Esoto 29:1-46
29 KO e mena foki hanai ke eke e koe kia lautolu ke fakatapu a lautolu mo ekepoa kia au; kia uta taha punua povi tane, mo e tau mamoe tane ne ua kua katoatoa e mitaki;
2 Mo e areto nakai fakaea, mo e tau areto pukupuku nakai fakaea kua laku mo e puke lolo, mo e tau areto aleale nakai fakaea kua takai aki he lolo; ko e falaoa he saito ke eke aki e koe e tau mena ia.
3 Ti tuku e koe e tau mena ia ke he kato taha, ti ta mai ai e koe mo e kato, katoa mo e punua povi tane moe tau mamoe tane ne ua.
4 Ka ko Arona mo e hana tau tama tane, kia fakatata mai e koe a lautolu ke he gutuhala he fale uta fano he tutuutaga, ti fakakoukou ai e koe a lautolu ke he vai.
5 Ti uta e koe e tau tapulu, mo e fakatapulu aki Arona ke he tapulu loto, mo e tapulu loa he efota, mo e efota, mo e ufi fatafata, ti pipi e koe a ia ke he pipi he efota.
6 Ti fakapotiki e koe a ia ke he potiki ie, mo e pipi e foupāpā tapu ke he potiki ie;
7 Ti uta e koe e lolo fakauku, ti liligi ai ki luga hana ulu, mo e fakauku e koe a ia.
8 Kia fakatata mai foki e koe hana tau tama tane, ti fakatapulu a lautolu ke he tau tapulu loto.
9 Ti pipi e koe a lautolu ke he pipi, ko Arona mo e hana tau tama tane, ti fakamau ha lautolu a tau potiki; to eke ma lautolu e feua he ekepoa, ko e fakatufono haia tukulagi; kia kotofa e koe a Arona mo e hana tau tama tane.
10 Ti uta ni e koe e punua povi tane ki mua he fale uta fano he tutuutaga, ti fakalago ai e Arona mo e hana tau tama tane e tau lima ha lautolu ki luga he ulu he punua povi.
11 Ti keli ai e punua povi tane ki mua a Iehova ke he gutuhala he fale uta fano he tutuutaga.
12 Ti uta ai e koe e taha maga toto he punua povi tane, mo e tuku ke he tau tapunu he tau hoe he fatapoa ke he hau a matalima; ka ko e toto oti kia liligi ia ke he kelekele he fatapoa.
13 Ti uta foki e koe e tau gako oti he kupega, mo e gako he galu manava ki luga he ate, mo e na fua ua, mo e gako ha i ai; ti huhunu ai e koe ki luga he fatapoa;
14 Ka ko e kakano he punua povi tane, mo e hana kili, mo e hana faliu, ti huhunu ni e koe ke he afi ki tua he heaga api; ko e poa haia mo e hala.
15 Ti uta ai e koe e taha mamoe tane, ti fakalago e Arona mo e hana tau tama tane e tau lima ha lautolu ki luga he ulu he mamoe tane.
16 Ti keli ni e koe e mamoe tane, ti uta ai e koe hana toto mo e pīpī takai ki luga he fatapoa.
17 Ti helehele ni e koe e kakano he mamoe tane, mo e fuifui hana gakau mo e hana tau hui, ti tuku atu ai ke he hana tau maga kakano, mo e hana ulu.
18 To huhunu ni e koe e mamoe tane katoatoa ke he fatapoa, ko e poa huhunu haia kia Iehova, ko e mena manogi mitaki, ko e poa kua eke ke he afi kia Iehova.
19 Ti uta e koe e mamoe tane ne ua aki, ti fakalago a Arona mo e hana tau tama tane e tau lima ha lautolu ki luga he ulu he mamoe tane.
20 Ti keli ai e koe e mamoe tane mo e uta e koe e maga toto hana ti tuku ke he tapunu he teliga matau a Arona, mo e tapunu he tau teliga matau he hana tau tama tane, mo e matalima motua he tau lima matau ha lautolu, mo e matahui motua he tau hui matau ha lautolu; ti pīpī takai e koe e toto ke he fatapoa.
21 Ti uta ni e koe e maga toto ha i luga he fatapoa, mo e maga lolo fakauku, ti pīpī aki e koe a Arona mo e hana tau tapulu, katoa mo e hana tau tama tane mo e tau tapulu he hana tau tama tane fakalataha mo ia; ti fakatapu ai a ia mo e hana tau tapulu, mo e hana tau tama tane, mo e tau tapulu he hana tau tama tane fakalataha mo ia.
22 Kia uta foki e falu a maga he mamoe tane, ko e gako, mo e hiku, mo e gako he kupega, mo e gako he galu manava ki luga he ate, mo e na fua ua, mo e gako ha i ai, mo e lima matau; ha ko e mamoe tane ia he fakatuaga;
23 Mo e taha areto, mo e taha areto pukupuku kua eke mo e lolo, mo e taha areto aleale mai he kato he areto nakai fakaea ha i mua a Iehova.
24 Ti fakatoka oti ai e koe ke he aloalolima a Arona, mo e tau aloalolima he hana tau tama tane ti liaki e koe, ko e poa lialiaki ai ki mua a Iehova.
25 Ti eke foki e koe e tau mena ia mai he tau lima ha lautolu, mo e huhunu e koe ki luga he fatapoa mo poa huhunu, ke eke mo mena manogi mitaki ki mua a Iehova, ko e poa ia kua eke ke he afi ki mua a Iehova.
26 Kia uta foki e koe e fatafata he mamoe tane he fakatuaga a Arona mo e liaki e koe, ko e poa lialiaki ia ki mua a Iehova; to eke ia mo tufaaga hau.
27 Ti fakatapu ni e koe e fatafata he poa liaki, mo e hui he poa nikiti, kua liaki mo e nikiti, ko e tau tufaaga ia he mamoe tane he fakatuaga ma Arona mo e hana tau tama tane;
28 To eke ia ma Arona mo e hana tau tama tane, mai he fanau a Isaraela, ko e fakatufono tukulagi ia, ha ko e poa nikiti ia; to eke foki ia mo poa nikiti mai he fanau a Isaraela mai he tau poa fakaaue ha lautolu, ko e ha lautolu a poa nikiti kia Iehova.
29 Ko e tau tapulu tapu foki a Arona, to eke ia mo e hana tau tama tane ka mole atu a ia, kia fakauku ai a lautolu, mo e fakatu ai a lautolu.
30 Ko e hana tama ke hukui aki a ia ke he feua he ekepoa, to tapulu ai a ia fitu e aho, ka fano a ia ke he fale uta fano he tutuutaga ke fekafekau ai ke he mena tapu.
31 Ko e mamoe tane foki he fakatuaga, to uta e koe a ia mo e tunu hana kakano ke he mena tapu.
32 Ti kai ni e Arona mo e hana tau tama tane e kakano he mamoe tane, mo e areto ha he kato, ke he gutuhala he fale uta fano he tutuutaga.
33 To kai e lautolu e tau mena ia ne eke aki e lukutoto, ke fakatu ai mo e fakatapu ai a lautolu; ka ko e tagata kehe, aua neke kai ai e ia, ha kua tapu e tau mena ia.
34 Kaeke foki ke toe ha maga kakano he poa he fakatuaga, po ke taha areto, ato magaaho pogipogi, ti huhunu e koe e mena toe ia ke he afi; aua neke kai, ha ko e mena tapu ia.
35 Kia eke pihia e koe kia Arona mo e hana tau tama tane, tuga ne tau mena oti kua poaki atu ai e au kia koe; po fitu ni ke eke ai e fakatuaga ha lautolu.
36 Kia eke foki e koe e punua povi tane ke he tau aho oti mo poa ha ko e tau hala ke lukutoto aki; ti fakamea e koe e fatapoa ka eke e poa lukutoto ki luga hana, ti tākai ai e koe kia fakatapu ai.
37 Fitu ni e aho ke eke ai e koe e lukutoto ki luga he fatapoa, mo e fakatapu ai, ti eke ai ni mo fatapoa tapu ue atu; ko e tau mena oti ke piki age ke he fatapoa to tapu ia.
38 Ko e tau poa foki hanai ke eke e koe ki luga he fatapoa, takiua ni e punua mamoe tau taha ke he tau aho oti, nakai noa.
39 Ko e taha punua mamoe ke eke e koe ke he magaaho pogipogi, ko e taha punua mamoe foki ke eke ke he magaaho afiafi.
40 Ko e taha punua mamoe mo e taha omera he falaoa mitaki, kua laku mo e maga ne fa aki e hinu he puke lolo kua tukituki, mo e maga ne fa aki e hinu he uaina ke eke mo poa inu.
41 Ko e taha foki punua mamoe ke eke e koe ke he afiafi, ke tuga e poa mena kai ke he pogipogi, tuga mo e poa inu ke eke e koe; ko e mena manogi mitaki ia, ko e poa kua eke ke he afi kia Iehova.
42 To eke ia mo poa huhunu mau ke he ha mutolu a tau hau a mui ke he gutuhala he fale uta fano he tutuutaga ki mua a Iehova to feleveia ai a tautolu mo mutolu ke he mena ia, kia vagahau atu ai au kia koe ke he mena ia.
43 To feleveia a tautolu mo e fanau a Isaraela ke he mena ia; to fakatapu ai ke he haku a lilifu.
44 To fakatapu e au e fale uta fano he tutuutaga, katoa mo e fatapoa; ko Arona foki mo e hana tau tama tane, to fakatapu ai e au a lautolu ke eke e feua he ekepoa kia au.
45 To nofo fakalataha au mo e fanau a Isaraela; to eke au mo Atua ha lautolu;
46 To iloa ai e lautolu ko au ni ko Iehova ko e Atua ha lautolu, ko ia ne ta mai a lautolu he motu ko Aikupito, kia nofo au mo lautolu; ko au ko Iehova ha lautolu a Atua.