Esoto 33:1-23
33 TI vagahau mai foki e Iehova kia Mose, Fano a koe, o hake a mutolu mai he mena nai, ko koe ni mo e motu ne ta hake e koe mai he motu ko Aikupito, ke he motu ne omonuo ai e au kia Aperahamo, mo Isaako, mo Iakopo, ne pehe age, To ta atu ai e au ke he hau a fanau.
2 To fakafano atu e au e agelu ki mua hau, to vega e au e faoa Kanana, mo e faoa Amori, mo e faoa Heti, mo e faoa Perisi, mo e faoa Hivi, mo e faoa Iepusi;
3 Ko e motu haia ne tafe ai e puke huhu mo e meli; ha kua nakai hake au mo mutolu, ha ko e motu kua mao e tau ua a mutolu; neke fakaotioti e au a mutolu ke he magahehala.
4 Kua logona he motu e ogo tamaki nai, ti fakatutuku ai a lautolu, ti nakai taute foki e taha ke he hana tauteaga;
5 Ha kua pehe mai a Iehova kia Mose, Tala age a ke he fanau a Isaraela, Ko e motu kua mao e tau ua a mutolu, ko e magaaho ke kemo ai e mata ka hake ai au ke he vaha loto ha mutolu, ti fakaotioti e au a mutolu; kia toka kehe ia mutolu ha mutolu a tau tauteaga, kia iloa ai e au po ke heinoa e mena ke eke e au kia mutolu.
6 Ti aki ai he fanau a Isaraela he lautolu a tauteaga ke he mouga ko Horepa.
7 Ka e uta ni e Mose e fale ie mo e fakatu ke he fahi atu he heaga api, kua mamao mo e heaga api; ti fakahigoa ai e ia. Ko e fale ie he tutuutaga; ko e tau tagata oti foki kua kumi kia Iehova kua o a lautolu ke he fale ie he tutuutaga ke he fahi atu he heaga api.
8 Ka fina atu foki a Mose ke he fale ie, ti tutu ai ki luga e motu oti kana, kua takitaha e tagata mo e tu ke he gutuhala he hana fale ie, mo e mataono kia Mose ato hu atu a ia ke he fale ie.
9 Kua hu atu a Mose ke he fale ie, ti hifo ai e aolagi fakatupou mo e tu ke he gutuhala he fale ie; ti vagahau ai a Iehova kia Mose.
10 Kua kitia he motu oti e aolagi fakatupou ha ne tu ke he gutuhala he fale ie, ti tutu ai e motu oti ni mo e hufeilo atu ai, takitaha e tagata ke he gutuhala he hana fale ie.
11 Kua vagahau mai foki e Iehova kia Mose, kua fehagaoaki a laua, tuga ne vagavagahau e tagata mo e hana kapitiga. Kua liu atu a Mose ke he heaga api, ka ko e hana fekafekau ko Iosua, ko e tama a Nuno, ko e fuata, nakai fano kehe a ia mo e fale ie.
12 Ti pehe atu a Mose kia Iehova, Kitiala, kua tala mai e koe kia au ke ta hake e au e motu nai, ka e nakai fakailoa mai e koe kia au po ko hai a ia ke fakafano mai e koe ke tokoua a maua, ka e pehe mai ni a koe, Kua iloa e au a koe ke he hau a higoa, kua ofania foki e au a koe.
13 Hanai, kaeke kua ofania e koe au, kia fakailoa mai e koe kia au hau a puhala, kia iloa ai e au a koe, kia ofania ai e koe au, ti manatu e koe ko e hau a tau tagata e motu nai.
14 Ti pehe mai a Iehova, To o a taua mo koe; to ta atu foki e au e okiokihaga māu.
15 Ti pehe atu a ia kia ia, Kaeke ke nakai haele a koe mo au, ti aua neke ta hake a mautolu mai he mena nai.
16 To iloa he ha po ke ne ofania e koe au, ko au mo e hau a motu, ka e nakai kia ko e mena nai, he haele a koe fakalataha mo mautolu? ti vevehe kehe ai a mautolu, ko au mo e hau a motu, mai he tau motu oti kana ha he fuga kelekele.
17 Ti pehe mai a Iehova kia Mose, Ko e mena ia foki kua tala mai ai e koe, to eke ni e au, ha kua ofania e au a koe; kua iloa foki e au a koe ke he hau a higoa.
18 Ti pehe atu a Mose, Kia fakakite mai kia au hau a lilifu.
19 Ti pehe mai ai a ia, To fakafano atu e au haku a mitaki oti kana ki mua hau; to tokutoku atu e au e higoa ko Iehova ki mua hau; to fakaalofa au kia ia kua fia fakaalofa au ki ai, mo e fakaalofa hofihofi kia ia kua fia fakaalofa hofihofi au ki ai;
20 Kua pehe mai foki a ia, Nakai maeke ia koe ke kitia hoku mata; ha kua nakai kitia he tagata au mo e moui.
21 Kua pehe mai a Iehova, Kitiala, e mena kua tata kia au, to tu ai a koe ki luga he kaumaka;
22 Ka fina age ai haku lilifu, ti tuku atu e au a koe ke he maihi he maka, to ufi aki a koe he haku lima ato mole age au;
23 To uta kehe e au haku lima, ti kitia ai e koe hoku tua, ka ko e hoku mata nakai ko e mena kitia ia.