ki mua a Iehova.
39 Ti lalaga fakafulufuluola foki e tapulu loto ke he ie lino, ti eke e koe e potiki ke he ie lino, ti eke e koe e pipi ke he gahua he tufuga tuitui mena.
40 Kia eke foki e koe e tau tapulu loto mo e tau tama tane a Arona; ti eke foki ma lautolu e tau pipi, ti eke mo e tau potiki ma lautolu, kia lilifu ai mo e fulufuluola ai.
41 Ti fakatapulu ai e koe hau a matakainaga ko Arona, mo e hana tau tama tane fakalataha mo ia; ti fakauku e koe a lautolu, mo e kotofa e koe a lautolu, ti fakatapu a lautolu kia eke e lautolu e feua he ekepoa kia au.
42 Ti eke e koe ma lautolu e tau fihui ke he ie lino ke ufiufi aki ha lautolu a tau kakano, kamata mai he tau tokupu, ti hoko hifo ke he tau tega;
43 To tapulu ai a Arona mo e hana tau tama tane ka huhū atu a lautolu ke he fale uta fano he tutuutaga, po ke fakatata atu ke he fatapoa ke fekafekau ke he mena tapu, kia nakai ha ia lautolu ha hala, ti mamate ai; ko e fakatufono tukulagi haia kia ia katoa mo e hana fanau ka mole atu a ia.