Esoto 5:1-23
5 KUA mole ia ti o age ai a Mose mo Arona, kua pehe age a laua kia Farao, Kua pehe mai e vagahau a Iehova e Atua a Isaraela, Kia toka e koe haku motu ke o, kia eke galue e lautolu kia au ke he tutakale.
2 Ti pehe age a Farao, Ko hai kia a Iehova kia fanogonogo ai au ke he hana tau kupu, mo e toka e au a Isaraela ke o? Nakai iloa e au a Iehova, nakai toka foki e au a Isaraela ke o.
3 Ti pehe age ai a laua, Kua feleveia e Atua he tau tagata Heperu mo maua; kia tuku mai e koe a mautolu ke o ke he fenoga po tolu ke he tutakale, kia eke poa ai e mautolu kia Iehova ha mautolu a Atua, neke ta e ia mautolu ke he tatalu po ke pelu.
4 Kua pehe age e patuiki a Aikupito kia laua, Mose mo Arona na e, ko e heigoa e mena ne fakanofonoa e mua e motu mai he tau gahua ha lautolu? Kia o a mutolu ke he tau kavega ha mutolu.
5 Kua pehe mai foki a Farao, Kitiala, ko e hanai, kua tokologa e tau tagata he motu; ka e fakaokioki e mua a lautolu mai he tau kavega ha lautolu.
6 Kua tala age foki e Farao ke he aho ia ni kia lautolu ne pule ke he tau gahua he motu mo e tau takitaki ha lautolu, kua pehe age,
7 Aua neke liu foki āge e mutolu e tau kakau saito ke he motu ke eke aki e tau maka kelekele tuga ne vaha kua mole; ka kia o a lautolu mo e okooko kakau saito ma lautolu ni;
8 Ka ko e katoa he tau maka kelekele ne eke e lautolu ke he vaha kua mole kia kotofa mau ia kia lautolu, aua neke fakatote kia lautolu; ha kua teva ni a lautolu, ko e mena ia ne tagi mai ai a lautolu, kua pehe mai, Toka ai a mautolu ke o, kia eke poa a mautolu ke he ha mautolu a Atua;
9 Kia mamafa e gahua ke he tau tagata, mo e eketaha a lautolu ki ai; ka e aua neke hagao atu a lautolu ke he tau kupu pikopiko.
10 Ti o age ai a lautolu ne pule ke he tau gahua he motu, mo e ha lautolu a tau takitaki, kua tala age a lautolu ke he motu, kua pehe age, Kua tala mai pehe a Farao, nakai tuai ta atu e au kia mutolu e tau kakau saito.
11 Kia o a mutolu mo e kumi kakau saito ma mutolu ni ke he tau mena ka moua ai, ha ko e mena nakai fakai ke fakatote ni e gahua ha mutolu ke he taha mena.
12 Ti mavehevehe fano ai e motu ke he kelekele oti a Aikupito, ke okooko gutugutu saito ke eke mo kakau saito.
13 Kua fakalagalaga foki e lautolu ne pule ke he gahua kua pehe atu, Kia fakakatoa e mutolu ha mutolu a tau gahua, ko e aho mo e hana gahua, tuga ne vaha ha i ai e tau kakau saito.
14 Ti fahi ai e tau takitaki he fanau Isaraela ko lautolu ne kotofa he tau leoleo gahua a Farao ke pule ke he tau tagata, kua pehe age, Ko e ha nakai fakakatoa ai e mutolu e gahua he tau maka kelekele ne kotofa kia mutolu neafi katoa mo e aho nai, tuga ne vaha fakamua?
15 Ti o atu ai e tau takitaki he fanau Isaraela kua tagi kia Farao, kua pehe, Ko e ha ne eke pihia ai ke he hau a tau fekafekau?
16 Nakai ta mai e tau kakau saito ke he hau a tau fekafekau, ka e pehe mai a lautolu kia mautolu, Kia eke a e tau maka kelekele; kitiala, kua fahi tuai hau a tau fekafekau ka ko e motu hau ne hehe.
17 Ti pehe mai a ia, Kua teva a mutolu, kua teva ni, ko e mena ia ne pehe mai ai a mutolu, Kia toka ai a mautolu ke o kia eke poa ai e mautolu kia Iehova.
18 Ko e hanai, o ā mutolu, ti gahau ni, nakai ta atu e tau kakau saito kia mutolu, ka kia ta mai e mutolu, e katoa he tau maka kelekele.
19 Ti iloa ai he tau takitaki he fanau Isaraela kua malaia a lautolu ha kua pehe mai, Nakai fakagahoa ni e mutolu e tau maka kelekele ke he taha aho mo e taha aho.
20 Kua feleveia a lautolu mo Mose mo Arona ha ne tutu mai ke he puhala, he o mai a lautolu ia Farao.
21 Ti pehe age ai a lautolu kia laua, Kia kikite e Iehova kia mua mo e fakafili ai, ha ko mua ni kua vihiatia ai a mautolu ki mua a Farao mo e hana tau fekafekau ke tuku ai e pelu ke he tau lima ha lautolu ke keli aki a mautolu.
22 Ti liu atu ai a Mose kia Iehova, mo e pehe atu, Ko e Iki na e, ko e heigoa e mena ne mahani kelea ai a koe ke he motu nai? ko e heigoa foki e mena ne fakafano atu ai e koe au?
23 Ha ko e mena tali mai he fano au kia Farao ke vagahau atu ke he hau a higoa, kua mahani kelea mai ai a ia ke he motu nai; kua nakai ni laveaki e koe hau a motu.