Fakakiteaga 11:1-19
11 KUA tuku mai foki kia au e kaho tuga ne tokotoko; kua tu mai foki e agelu, kua pehe mai, Ati tu a, mo e fafati e koe e faituga he Atua, mo e fatapoa, mo lautolu kua hufeilo ki ai;
2 Ka ko e pa he faituga i tua, tiaki ia, ua foki fafati e koe, ha kua tuku atu ia ke he tau motu kehe; to holia foki e lautolu e māga tapu ke he fagofulu ma ua e mahina.
3 To tuku atu foki e au ke he haku a tau tagata talahau mena ne tokoua ke perofeta ai ke he tau aho ne taha e afe ti ua e teau mo e onogofulu, kua tapulu a laua ke he ie talatala.
4 Ko e tau akau olive ia ne ua, mo e tau tuāga lamepa ne ua kua tutu ki mua he Atua he lalolagi.
5 Kaeke foki kua fia fakakelea e taha a laua, ti fina atu ai e afi mai he tau gutu ha laua ke fakaotioti a lautolu kua eke a laua mo tau fi ha lautolu; kaeke foki ke fia fakakelea e taha a laua, to kelipopo pihia a ia ke lata ai.
6 Ha ia laua e pule ke puipui e lagi, kia nakai to mai e uha ke he tau aho he perofetaaga ha laua; ha ha ia laua foki e pule ke he tau vai, ke faliu mo toto, ke tā foki e laua e lalolagi ke he tau malaia oti, ha laua a pule po ke laga fiha.
7 Ka fakaoti e laua ha laua a talahau, ti tau ai kia laua e manu favale, ko ia kua hake mai he pahua nakai gata mai, to kautu foki a ia kia laua, mo e kelipopo a laua.
8 To takaveli e tau tino ha laua ke he puhala he māga lahi, ko ia kua higoa fakalata ke he agaga, ko Sotoma mo Aikupito, ko e mena foki ne fakasatauro ai e Iki ha tautolu.
9 Tolu la e aho, ti taha e aho kua vevehe ua ke kitekite ke he tau tino ha laua e falu mai he tau motu, mo e tau faoa, mo e tau vagahau kehekehe, mo e tau atu motu, ti nakai maeke kia lautolu ke tuku e tau tino ha laua ke he tau tukuaga.
10 To fiafia foki a lautolu kua nonofo ke he motu ha ko laua, mo e kolikoli a lautolu, mo e feutaaki e tau mena fakaalofa; ha ko e mena ne fakamamahi he na perofeta tokoua a lautolu kua nonofo ke he motu.
11 Kua mole atu foki e tolu a aho mo e maga he aho ne vevehe ua, ti hu atu ai kia laua e agaga moui mai he Atua, ti tutu hake ai a laua ke he tau hui ha laua, ti hoko ai e matakutaku lahi kia lautolu ne kitekite kia laua.
12 Ti logona ai e laua e leo lahi mai he lagi, kua pehe atu kia laua, Hake mai a ki hinei. Ti hake ai a laua ke he lagi ke he aolagi; kua kitekite foki kia laua a lautolu ne fai fi kia laua.
13 Ko e magaaho ia ni ne to ai e mafuike lahi, ti veli ai e mena ne hogofulu aki e māga, kua mamate foki ke he mafuike e tau tagata ne fitu la e afe; kua matakutaku foki a lautolu ne toe, ti fakaheke atu ai a lautolu ke he Atua he lagi,
14 Kua mole atu tuai e oi ne ua aki; kitiala, ko e oi ne tolu aki ke hoko vave mai.
15 Kua fakatagi foki he agelu ne tokofitu aki e pu, ti ha i ai ke he lagi e tau leo lalahi, kua pehe mai, Ko e tau kautu he lalolagi kua eke ma e Iki ha tautolu mo e hana Keriso, to eke foki a ia mo patuiki tukulagi tukumuitea.
16 Ko e tau patu foki ne tokouafulu ma fa kua nonofo ke he tau nofoaiki ha lautolu ki mua he Atua, kua fakaveveli fakafohifo a lautolu, mo e hufeilo ke he Atua,
17 Kua pehe atu, Ko e Iki na e, ko e Atua ha i ai e malolo oti kana, kua fakaaue atu a mautolu kia koe, ko koe kua moui ni, ne moui tuai foki, ko koe foki ke haele mai, ha kua toto e koe hau a malolo lahi, kua eke foki a koe mo patuiki.
18 Ne ita foki e tau motu; kua hoko mai tuai hau a ita, mo e vaha ke fakafili ai a lautolu kua mamate, ke taui ai foki hau a tau fekafekau ko e tau perofeta, mo e tau tagata tapu, mo lautolu kua matakutaku ke he hau a higoa, ko e tau lalo tagata katoa mo e tau iki, ke moumou ai foki a lautolu kua moumou e lalolagi.
19 Kua hafagi foki e faituga he Atua ha he lagi, ti kitia ai ke he hana faituga e puha he hana maveheaga; ti tutupu e tau uhila, mo e tau leo, mo e tau pakulagi, mo e tau mafuike, mo e tau uha tuli lalahi.