Fakakiteaga 14:1-20
14 NE kitia atu au, kitiala foki, kua tu mai e Punua mamoe ke he mouga ko Siona, kua fakalataha foki mo ia e tau tagata ne teau e afe ti fagofulu ma fa e afe, kua tohi e higoa he hana Matua ke he tau matale ha lautolu.
2 Kua logona foki e au e leo mai he lagi tuga ne go he tau vai loga, tuga ne tomumu foki he pakulagi lahi; kua logona foki e au e leo ha lautolu ne ta e tau kitara ha ne ta e tau kitara ha lautolu.
3 Kua lologo foki e lautolu po ke lologo fou ki mua he nofoaiki, mo mua he tau mena momoui ne fa, mo e tau patu; kua nakai maeke foki ia taha ke ako e lologo ia, ka ko e teau e afe mo e fagofulu ma fa e afe hoko lautolu, ko lautolu ne fakafua mai he lalolagi.
4 Ko lautolu ia kua nakai fakakelea he tau fifine, ha ko e tau paretanoi a lautolu; ko lautolu ia kua mumui atu ke he Punua mamoe ke he tau mena oti kua fano a ia ki ai; ko lautolu ia ne fakafua mai he tau tagata, ko e tau fua uluaki ma e Atua mo e Punua mamoe;
5 Kua nakai moua foki ha pikopiko ke he tau gutu ha lautolu; ha kua nakai fai tepu a lautolu ki mua he nofoaiki he Atua.
6 Ne kitia foki e au e taha agelu kua lele ke he pulagi, ha ia ia e vagahau mitaki tukulagi ke fakamatala atu kia lautolu kua nonofo ke he lalolagi, mo e tau motu kehe oti, mo e tau magafaoa, mo e tau vagahau kehekehe, mo e tau motu,
7 Kua pehe atu mo e leo lahi, Kia matakutaku a mutolu ke he Atua; mo e ta age kia ia e fakahekeaga, ha kua hoko mai e magaaho he hana fakafiliaga; kia hufeilo foki a mutolu kia ia ne eke e lagi, mo e lalolagi, mo e tahi, mo e tau vai puna.
8 Ti mui atu ai e taha agelu, kua pehe atu, Kua veli, kua veli a Papelonia ko e maga lahi, ha kua fakainu e ia e tau motu oti ke he uaina he ita he hana feuaki.
9 Ti mui atu ai kia laua e agelu kua tolu aki, kua pehe atu mo e leo lahi, Kaeke kua hufeilo e taha ke he manu favale mo e hana fakatino, mo e talia e fakamailoga ke he hana matale po ke hana lima,
10 Ti inu ni a ia ke he uaina he ita he Atua kua liligi nakai fiofio ke he kapiniu he hana ita; to matematekelea foki a ia ke he afi mo e taio ki mua he tau agelu, ki mua foki he Punua mamoe;
11 Kua hake foki e ahua he matematekelea ha lautolu tukulagi tukumuitea, kua nakai okihia foki a lautolu ke he aho mo e po, ko lautolu kua hufeilo ke he manu favale mo e hana fakatino, mo lautolu oti foki kua talia e fakamailoga he hana higoa.
12 Ko e mena haia ha i ai e fakauka he tau tagata tapu; ko e mena haia ha i ai a lautolu kua taofi e tau poaki he Atua mo e tua kia Iesu.
13 Ne logona foki e au e leo mai he lagi, kua pehe mai kia au, Kia tohi ā, Kua monuina a lautolu kua mamate, ko lautolu kua mamate ha he Iki, kua kamata ke he vaha nai. Haia ni, kua talahau mai ai he Agaga, kia okioki ai a lautolu mai he tau gahua mamafa ha lautolu; ko e tau gahua foki ha lautolu kua muimui atu kia lautolu.
14 Ne kitia e au, kitiala, ko e aolagi hina, kua nofo foki ki luga he aolagi taha tuga ne Tama he tagata, ha he fufuga hana e foufou auro ha he lima foki hana e helesaito matila.
15 Kua fina atu foki e taha agelu mai he faituga, kua ui mo e leo lahi kia ia ne nofo ki luga he aolagi, Kia fakahoko atu hau a helesaito mo e helehele e saito, ha kua hoko tuai ke he vaha ke helehele ai e koe, ha kua motua tuai e tau saito he lalolagi.
16 Ti fakahoko mai ai e ia kua nofo ki luga he aolagi hana a helesaito ke he lalolagi, ti helehele ai e lalolagi.
17 Kua fina atu foki e taha agelu mai he faituga ha he lagi, ha ha ia ia foki e helesaito matila.
18 Ko e taha agelu foki kua fina atu mai he fatapoa, ha ia ia e pule ke he afi; kua ui foki a ia mo e leo lahi kia ia ha i ai e helesaito matila, kua pehe atu, Kia fakahoko atu hau a helesaito matila, mo e hahala mai e tau fuhi vine he tau vine he lalolagi, ha kua momoho mitaki hana tau fuhi vine.
19 Ti fakahoko ai he agelu hana helesaito ke he lalolagi, mo e hahala e ia e vine he lalolagi, kua liti atu foki e ia ki loto he holiaga vine lahi he ita he Atua.
20 Kua holia foki e holiaga vine ki tua he māga, kua lele atu foki e toto mai he holiaga vine, kua hoko hake ke he tau taofi gutu he tau solofanua, taha e afe ti ono e teau e tau satatio he vaha loto.