Esoto 7:1-25
7 NE pehe mai a Iehova kia Mose, Kitiala, kua kotofa e au a koe mo Atua kia Farao, ko e hau a matakainaga foki ko Arona, to eke a ia mo perofeta kia koe.
2 To talahau atu e koe e tau mena oti kana ke poaki atu e au kia koe; to vagahau atu foki a Arona hau a matakainaga kia Farao, kia tokai e ia e fanau Isaraela ke o kehe mo e hana motu.
3 To fakamao foki e au e loto a Farao, to fakaloga foki e au haku tau fakamailoga mo e haku tau mana ke he motu ko Aikupito.
4 Ka e nakai fanogongo mai a Farao kia mua; to fakaolo foki e au haku lima ki Aikupito, to ta hake foki e au haku tau kau ko e haku motu ni ko e fanau Isaraela mai he motu ko Aikupito mo e tau fakahala lalahi.
5 To iloa ai he tau tagata Aikupito, ko au ni ko Iehova, ka fakaolo atu e au haku lima ki luga a Aikupito; to ta hake e au e fanau a Isaraela mai loto ia lautolu.
6 Ti eke ai e Mose mo Arona tuga ne poaki mai e Iehova kia laua, ne eke pihia ai e laua.
7 Ko Mose foki kua valugofulu hana tau tau; ka ko Arona kua valugofulu ma tolu hana tau tau, he vagahau atu a laua kia Farao.
8 Kua vagahau mai foki a Iehova kia Mose mo Arona, kua pehe mai,
9 Ka vagahau mai a Farao kia mua, kua pehe mai, Kia eke e mua taha mana; ti pehe atu a koe kia Arona, Toto a hau a tokotoko, mo e liti hifo ki mua a Farao, ti faliu ai mo gata.
10 Ti o atu ai a Mose mo Arona kia Farao, kua eke e laua tuga ne poaki mai ai e Iehova; kua liti hifo e Arona hana tokotoko ki mua a Farao mo e hana tau fekafekau, ti faliu ai mo gata.
11 Ti ui ai e Farao ke he tau tagata iloilo mo e tau taulātua; kua eke pihia foki he tau taulātua a Aikupito ke he ha lautolu a tau lagatau taulātua.
12 Ha kua takitokotaha ia lautolu mo e liti hifo hana tokotoko, ti faliu ai mo gata; ka kua folo he tokotoko a Arona ha lautolu a tau tokotoko.
13 Kua fakamao e loto a Farao, kua nakai fanogonogo a ia kia laua, tuga ne tala mai ai e Iehova.
14 Kua pehe mai foki a Iehova kia Mose, Kua mao ni e loto a Farao, nakai maeke ia ia ke tokai e motu ke o.
15 Kia fano a koe kia Farao a pogipogi; kitiala, to fano a ia ke he vai; ti tu atu a koe ke feleveia mo ia ke he kauvai he vailele; ko e tokotoko foki ne faliu mo gata kia uta ai e koe ke he hau a lima.
16 Ti pehe atu a koe kia ia, Kua fakafano mai au e Iehova ko e Atua he tau tagata Heperu, kua pehe mai, Kia toka e koe haku motu ke o, kia fekafekau mai a lautolu kia au ke he tutakale; kitiala, kua nakai fanogonogo agaia a koe kia au.
17 Kua pehe mai a Iehova, Ko e mena nai ke iloa ai e koe, ko au ni ko Iehova; kitiala, to ta e au e vailele ke he tokotoko ha he lima haku, ti faliu ai mo toto;
18 To mamate ai e tau ika ha he vailele, to elo foki e vailele; ti vihiatia ai he tau tagata Aikupito e vai he vailele ke inu ai.
19 Ne tala mai foki e Iehova kia Mose, Kia pehe atu a koe kia Arona, Kia toto a hau a tokotoko, me e fakaolo atu hau a lima ki luga he tau vai a Aikupito, ke he tau vailele ha lautolu, mo e tau vailele ikiiki ha lautolu, mo e ha lautolu a tau loloto vai, mo e tau mena oti kana ha i ai ha lautolu a vai, kia faliu mo toto; kia ha i ai e toto ke he motu oti ko Aikupito, ke he tau kumete akau mo e tau kumete maka.
20 Ti kua eke pihia e Mose mo Arona, tuga ne talahau mai e Iehova, kua nikiti ki luga e tokotoko, mo e ta e vai he vailele ki mua a Farao mo e hana tau fekafekau; ti faliu ai mo toto e vai oti kana he vailele.
21 Ti mamate ai e tau ika ha ha he vailele, kua elo foki e vailele, kua nakai maeke e tau tagata Aikupito ke inu e vai he vailele; ha i ai e toto ke he motu oti ko Aikupito.
22 Ti eke pihia ai he tau taulātua a Aikukito ke he ha lautolu a tau lagatau taulātua; ti fakamao ai e loto a Farao, ti nakai fanogonogo foki kia laua tuga ne tala mai e Iehova.
23 Ti liu ai a Farao, kua fano ke he hana fale, kua nakai manamanatu foki a ia ke he mena ia ni.
24 Ti keli ai he tau tagata Aikupito oti kana ke he tapa he vailele ke moua ai e vai ke inu ai a lautolu; ha kua nakai maeke ia lautolu ke inu e vai mai he vailele.
25 Kua katoa foki e po fitu, tali mai he ta e Iehova e vailele.