Esoto 37:1-29
37 TI eke e Pesaleli e puha ke he akau ko e sitima; ua e kupita mo e hafa kupita hana loa, ko e kupita mo e hafa kupita hana laulahi, ko e kupita mo e hafa kupita hana tokoluga.
2 Kua fakakili foki e ia ke he auro mitaki ki loto mo tua, ti eke foki i ai e fakapiki auro ke takai aki.
3 Ti tunu e ia e auro ke eke aki fa e veli ti tuku ai e ia ke he hana tau kaniva ne fa, ua e veli ke he taha fahi, ti ua e veli ke he taha fahi.
4 Ti eke foki e ia e tau akau tauloto ke he akau ko e sitima, mo e fakakili aki he auro.
5 Ti humaki e ia e tau akau tauloto ke he tau veli ke he tau fahi he puha, ke tauloto aki e puha.
6 Ne eke foki e ia e haeleaga he fakaalofa noa ke he auro mitaki, ua e kupita mo e hafa kupita hana loa, ti ua e kupita mo e hafa kupita hana laulahi.
7 Ne eke foki e ia ua e kerupi ke he auro; kua eke e ia mo e ta fakapolopolo, ha he na potu ua he haeleaga he fakaalofa noa;
8 Ko e taha kerupi ke he taha potu, mo e taha kerupi ke he taha potu, ne eke e ia e tau kerupi ke he haeleaga he fakaalofa noa ke he na potu ua hana.
9 Kua fofola foki he tau kerupi ha laua a tau tapakau ki luga, kua fakamalu e haeleaga he fakaalofa noa ke he tau tapakau ha laua; ti fakafehagaoaki ha laua a tau mata; ti hagao atu e tau mata he tau kerupi ke he haeleaga he fakaalofa noa.
10 Ti eke foki e ia e laulau ke he akau ko e sitima; ua ni e kupita hana loa, ti taha e kupita hana laulahi, ti taha e kupita mo e hafa kupita hana tokoluga.
11 Ti fakakili e ia ke he auro mitaki, ti eke ni ki ai e fakapiki auro ke takai aki.
12 Kua eke foki e ia e fahi ki ai hagatike taha ke takai aki, ti eke foki e fakapiki auro ke he hana fahi ke takai aki.
13 Ne tunu foki e ia e auro ke eke aki fa e veli, ti tuku e ia e tau veli takitaha ke he tau kaniva ne fa, ke he hana tau hui ne fa.
14 Kua fakatata atu e tau veli ke he fahi, ke eke mo mena ke tuku ai e tau akau tauloto ke tauloto aki e laulau.
15 Ti eke foki e ia e tau akau tauloto ke he akau ko e sitima, mo e fakakili aki ke he auro, ke tauloto aki e laulau.
16 Ne eke foki e ia e tau mena mo e laulau, ko e hana tau kapiniu lapalapa, mo e hana tau kapiniu, mo e hana tau kapiniu ahu, mo e tau kumete ke liligi ki ai, ko e auro mitaki ne eke aki e tau mena ia.
17 Kua eke foki e ia e fakatuaga lamepa ke he auro mitaki, ti eke e ia e fakatuaga lamepa kua lakuina; ko e hana hui, mo e hana tau la, mo e hana tau kapiniu fakapolopolo, ko e hana tau tepu, mo e hana tau fiti, kua eke oti e ia ke he mena ia ni.
18 Ti o atu ono e la he hana tau fahi, tolu e la he fakatuaga lamepa ke he taha fahi, ti tolu e la he fakatuaga lamepa ke he taha fahi.
19 Tolu e kapiniu fakapolopolo tuga ne sikati ke he taha la, ko e tepu foki katoa mo e fiti; ti tolu e kapiniu fakapolopolo tuga ne sikati ke he taha la, ko e tepu katoa mo e fiti; kua pihia ni ke he tau la ne ono ne o atu he fakatuaga lamepa.
20 Ha i ai foki ke he fakatuaga lamepa fa e kapiniu fakapolopolo tuga ne sikati, ko e hana tau tepu, mo e hana tau fiti;
21 Ko e tepu foki ki lalo he hana na la ne ua, mo e tepu ki lalo he hana na la ne ua, mo e tepu ki lalo he hana na la ne ua; ke lata mo e tau la ne ono ne o atu ai;
22 Ko e hana tau tepu mo e hana tau la ne eke aki he mena taha; kua eke oti kana ke he auro taha kua mitaki mo e laku.
23 Ne eke foki e ia hana tau lamepa ne fitu, mo e hana tau helehele vavae, mo e hana tokaaga helehele vavae, ke he auro mitaki.
24 Taha e taleni auro mitaki ne eke aki, katoa mo e hana tau mena oti kana.
25 Ne eke foki e ia e fatapoa ke huhunu ai e tau mena manogi ke he akau ko e sitima; taha e kupita hana loa, ti taha e kupita hana laulahi, kua fakafahifa tatai ni, ti ua e kupita hana tokoluga; kua eke hana tau hoe, ke he mena taha ia.
26 Ti fakakili ai e ia ke he auro mitaki, ko e hana fuga luga, mo e hana tau fahi ke takai aki, katoa mo e hana tau hoe; ne eke foki e ia e fakapiki auro ke takai aki.
27 Ne eke foki e ia ua e veli auro ki ai, ke he tapa lalo he hana fakapiki, ke he na kaniva fata ua, ke he na fahi ua hana; ko e tau mena ia ke humaki ai e tau akau ke tauloto aki.
28 Ti eke e ia e tau akau tauloto ke he akau ko e sitima, mo e fakakiliaki he auro.
29 Ne eke foki e ia e lolo tapu ke fakauku aki, mo e mena manogi mitaki ke huhunu, kua eke ke he tau mena manogi, ko e feua he tufuga eke mena manogi.