Esoto 36:1-38
36 TI gahua ai a Pesaleli, mo Aliavu, mo e tau tagata iloilo oti, ko lautolu kua age ki ai e Iehova e iloilo, mo e pulotu, kia iloa ai ke eke e tau gahua oti kana mo tauteaga he faituga, tuga e tau mena oti ne poaki mai e Iehova.
2 Ti ui a Mose kia Pesaleli, mo Aliavu, mo e tau tagata iloilo oti, ko lautolu kua age ki ai e Iehova e iloilo ke he tau loto ha lautolu, ko lautolu oti ni kua omoi he tau loto ha lautolu ko e mai ke he gahua ke eke.
3 Ti uta e lautolu ia Mose e tau poa oti ne ta mai he fanau a Isaraela mo e gahua he tauteaga he faituga ke eke ai; ne ta mai foki e lautolu kia ia mo e fakamakai ke he taha pogipogi mo e taha pogipogi.
4 Ti o age ai e tau tagata iloilo oti kua eke e tau gahua oti he faituga takitaha e tagata mai hana gahua ne eke e ia.
5 Kua tala age e lautolu kia Mose, kua pehe, Kua loga e tau mena kua ta mai he motu ke taute e gahua ne poaki mai e Iehova ke eke, ti toe ai ni.
6 Ti poaki ai e Mose ke fano e ogo ke he heaga api, ke pehe, Ua eke foki he tane po ke fifine ha gahua mo poa ke he faituga. Ko e mataofi la ia e motu, ti nakai tuai ta mai ha mena;
7 Ha ko e tau mena kua eke, kua lata ia mo e gahua oti ke eke aki, ti toe ni.
8 Ko lautolu oti kua iloilo kua eke e lautolu e gahua he faituga, kua eke e lautolu e tau ie puipui ne hogofulu ke he ie lino kua filo tua tote, mo e tau mena uli, mo e kula uhi, mo e kula momoho; kua eke foki i ai e tau kerupi ke he gahua he tufuga lalaga ie.
9 Ko e loa he taha ie puipui ko e uafulu ma valu e kupita ia, mo e laulahi he taha ie puipui ko e fa e kupita ia; taha ni e fafati he tau ie puipui oti.
10 Ti tutaki e tau ie puipui ne lima, ko e taha ke he taha; kua tutaki foki e tau ie puipui ne lima kua toe, ko e taha ke he taha.
11 Kua eke foki e tau kaviti ke he mena uli ke he kala he taha ie puipui, ke he matapotu ke tutaki ai; ti eke pihia ni ke he kala he taha ie puipui ke he matapotu ke tutaki ai mo e taha ie.
12 Limagofulu ni e kaviti ne eke ke he taha ie puipui, ti limagofulu ni e kaviti ne eke ke he matapotu he ie puipui ke he mena ke tutaki ai mo e taha ie, ti kua fakafehagai e tau kaviti he taha ie mo e taha ie.
13 Kua eke foki e ia limagofulu e fakamau auro, ti tutaki ni e tau ie puipui ko e taha ke he taha, ke he tau fakamau, ti eke ni mo faituga taha.
14 Kua eke foki e ia e tau ie puipui he tau fulu koti mo fale ie i luga he faituga, hogofulu ma taha ni e ie puipui ne eke e ia;
15 Tolugofulu ni e kupita e loa he taha ie puipui, ti fa e kupita e laulahi he taha ie puipui; taha ni e fafati he tau ie puipui ne hogofulu ma taha.
16 Ti tutaki kehe e ia lima e ie puipui ke fakalataha, ka e tutaki kehe ono e ie puipui ke fakalataha;
17 Ti eke e ia limagofulu e kaviti ke he kala he taha ie puipui ke he matapotu ke tutaki ai, ti limagofulu e kaviti ke he kala he taha ie puipui ke he mena ke tutaki ke he taha.
18 Ti eke e ia e tau fakamau apa kula limagofulu ni ke tutaki aki e fale uta fano, kia taha ni.
19 Kua eke foki e ia e ufiufi mo e fale uta fano ke he tau kili mamoe tane kua vali kula, mo e ufiufi he tau kili takesa ki luga fakaoti.
20 Kua eke foki e tau lapa he akau ko e sitima mo e faituga ke fakatūtū.
21 Ko e loa he lapa ko e hogofulu ia e kupita; ko e laulahi he taha lapa ko e taha ia e kupita mo e hafa kupita.
22 Ua ni e nifo ke he taha lapa, kua fakafehagai ko e taha ke he taha; kua eke pihia e ia e tau lapa oti kana he faituga.
23 Kua eke e ia e tau lapa mo e faituga, uafulu ni e lapa ke he fahi toga, kua fehagai mo toga;
24 Ti fagofulu e fakalago ario ne eke e ia ki lalo he tau lapa ne uafulu, ua ni e fakalago ki lalo he taha lapa mo e hana tau nifo ne ua, ti ua e fakalago ki lalo he taha lapa mo e hana tau nifo ne ua.
25 Ne eke foki e ia uafulu e lapa mo e taha fahi he faituga, ko e fahi tokelau ia;
26 Mo e ha lautolu a tau fakalago ario ne fagofulu, ua ni e fakalago ki lalo he taha lapa, ti ua ni e fakalago ki lalo he taha lapa.
27 Ko e na fahi lalo foki he faituga ne eke ai e ia ono e lapa.
28 Ti ua ni e lapa ne eke e ia mo e tau kaniva he faituga ke he na fahi.
29 Ti kapitiua ni ke fakalataha ke he kelekele, ti mau fakalataha ki luga ke fakamau ke he taha mena veliveli, pihia ni e na mena ua ia, ko e tau kaniva haia ne ua.
30 Ko e tau lapa ia ne valu mo e tau fakalago ario ha lautolu, ko e tau fakalago ne hogofulu ma ono, takiua ni e fakalago ki lalo he lapa taha.
31 Kua eke foki e ia e tau akau loa he akau ko e sitima, lima ni mo e tau lapa he taha fahi he faituga;
32 Ti lima foki e akau loa mo e tau lapa he taha fahi he faituga, ti lima foki e akau loa mo e tau lapa he faituga ke he na fahi lalo.
33 Ne eke foki e ia e akau he lotoga ha he tau lotoga he tau lapa, ti fano leva ia he taha potu fale, ti hoko atu ke he taha potu fale.
34 Ti fakakili e ia e tau lapa ke he auro, kua eke foki e ia ha lautolu a tau veli ke he auro ke humaki ai e tau akau loa, ti fakakili foki e tau akau loa ke he auro.
35 Ne eke foki e ia e puipui ie ke he mena uli, mo e kula uhi, mo e kula momoho, mo e ie lino kua filo tua tote, ne eke foki e tau kerupi i ai ko e gahua he tufuga lalaga ie.
36 Ti eke e ia mo e mena ia fa e pou sitima, mo e fakakili aki he auro, ne eke foki e tau fao ha lautolu ke he auro; kua tunu foki e ia e ario ke eke aki hana tau fakalago ne fa
37 Ne eke foki e ia e puipui tautau ke pa aki e gutuhala he fale uta fano, ke he mena uli, mo e kula uhi, mo e kula momoho, mo e ie lino kua filo tua tote, ko e gahua he tufuga tuitui mena;
38 Mo e hana tau pou ne lima, mo e ha lautolu a tau fao; ne fakakili foki e ia e tau ulu pou ha lautolu, mo e tau fakalava pou ha lautolu ke he auro, ka ko e tau fakalago ha lautolu ne lima ko e apa kula ia.