Esoto 9:1-35
9 KUA pehe mai a Iehova kia Mose, Kia hu atu a koe kia Farao, mo e tala age kia ia, Kua pehe mai e vagahau a Iehova ko e Atua he tau tagata Heperu, Kia toka e koe haku motu ke o, kia fekafekau mai a lautolu kia au.
2 Ha ko e mena ka nakai maeke ia koe ke toka a lautolu ke o, ka e taofi mau a lautolu,
3 Kitiala, to hoko e lima a Iehova ke he hau a tau manu ha he fonua, ko e tau solofanua, mo e tau asini, mo e tau kamela, mo e tau povi, mo e tau mamoe, ko e tatalu mamafa lahi ni.
4 Ka e vevehe kehe e Iehova e tau manu a Isaraela mo e tau manu a Aikupito; ti nakai ni mate ha mena taha he tau mena oti he fanau a Isaraela.
5 Ti kotofa ai e Iehova kua pehe mai, A pogipogi to eke e Iehova e mena nai ke he motu.
6 Ti eke ai e Iehova e mena ia ke he aho a pogipogi, kua mamate ai e tau manu oti a Aikupito, ka e nakai mate ha manu taha he fanau a Isaraela.
7 Ti ahi atu e Farao, kitiala, nakai mate ha manu taha ni a Isaraela; ka e fakamao ni e loto a Farao, ti nakai toka e ia e motu ke o.
8 Ti pehe mai a Iehova kia Mose mo Arona, Kia fakapuke ha mua a tau lima ke he efuefu mai he umu, ti liti hake ki luga e Mose ki mua a Farao.
9 Ti eke ia mo efuefu ikiiki ke he motu oti kana ko Aikupito, to eke foki ia ki luga he tau tagata, ki luga foki he tau manu mo fakafoha ke papa ai e koloputa ke he motu oti ko Aikupito.
10 Ti uta ai e laua e efuefu mai e umu mo e tutu a laua ki mua ki mua a Farao, ti liti hake ai e Mose ki luga, ti eke ai mo fakafoha ke papa ai e koloputa ke he tau tagata, katoa mo e tau manu.
11 Ti kua nakai maeke ke he tau taulaatua ke tutu ki mua a Mose ka ho e tau fakafoha; ha ko e mena ha i ai e fakafoha ke he tau taulaatua, katoa mo Aikupito oti kana.
12 Ka e fakamao e Iehova e loto a Farao, ti nakai fanogonogo a ia kia laua, tuga ne kupu a Iehova kia Mose.
13 Ti pehe mai ai a Iehova kia Mose, Kia uhu matike a koe a pogipogi mo e tu a koe ki mua a Farao, mo e tala age a koe kia ia, Kua pehe mai e vagahau a Iehova ko e Atua he tau tagata Heperu, Kia toka e koe haku motu ke o, kia fekafekau mai a lautolu kia au;
14 Ha ko e vaha nai ni ke fakafano atu e au haku a tau malaia oti kana ki luga ia koe, mo e hau a tau fekafekau mo e hau a motu, kia iloa ai e koe kua nakai ni taha ke tuga na au ke he lalolagi oti kana.
15 Hanai, ane fakaolo atu haku lima, mo e ta a koe mo e hau a motu ke he tatalu, a kua mahakava tuai a koe mai he lalolagi.
16 Ko e moli, ko e mena ia ni kua fakatu ai e au a koe, kia fakakite e au haku mana kia koe, kia talahaua ai foki haku a higoa ke he lalolagi oti.
17 Ka e fakatokoluga agaia kia a koe ke he haku motu, he nakai toka e koe a lautolu ke o?
18 Kitiala, ko e magaaho pehenai a pogipogi to fakato hifo ai e au e uha tuli lahi mahaki ni, nakai pihia ha mena i Aikupito tali mai he nofo ai e tau tagata, kua hoko ni ke he aho nai.
19 Hanai, kia fakafano atu e koe ke ta mai ke he mena malu hau a tau manu, mo e tau mena oti hau ha he fonua; ko e tau tagata oti katoa mo e tau manu ke moua ke he fonua kua nakai fakapotopoto ke he tau fale, to hifo ki luga ia lautolu e uha tuli, ti matepopo ai.
20 Ko ia ha he tau fekafekau a Farao ne matakutaku ke he kupu a Iehova, kua tala age a ia ke fehola hana tau fekafekau, mo e hana tau manu ke he tau fale;
21 Ka ko ia kua fakateaga ke he kupu a Iehova, kua toka ai e ia hana tau fekafekau, mo e hana tau manu ke he fonua.
22 Ti pehe mai ai a Iehova kia Mose, Kia fakaolo hau a lima ki luga, ti to hifo ai e uha tuli ke he motu oti ko Aikupito, ki luga ni he tau tagata mo e tau manu, mo e tau akau mateafu oti ha he fonua ke he motu ko Aikupito.
23 Ti fakaolo hake ai e Mose hana tokotoko ki luga; ti tuku mai ai e Iehova e pakulagi mo e uha tuli, kua totolo foki e afi ke he kelekele; kua fakato hifo foki e Iehova e uha tuli ke he motu ko Aikupito.
24 Ti ha i ai e uha tuli mo e afi kua fiofio mo e uha tuli, kua mamafa lahi ni, nakai pihia ha mena ke he motu oti ko Aikupito tali mai he nofo ai e tau tagata.
25 Kua tokia e kelekele oti kana a Aikupito he uha tuli, ko e tau mena oti ha he fonua ko e tau tagata katoa mo e tau manu, mo e tau akau mateafu oti he fonua, kua tokia oti kana ni he uha tuli; kua fatifati foki e tau akau oti kana he fonua.
26 Ka ko e magamotu ko Kosena hokoia ne nofo ai e fanau a Isaraela, nakai ha i ai ha uha tuli.
27 Ti fekau atu e Farao mo e ui atu kia Mose mo Arona, kua pehe atu kia laua, Kua hala tuai au a enei; kua tututonu a Iehova ka ko au mo e haku motu kua mahani kelea a mautolu;
28 Kia ole a mua kia Iehova, kia fakahiku e tau pakulagi lalahi katoa mo e uha tuli; ti toka atu e au a mutolu ke o, ti aua neke nonofo a mutolu.
29 Ti pehe atu a Mose kia ia, Ka hoko atu au ki tua he maga, ti nikiti e au haku tau lima kia Iehova; ti mole ai e pakulagi, ti nakai tuai fai uha tuli; kia iloa ai e koe ha Iehova e lalolagi.
30 Ka ko koe mo e hau a tau fekafekau, kua iloa e au nakaila matakutaku a mutolu kia Iehova e Atua.
31 Na maona e lino mo e karite; ha kua fua tuai e karite, ti fiti ni e lino;
32 Ka ko e saito mo e kaseme, kua nakai maona ia, ha kua mui agaia.
33 Ti fina atu a Mose ia Farao ki tua he maga, mo e nikiti hana tau lima kia Iehova, ti mole ai e pakulagi mo e uha tuli; kua nakai tuai to foki e uha ke he kelekele.
34 Kua kitia e Farao kua mole tuai e uha, mo e uha tuli mo e pakulagi, ti au atu ai he hala a ia, kua fakamao hana loto, ko ia katoa mo e hana tau fekafekau.
35 Ti fakamao ai e loto a Farao, ti nakai toka e ia e fanau Isaraela ke o, tuga ne kupu a Iehova kia Mose.