Esoto 39:1-43
39 NE eke foki e lautolu ke he mena uli, mo e kula uhi, mo e kula momoho e tau tapulu he fekafekauaga ke fekafekau ai ke he faituga; ne eke foki e lautolu e tau tapulu tapu ma Arona, tuga ne poaki mai e Iehova kia Mose.
2 Ne eke foki e ia e efota ke he auro mo e mena uli, mo e mena uli, mo e kula uhi, mo e kula momoho, mo e ie lino kua filo tua tote.
3 Ne tuki fakaaleale e lautolu e auro, ti ihi ni ke eke mo filo ke lalaga fiofio mo e mena uli, mo e kula uhi, mo e kula momoho, mo e ie lino, ko e gahua he tufuga lalage ie.
4 Kua eke e tau tukeua i ai ke tutaki aki, ko e na kala ua hana ne tutaki ai.
5 Ko e tau mena ia ni ne eke aki e pipi he hana efota, ha i luga hana, tuga ne gahua ha i ai, ko e auro mo e mena uli mo e kula uhi, mo e kula momoho mo e ie lino kua filo tua tote, tuga ne poaki mai e Iehova kia Mose.
6 Ne taute foki e lautolu e tau maka soama kua fakamau ke he fakakala auro, kua ta ai e tau higoa he fanau a Isaraela, tuga ne fa ta e tau fakamau fakamailoga.
7 Ti tuku ai ni ke he tau tukeua he efota, ko e tau maka ke manatu ai ke he fanau a Isaraela, tuga ne poaki mai e Iehova kia Mose.
8 Ne eke foki e ia e ufifatafata ke he gahua he tufuga lalaga ie, tuga ne gahua he efota, ke he auro, mo e mena uli, mo e kula uhi, mo e kula momoho, mo e ie lino kua filo tua tote.
9 Ne eke e lautolu fakafahifa tatai, kua pepelu ua e ufi fatafata, ko e hagatike hana loa, ko e hagatike foki hana laulahi kua pepelu ua.
10 Ne tuku foki ki ai e tau atu maka ne fa, ko e taha atu, ko e salikea, ko e topasi, mo e pereketa; ko e atu fakamua ia.
11 Ko e atu ua, ko e nofeka, ko e safaira, mo e ialoma.
12 Ko e atu tolu, ko e lesema, ko e sivo, mo e aselama.
13 Ko e atu fa, ko e tasisa, ko e soama, mo e iasepi; kua fakamau ke he tau fakakala auro mo e ha lautolu a tau tokaaga maka.
14 Ne fakalata e tau maka ke he tau higoa he fanau a Isaraela, ne hogofulu ma ua, ke lata mo e tau higoa ha lautolu, tuga ne fa ta e fakamau fakamailoga, kua takitaha mo e hana higoa fakalata ke he tau magafaoa hogofulu ma ua.
15 Ne eke foki e lautolu ki luga he ufifatafata e tau fakave auro mitaki kua fili, tuga ne fa fili mena.
16 Ne eke foki e lautolu ua e fakakala auro, mo e ua e veli auro; ti tuku e lautolu e na veli ua ke he na potu ua he ufifatafata.
17 Ne tuku foki e lautolu e tau auro fili ne ua ke he na veli ua ha he na potu he ufifatafata.
18 Ka ko e na potu ua he auro fili, kua fakamau ia ke he na fakakala ua, ti tuku ni ke he na tukeua he efota ki mua hana.
19 Ti eke e lautolu ua e veli auro mo e tuku ke he na potu ua he ufifatafata ke he kala hana, kua hagao ke he efota i loto.
20 Ti eke foki e lautolu ua e veli auro mo e tuku ai ke he na fahi ua he efota ki lalo, ke he fahi i mua, ke tata mo e tutakiaga ki luga he pipi he efota.
21 Ne lili foki e lautolu e ufifatafata ke he hana tau veli ke he tau veli he efota ke he afo uli, ti ha i ai ki luga he pipi he efota, neke fano kehe e ufifatafata mo e efota; tuga ne poaki mai e Iehova kia Mose.
22 Ne eke foki e ia e tapulu loa he efota kua katoatoa ke he mena uli, ko e gahua he tagata lalaga ie.
23 Ha i ai foki e ua ke he tapulu loa, ke he lotoga hana, tuga ne ua he tapulu tau, mo e mena ke fakakala aki e ua neke mahe.
24 Ti eke e lautolu ke he kala he kelekele he tapulu loa e tau rimoni ke he mena uli, mo e kula uhi, mo e kula momoho, kua filo tua tote.
25 Ne eke foki e lautolu e tau logo auro mitaki, ti tuku e lautolu e tau logo ke he tau vaha rimoni ke he kala he kelekele he tapulu loa ke takai aki ke he tau vaha rimoni.
26 Ko e logo mo e rimoni, ko e logo mo e rimoni ke he kala he tapulu loa ke takai aki kia fekafekau ai; tuga ne poaki mai e Iehova kia Mose.
27 Kua eke foki e lautolu e tau tapulu loto ke he ie lino ko e gahua he tagata lalaga ie, ma Arona mo e hana fanau;
28 Mo e potiki he ie lino, me e tau potiki fulufuluola he ie lino, mo e tau fihui he ie lino kua filo tua tote;
29 Mo e pipi ie lino kua filo tua tote mo e mena uli, mo e kula uhi, mo e kula momoho, ko e gahua he tufuga tuitui mena; tuga ne poaki mai e Iehova kia Mose.
30 Ne eke foki e lautolu e mena kikila ko e foupāpā tapu ke he auro mitaki; mo e tohi e lautolu e tau kupu, tuga ne fa ta e fakamau fakamailoga, TAPU KIA IEHOVA.
31 Ti tuku ai e lautolu e afo uli ke pipi aki ki luga ke he potiki; tuga ne poaki mai e Iehova kia Mose.
32 Ti oti pito ai e tau gahua oti he faituga ko e fale uta fano he tutuutaga; kua eke tuai he fanau Isaraela tuga ne tau mena oti ne poaki mai ai e Iehova kia Mose, kua eke pihia e lautolu.
33 Ti uta e lautolu e faituga kia Mose, ko e fale uta fano mo e hana tau mena oti, ko e hana tau fakamau, ko e hana tau lapa, ko e hana tau akau loa, mo e hana tau pou, mo e hana tau fakalago;
34 Mo e ufiufi he tau kili mamoe tane kua vali kula, mo e ufiufi he tau kili takesa, mo e ie puipui ke ufi aki;
35 Ko e puha he fakatufono mo e hana tau akau tauloto, mo e haeleaga he fakaalofa noa;
36 Ko e laulau mo e hana tau mena oti, mo e areto fakatokatoka ki mua;
37 Ko e fakatuaga lamepa auro mitaki, mo e hana tau lamepa, ko e tau lamepa, ke taute ke mitaki, mo e hana tau mena oti kana, mo e lolo ke fakapuho;
38 Mo e fatapoa auro, mo e lolo ke fakauku, mo e tau mena manogi mitaki ke huhunu, mo e ie puipui ma e gutuhala he fale uta fano;
39 Ko e fatapoa apa kula, mo e mena pūpū apa kula ha i ai, ko e hana tau akau hahamo mo e hana tau mena oti kana, ko e kumete mo e hana tuaga;
40 Ko e tau ie puipui he pa, ko e hana tau pou mo e hana tau fakalago; mo e ie puipui mo e gutuhala he pa, ko e hana tau toua, mo e hana tau fao; katoa mo e tau mena oti kana ke fekafekau aki ke he faituga, ma e fale uta fano he tutuutaga.
41 Ko e tau tapulu he fekafekauaga ke fekafekau ai ke he faituga, ko e tau tapulu tapu a Arona ko e ekepoa, mo e tau tapulu ma e fanau hana ke eke ai e feua he ekepoa;
42 Ne eke he fanau a Isaraela e tau gahua oti, tuga ne tau mena oti ne poaki mai ai e Iehova kia Mose.
43 Ti kitekite ai e Mose ke he tau gahua oti, kitiala, kua eke tuai e lautolu tuga ne poaki mai e Iehova, kua eke pihia ni; ti fakamonuina e Mose a lautolu.