Esoto 32:1-35
32 KUA kitia he motu kua mule he hifo mai a Mose he mouga, ti fakapotopoto mai e motu kia Arona, mo e pehe atu a lautolu kia ia, Matike a koe, kia eke e koe a taha atua ma tautolu, kia mua a ia kia tautolu; ha ko Mose na ko e tagata ne ta hake a tautolu he motu ko Aikupito, nakai iloa e tautolu po ke heinoa e mena kua hoko kia ia.
2 Ti pehe mai a Arona kia lautolu, Kia faki mai e mutolu e tau mama auro ne tau ke he tau teliga he tau hoana ha mutolu, mo e tau tama tane ha mutolu, mo e tau tama fifine ha mutolu, ti ta mai ni kia au.
3 Ti faki ai he motu oti e tau mama auro ha he tau teliga ha lautolu, mo e uta kia Arona.
4 Kua eke e ia mai ia lautolu, ti taute ai e ia ke he tofi mo e eke aki e punua povi auro, ti pehe atu ai a lautolu, Isaraela na e, ko e hau a atua hanai, ne ta hake a koe mai he motu ko Aikupito.
5 Kua kitia ai e Arona, ti ati ai e ia e fatapoa ki mua hana; ti ui atu ai a Arona, kua pehe atu, Ko e aho galue kia Iehova a pogipogi.
6 Ti uhu matike a lautolu mogoho pogipogi, kua eke e tau poa huhunu, kua ta mai foki mo e tau poa fakaaue; ti nonofo hifo ai e motu ke kai mena mo e inu, ti tutu ai a lautolu ke koli.
7 Ti pehe mai a Iehova kia Mose, Kia hifo a koe ki lalo; ha ko e motu hau ne ta hake e koe mai he motu ko Aikupito, kua kelea tuai a lautolu;
8 Kua o kehe vave a lautolu mo e puhala ne poaki atu ai e au kia lautolu, kua eke tuai e lautolu e punua povi auro ma lautolu, kua hufeilo tuai a lautolu ki ai, mo e eke ni e tau poa ki ai; ti kua pehe a lautolu, Isaraela na e, ko e hau a atua hanai, ne ta hake a koe mai he motu ko Aikupito.
9 Ti pehe mai a Iehova kia Mose, Kua kitia tuai e au e motu nai, kitiala, ko e motu kua mao e tau ua;
10 Hanai, kia toka ai au, kia tupu lahi haku a ita kia lautolu, ti fakaotioti e au a lautolu, ka e eke e au a koe mo motu lahi.
11 Ka e olelalo a Mose kia Iehova hana Atua; kua pehe atu, Iehova na e, ko heigoa e mena kua tupu lahi ai hau a ita ke he hau a motu ne ta mai e koe he motu ko Aikupito ke he mana lahi mo e lima malolo?
12 Ko heigoa e mena ke vagahau ai a Aikupito, ke pehe, Ne uta e ia a lautolu kia malaia, kia kelipopo e ia a lautolu ke he tau mouga, kia fakaotioti foki e ia a lautolu mai he fuga kelekele? Kia mafoki kehe a koe mo e hau a ita lahi, ti hiki e koe e manatu hau ke he kelea nai neke fakahoko ke he hau a motu.
13 Kia manatu a koe kia Aperahamo, mo Isaako, mo Isaraela hau a tau fekafekau, ne omonuo ai e koe kia koe ni, mo e vagahau atu kia lautolu, Ti fakatokologa e au hau a fanau, tuga ne tau fetu he lagi; ko e motu oti nai foki kua tala atu ai e au, to ta atu ni e au ke he fanau ha mutolu ke eke ma lautolu tukulagi.
14 Ti hiki ai e manatu a Iehova ke he kelea ne eke e ia ke fakahoko atu ke he hana motu.
15 Ti tafilu a Mose mo e hifo he mouga, ha he lima hana e tau lapa maka ne ua he fakatufono; ko e na lapa maka kua tohi ke he na fahi ua ha laua, ko e taha fahi mo e taha fahi kua tohia ai.
16 Ko e tau lapa maka foki ia, ko e gahua he Atua ia; ko e mena foki kua tohi kua tohi ni he Atua, kua ta e tau kupu ke he tau lapa maka.
17 Kua logona e Iosua e leo he motu ha ne go mai, ti pehe atu ai a ia kia Mose, Ko e leo he tau ne go mai he heaga api.
18 Ti pehe mai a ia, Nakai ko e leo he faoa kua kalaga ha kua tu e kau, ti nakai ko e leo he faoa kua kalaga ha kua mahala e kau, ka ko e leo he lologo kua logona e au.
19 Kua fakatata atu a ia ke he heaga api, ti kitia ai e ia e punua povi mo e koli; ti tupu lahi ai e ita a Mose, kua liti hifo e ia e tau lapa maka, mai he lima hana, ti lipilipi ai ni ki lalo he mouga.
20 Ti uta e ia e punua povi ne eke e lautolu, mo e huhunu ke he afi, kua tukituki fakaikiiki poke efuefu, ti liligi ni ke he vai, mo e fakainu aki e fanau Isaraela.
21 Ti pehe mai a Mose kia Arona, Ne eke ha e motu nai kia koe, ti fakahoko ai e koe e hala lahi nai kia lautolu?
22 Ti pehe atu a Arona, Aua neke tupu lahi e ita he haku iki; kua fioia e koe e motu nai, kua kelea ni a lautolu;
23 Na pehe mai a lautolu kia au, Kia eke la ma tautolu e atua ke mua kia tautolu, ha ko Mose na, ko e tagata ne ta hake a tautolu mai he motu ko Aikupito, nakai iloa e tautolu po ke heinoa e mena kua hoko kia ia.
24 Ti pehe au kia lautolu, Ko e tau tagata ha i ai e auro kia faki mai a, mo e ta mai e lautolu kia au; ti liti ai e au ke he afi, ti hau ai e punua povi na.
25 Kua kitia e Mose e motu kua nonofo fakahanoa a lautolu, ha kua fakanonofo fakahanoa e Arona a lautolu ke fakama a lautolu ki mua ha lautolu ke tutu mai kia lautolu;
26 Ti tu atu a Mose ke he matahala he heaga api mo e pehe atu, Ko hai kia ke kau mo Iehova? kia o mai ni kia au. Ti fakapotopoto age kia ia e fanau a Levi oti kana.
27 Ti pehe mai a ia kia lautolu, Kua pehe mai a Iehova ko e Atua a Isaraela, Kia takitaha e tagata mo e tuku hana pelu ke he hana hui, kia o fano a mai he taha matahala ato hoko ke he taha matahala he heaga api, kia takitaha mo e keli hana matakainaga, mo e hana kapitiga, mo e tagata ne katofia mo ia.
28 Ti eke ai e fanau a Levi tuga ne vagahau a Mose; kua mamate ai mai he motu ke he aho ia po ke tolu e afe tagata.
29 Kua pehe mai a Mose kia lautolu, Kia fakatu e mutolu a mutolu ke he aho nai ma Iehova, kia takitaha ke he hana tama, mo e hana matakainaga kia ta mai ni kia mutolu ke he aho nai e monuina.
30 Kua hoko ke he pogipogi, ti pehe mai ai a Mose ke he motu, Kua hala lahi tuai a mutolu, ko e hanai, ko e hake ne fai au kia Iehova, po ke ne maeke nakai ia au ke lukutoto e hala ha mutolu.
31 Ti liu atu a Mose kia Iehova, mo e pehe atu, Oi te! kua hala lahi tuai e motu nai, kua eke tuai ma lautolu e atua auro.
32 Hanai, po ke maeke nakai ke fakamagalo e koe ha lautolu a hala, ka nakai, kia holoholo kehe te au mai hau a tohi kua tohi e koe.
33 Ti pehe mai ai a Iehova kia Mose, Ko ia ni kua hala kia au, ko ia ni ke holoholo kehe e au he haku tohi.
34 Hanai, fano a koe, takitaki e koe e motu ke he mena ne tala atu ai e au kia koe; kitiala, to mua ni haku agelu ki mua hau; ka ko e aho ke ahi atu ai e au, to ahi atu ai ni a lautolu ha ko e hala ha lautolu.
35 Ti kua ta e Iehova e motu ha ko e mena eke e lautolu e punua povi, ko e mena ne eke e Arona.