Esoto 34:1-35
34 TI pehe mai ai a Iehova kia Mose, Kia ta e koe ua e lapa maka, tuga ne tau mena fakamua; to tohi e au ke he tau lapa ia e tau kupu ha ha he tau lapa fakamua ne lipilipi e koe;
2 Kia taute ni e koe mogoho pogipogi, ti hake a koe a pogipogi ke he mouga ko Sinai, ti tu ai a koe ki mua haku ke he tapunu mouga.
3 Aua neke hake e taha tagata mo koe, aua foki neke kitia ha tagata taha ke he mouga oti; ko e tau fuifui mamoe foki mo e tau povi, aua neke totolo ki mua he mouga ia.
4 Ti ta ai e ia ua e lapa maka tuga ne tau mena fakamua; kua uhu matike a Mose ke he pogipogi, ti hake a ia ke he mouga ko Sinai, tuga ne poaki a Iehova kia ia, kua uta foki e na lapa maka ua ke he hana lima.
5 Ti haele hifo a Iehova ke he aolagi, kua tutu a laua mo ia ke he mena ia, kua tokutoku mai foki e ia e higoa a Iehova.
6 Ti haele age ai a Iehova, ki mua hana, mo e tokutoku mai e ia, Ko Iehova, ko Iehova, ko e Atua fakaalofa hofihofi, mo e fakaalofa noa; kua fakatuai hana ita, to lahi e fakaalofa, to fakamoli;
7 Kua tumau hana fakaalofa to hoko ke he afe he tau hau; kua fakamagalo foki e ia e mahani hepehepe, mo e holifono, mo e hala, ke e nakai toka noa e ia a lautolu kua hala, ka e taui ni e hala he tau matua ke he ha lautolu a fanau, mo e fanau he ha lautolu a fanau, ke hoko ke he tolu mo e fa e hau.
8 Ti fakatepetepe ai a Mose, kua tukutukuhifo ke he kelekele mo e hufeilo.
9 Kua pehe atu foki a ia, Ko e Iki na e, kaeke kua ofania e koe au, ma Iki na e, kia haele a koe ke he vaha loto ha mautolu; ha kua mao e tau ua he motu nai, kia fakamagalo mai e koe ha mautolu a mahani hepehepe, mo e ha mautolu a tau hala, ti eke e koe a mautolu māu.
10 Ti pehe mai a ia, Kitiala, kua eke e au e maveheaga; to eke e au e tau mana ki mua hau a motu oti, kua nakai eke pihia ke he lalolagi oti, mo e tau motu kehe oti; to kitia ni he tau motu oti ka nofo ai a koe e gahua a Iehova, ha ko e mena matakutakuina ko e eke ne fai e au kia koe.
11 Kia omaoma a koe ke he kupu kua poaki atu ai e au kia koe ke he aho nai; kitiala, to vega kehe e au mai mua hāu e faoa Amori, mo e faoa Kanana, mo e faoa Heti, mo e faoa Perisi, mo e faoa Hivi, mo e faoa Iepusi.
12 A koe ni, neke eke e koe e maveheaga mo e tau tagata kua nonofo he he motu ko e fano ne fai a koe ki ai, neke eke ai mo hele kia koe;
13 Ka e moumou e mutolu ha lautolu a tau fatapoa, ti lipilipi ha lautolu a tau tupua, mo e hio ki lalo ha lautolu a tau tupua Asaira.
14 Aua neke hufeilo a koe ke he taha atua; ha ko Iehova, ko Ita tafua hana higoa, ko e Atua ita tafua a ia.
15 Neke eke e koe e maveheaga mo e tau tagata kua nonofo ke he motu, ti faivao ai a lautolu mo e tau atua ha lautolu, mo e eke poa ke he tau atua ha lautolu; ti ui mai a lautolu kia koe, ti kai e koe ha lautolu a poa.
16 Neke ta mai e koe ha lautolu a tau tama fifine ke hoana ki ai ha mutolu a tau tama tane, ti faivao ha lautolu a tau tama fifine mo e ha lautolu a tau atua, ti futiaki e lautolu hau a tau tama tane ke faivao mo e tau atua ha lautolu.
17 Aua neke eke e koe māu e atua lapatoa.
18 Kia taofi e koe ke he galue he areto nakai fakaea. Fitu ni e aho ke kai ai e koe e areto nakai fakaea ne poaki atu ai e au kia koe, ke he vaha ne kotofa ai ke he mahina Apipa, ha ko e mahina Apipa ne hau ai a koe i Aikupito.
19 Ko e tau tama uluaki oti, to eke ia maku; ko e tau tane oti he hau a tau manu, ko e punua uluaki he povi katoa mo e mamoe;
20 Ka ko e punua asini, to totogi ia ke he punua mamoe; kaeke ke nakai totogi, ti papaki e koe hana ua; ko e tau tama uluaki oti he fanau ha mutolu to totogi ia. Aua neke kitia taha ki mua haku, kua nakai fai mena.
21 Ono ni e aho ke gahua ai a koe, ka ko e aho fitu ke okioki ai a koe; kia okioki ai a koe ke he vaha ke keli ai e kelekele, mo e vaha ke helehele ai e saito.
22 Kia eke e koe e galue he tau vahatapu, ko e tau fua uluaki he heleheleaga saito, katoa mo e galue he tanakiaga fua ke he fakahikuaga tau.
23 Taki lagatolu ni ke he tau tau ke kitia ai e tau tane oti ha mutolu ki mua he Iki, ko Iehova, ko e Atua a Isaraela.
24 Ha ko e mena to vega e au e tau motu kehe mai mua hau, to fakalaulahi e au hau a kelekele; ti nakai manako e taha tagata ke he hau a fonua ka kua hake a koe lagatolu ke he tau tau, kia kitia ai a koe ki mua a Iehova hau a Atua.
25 Aua neke eke poa e koe ke he toto he haku a poa mo e areto fakaea; aua neke ahogia e poa ke he galue he paseka.
26 Ko e tau fua uluaki fakamua he hau a fonua kia uta ai e koe ke he fale a Iehova hau a Atua. Aua neke tunu e punua koti ke he puke huhu he hana matua fifine.
27 Ti pehe mai a Iehova kia Mose, Kia tohi e koe e tau kupu na, ha kua lata mo e tau kupu ia e maveheaga kua eke e au mo koe katoa mo Isaraela.
28 Ti ha i ai a ia ke he mena ia mo Iehova fagofulu e aho, ti fagofulu e po; nakai kai ai e ia ha mena, ti nakai inu foki ha vai. Ti tohi he Atua ke he tau lapa maka e tau kupu he maveheaga, hogofulu ni e kupu.
29 Kua hifo mai a Mose he mouga ko Sinai, ha he lima a Mose e na lapa ua he fakatufono he hifo mai a ia he mouga, ti nakai iloa e Mose kua kikila e kili he hana fofoga he vagahau a laua mo ia.
30 Ka kua kitia e Arona mo e fanau a Isaraela oti kana a Mose, kitiala, ha ne kikila mai e kili he hana fofoga; ti matakutaku ai a lautolu ke fakatata kia ia.
31 Ka e ui ni a Mose kia lautolu, ti liliu atu kia ia a Arona mo e tau iki oti he fakapotopotoaga; ti vagahau atu ai a Mose kia lautolu.
32 Fakamui ne fakatata age kia ia e fanau oti a Isaraela, ti tala age ai a ia kia lautolu e tau kupu oti ne tala mai e Iehova kia ia ke he mouga ko Sinai.
33 Kua oti atu e tau kupu a Mose kia lautolu, ti tuku ai e ia e ufiufi ke he hana fofoga.
34 Ka hu atu a Mose ki mua a Iehova ke vagavagahau a laua mo ia, ti tuku kehe e ia e ufiufi ato liu foki hu mai; ti fano ai a ia mo e fakamatala atu ke he fanau a Isaraela e tau mena ne poaki mai.
35 Kua kitia he fanau a Isaraela e fofoga a Mose, kua kikila mai e kili he fofoga a Mose, ti tuku ai e Mose e ufiufi ke he hana fofoga ato liu hu atu foki a ia ke vagavagahau a laua mo ia.