Fakakiteaga 13:1-18
13 KUA tu au ke he oneone he mataafaga; ti kitia atu ai e au e manu favale kua hake mai he tahi, ne fitu la e tau ulu hana mo e tau hoe ne hogofulu; ha he tau hoe foki hana e tau foufouiki ne hogofulu, ha i luga foki he tau ulu hana e higoa amuamu.
2 Ko e manu favale foki ne kitia e au, tuga ne nameri a ia, ko e hana tau hui foki tuga ne tau hui urosa ia, mo e hana gutu tuga ne gutu he leona ia. Ne ta age foki he tarako kia ia hana malolo, mo e hana nofoaiki, mo e pule lahi.
3 Ne kitia foki e au e taha he hana tau ulu tuga ne mena kua maihi ke mate; ka ko e hana maihi ne eke ke mate ai kua mafu tuai, ti ofomate ai e lalolagi oti ne mumui atu ke he manu favale.
4 Kua hufeilo foki a lautolu ke he tarako ne ta age e pule ke he manu favale, kua hufeilo foki ke he manu favale, kua pehe atu, Ko hai kia e taha ke tuga e manu favale? Ko hai kia e taha kua maeke ke tau kia ia?
5 Kua ta age foki kia ia e gutu ke vagahau ai e tau mena lalahi mo e tauamuamu; kua age foki kia ia e pule ke tau ke he tau mahina ne fagofulu ma ua.
6 Ti vagahau atu ai a ia e tau kupu kelea ke he Atua, kua kupu kelea ke he hana higoa, mo e hana fale uta fano, katoa mo lautolu kua nonofo ke he lagi.
7 Kua tuku age foki kia ia ke tau ke he tau tagata tapu, kia kautu foki kia lautolu; kua age foki kia ia e pule ke he tau magafaoa oti, mo e tau vagahau kehekehe, mo e tau motu.
8 Kua hufeilo foki kia ia a lautolu oti kua nonofo ke he lalolagi, ko lautolu kua nakai tohi ha lalu tau higoa ke he tohi he moui he Punua mamoe ne tamate tali mai he fakaveaga he lalolagi.
9 Kaeke kua fai teliga e taha, kia fanogonogo mai a a ia.
10 Kaeke ke takitaki e taha falu ke he fakapaeaga, to fano foki a ia ke he fakapaeaga; kaeke ke kelipopo e taha falu ke he pelu, to kelipopo foki a ia ke he pelu ke lata ai. Ko e mena hanā ha i ai e fakauka mo e tua he tau tagata tapu.
11 Ne kitia foki e au taha manu favale kua hake mai he fonua, ha ia ia foki e na hoe ne ua tuga ne tau hoe he punua mamoe, ka kua vagahau a ia po ke tarako.
12 Kua eke foki e ia e pule oti he manu favale fakamua ki mua hana; ko ia foki kua hufeilo ai e lalolagi mo lautolu kua nonofo ai ke he manu favale fakamua, ne mafu e maihi he hana ulu ne eke ke mate ai;
13 Kua eke foki e ia e tau fakamailoga lalahi, kua eke foki e ia, ti to hifo ai e afi mai he lagi ke he lalolagi ki mua he tau tagata.
14 Kua fakahehe foki e ia a lautolu kua nonofo ke he lalolagi he tau fakamailoga ne tuku kia ia ke eke ki mua he manu favale, ha kua tala age a ia kia lautolu kua nonofo ke he lalolagi ke eke e lautolu e fakatino he manu favale ne tuina he pelu ka kua moui ni.
15 Kua tuku age foki kia ia ke ta atu e fafagu ke he fakatino he manu favale, kia vagahau ai e fakatino he manu favale, kia hoko foki e mate kia lautolu oti kua nakai hufeilo ke he fakatino he manu favale.
16 Kua eke foki e ia ke fakamailoga e tau tagata oti, ko e tau lalo tagata katoa mo e tau iki, ko e tau tagata maukoloa mo lautolu kua nonofogati ko e tau tagata toka noa mo lautolu kua fakatupa, kia fakamailoga ia a lautolu ke he tau lima matau ha lautolu, po ke tau matale ha lautolu;
17 Kia nakai maeke foki ia taha ke fakafua mai po ke fakafua atu, ka ko lautolu hoko lautolu ha ha i ai e fakamailoga, po ke higoa he manu favale, po ke totouaga he hana higoa.
18 Ko e mena hanai ha ha i ai e iloilo. Ko ia ha i ai e loto matala kia totou ne ia e totouaga he manu favale, ha ko e totouaga ia he tagata; ko e hana totouaga foki ko e ono e teau ti ono e hogofulu ma ono.