Esoto 3:1-22
3 NE leveki e Mose e fuifui mamoe he matua fugavai hana, ko Ieteru ko e ekepoa i Mitiana; ne uta e ia e fuifui mamoe ke he fahi uta he vao, kua hoko ke he mouga he Atua, ko Horepa.
2 Ti kua fakakite mai kia ia e agelu a Iehova ke he afi puhopuho i loto he akau talatala; ti kitekite atu ai a ia, kitiala, kua vela e akau talatala ke he afi, ka e nakai ni fakaoti e akau talatala.
3 Ti pehe ai a Mose, To afe ate au, to kitekite au ke he mena kehe na kua fakakite mai, po ke heigoa e mena kua nakai vela ai e akau talatala.
4 Kua fioia e Iehova kua afe age a ia ke kitekite, ti ui ai e Atua kia ia mai loto he akau talatala, kua pehe mai, Mose, Mose na e! Ti pehe atu ai a ia, Ko au hanai.
5 Ti pehe mai ai a ia, Aua neke fakatata mai a koe ki hinei; kia vevete hau a tau afialoalohui mai hau a tau hui, ha ko e mena kua tu ai a koe ko e kelekele tapu haia.
6 Ne pehe mai foki a ia, Ko au ko e Atua he hau a matua, ko e Atua a Aperahamo, ko e Atua a Isaako, mo e Atua a Iakopo. Ti ufiufi ai e Mose hana mata, ha kua matakutaku a ia ke kitekite atu ke he Atua.
7 Ti pehe mai ai a Iehova, Kua kitekite ni au ke he matematekelea he haku motu ha i Aikupito, kua fanogonogo foki e au ke he tagi ha lautolu ha ko lautolu kua pule favale kia lautolu, ha kua kitia e au ha lautolu a mamahi.
8 Hanai, to hifo au, ti laveaki e au a lautolu mai he tau lima a Aikupito, to ta hake e au a lautolu mai he motu ia ke he motu mitaki mo e lahi, ko e motu ne tafe ai e puke huhu mo e meli, ko e mena ha i ai e faoa Kanana, mo e faoa Heti, mo e faoa Amori, mo e faoa Perisi, mo e faoa Hivi, katoa mo e faoa Iepusi.
9 Ko e hanai, kitiala, kua hoko mai kia au e tagi he fanau a Isaraela, kua kitekite foki e au ke he favale kua favale ai a Aikupito kia lautolu.
10 Ko e hanai, hau ā to fakafano atu e au a koe kia Farao, kia uta e koe haku motu ko e fanau a Isaraela mai Aikupito.
11 Ti pehe atu ai a Mose ke he Atua, Ko hai kia au nai, kia fano ai au kia Farao, kia uta ai foki e au e fanau Isaraela mai Aikupito?
12 Ti pehe mai a ia, To fakalataha au mo koe; ko e fakamailoga foki hanai kia koe he fakafano e au ni a koe, ka uta e koe e motu mai Aikupito, ti fekafekau a mutolu ke he Atua ke he mouga nai.
13 Ti pehe atu ai a Mose ke he Atua, Kitiala, ka fano au ke he fanau Isaraela mo e pehe age au kia lautolu, Kua fakafano mai au kia mutolu he Atua he tau matua ha mutolu; ti pehe mai ai a lautolu kia au, Ko hai kia hau a higoa? To tala age ha ha e au kia lautolu?
14 Ti pehe mai e Atua kia Mose, KO AU KO E MOUI, KUA MOUI AI NI; ne pehe mai foki a ia, Kia pehe age a koe ke he fanau Isaraela, KO AU KO E MOUI, ne fakafano mai e ia au kia mutolu.
15 Kua liu foki pehe mai e Atua kia Mose, Kia pehe atu a koe ke he fanau a Isaraela, Ko Iehova, ko e Atua he tau matua ha mutolu, ko e Atua a Aperahamo, ko e Atua a Isaako, mo e Atua a Iakopo, ko ia ni ne fakafano mai au kia mutolu, ko e haku higoa haia tukulagi, mo e haku a fakamanatuaga haia ke he taha hau mo e taha hau.
16 Fano a ti fakapotopoto e koe e tau patu a Isaraela, ti tala age e koe kia lautolu, Kua fakakite mai kia au a Iehova, ko e Atua he tau matua ha mutolu, ko e Atua a Aperahamo, mo Isaako mo Iakopo, kua pehe mai a ia, Kua ahi tuai e au a mutolu, katoa mo e mena kua eke kia mutolu i Aikupito.
17 Kua pehe au, To ta hake e au a mutolu mai he matematekelea i Aikupito, ke he motu he faoa Kanana, mo e faoa Heti, mo e faoa Amori, mo e faoa Perisi, mo e faoa Hivi, mo e faoa Iepusi, ko e motu ne tafe ai e puke huhu mo e meli.
18 To fanogonogo ni a lautolu ke he hau a tau kupu; to o foki a mutolu ko mutolu mo e tau patu Isaraela ke he patuiki a Aikupito, ti pehe age a mutolu kia ia, Kua feleveia mo mautolu a Iehova ko e Atua he tau tagata Heperu; hanai kia toka e koe a mautolu ke o ke he fenoga po tolu ke he tutakale ke eke poa ai e mautolu kia Iehova ha mautolu a Atua.
19 Ka e iloa ni e au nakai toka ai he patuiki a Aikupito a mutolu ke o, aua e lima malolo;
20 To fakahoko atu e au haku lima mo e ta e au e tau tagata Aikupito ke he haku tau mana oti ka eke e au ki ai; ka mole ia ti fakafano kehe e ia a mutolu.
21 To fakatupu e au ke ofania e motu nai he tau tagata Aikupito, ka o a mutolu ti nakai o noa a mutolu;
22 Ka e takitaha e fifine mo e ole ke he tagata ne katofia mo ia, katoa mo ia kua nofo ke he hana fale to ole mena ario, mo mena auro, mo e tau tapulu kia tapulu ai ha mutolu a tau tama tane, mo e ha mutolu a tau tama fifine to fakanofogati e mutolu e tau tagata Aikupito.