Esoto 31:1-18
31 TI vagahau mai e Iehova kia Mose, kua pehe mai,
2 Kitiala, kua ui tuai e au ke he hana higoa, ko Pesaleli ko e tama a Auri, ko e tama a ia a Huro, he magafaoa a Iuta.
3 Kua fakapuke e au a ia ke he Agaga he Atua, ke he iloilo, mo e pulotu, mo e maama, mo e tufuga ke he tau gahua oti;
4 Kia fatuakiloto e ia e tau gahua iloilo; kia gahua ai a ia ke he auro, mo e ario, mo e apa kula;
5 Ke ta foki e tau maka ke fakamau ai, ke laku akau foki, ke eke ai e tau gahua oti kana.
6 Kitiala, kua tuku atu foki e au ke fakalataha mo ia, ko Aliavu e tama a Ahisamako, he magafaoa a Tano; kua tuku atu foki e au e iloilo ke he tau loto ha lautolu oti kua iloilo, kia eke ai e lautolu e tau mena oti kua poaki atu e au kia koe;
7 Ko e fale uta fano he tutuutaga, mo e puha he fakatufono, mo e haeleaga he fakaalofa ha i luga hana, mo e tau mena oti he fale uta fano.
8 Ko e laulau mo e hana tau mena, ko e fakatuaga lamepa auro mitaki mo e hana tau mena oti, mo e fatapoa ke huhunu ai e tau mena manogi;
9 Ko e fatapoa ke eke ai e tau poa huhunu, mo e hana tau mena oti, ko e kumete mo e hana a tuaga;
10 Mo e tau tapulu he fekafekauaga, mo e tau tapulu tapu he ekepoa ko Arona, mo e tau tapulu he hana tau tama tane ke eke ai e feua he ekepoa;
11 Ko e lolo uku foki, mo e mena manogi mitaki ke huhunu mo e mena tapu; tuga ne tau mena oti kua poaki atu ai e au kia koe, kia eke pihia e lautolu.
12 Kua vagahau mai foki e Iehova kia Mose, kua pehe mai,
13 Kia tala age e koe ke he fanau Isaraela, pehe; Kia taofi taha e mutolu ke he haku tau sapati, ha ko e fakamailoga ia kia au katoa mo mutolu, ke hoko atu ke he ha mutolu a tau hau a mui, kia iloa ai, ko au ni ko Iehova kua fakatapu a mutolu.
14 Kia taofi e mutolu e sapati ha kua tapu ia kia mutolu; ko ia ke holia ai, kia kelipopo ni a ia; ha ko ia ke eke ai e taha gahua, kia vevehe kehe e tagata ia mo e hana motu.
15 Ono ni e aho ke eke ai e gahua, ka ko e aho fitu ko e sapati ia ke okioki ai, kua tapu kia Iehova, ko ia ke eke e gahua ke he aho sapati, kia kelipopo ni a ia.
16 Kia taofi he fanau a Isaraela e sapati, ke eke mo sapati ke he ha lautolu a tau hau a mui, ko e maveheaga tukulagi ia.
17 Ko e fakamailoga haia kia au, katoa mo e fanau a Isaraela ke tumau tukulagi; ha kua ono ni e aho ne eke ai e Iehova e lagi mo e lalolagi; ka ko e aho fitu ne okioki ai a ia, mo e fakamanava ai.
18 Kua oti atu hana a vagahau kia Mose ke he mouga ko Sinai, ti ta atu ai e ia kia ia e na lapa he fakatufono, ko e tau lapa maka kua tohia he matalima he Atua.