Fakakiteaga 15:1-8
15 NE kitia foki e au ke he lagi e taha fakamailoga lahi ke ofo ai, ko e tau agelu tokofitu ha ha i ai e tau malaia ne fitu la ke fakaoti aki; ha kua fakakatoatoa ai e ita he Atua.
2 Ne kitia foki e au e mena tuga ne tahi tioata kua fiofio mo e afi; ko lautolu foki kua kautu ke he manu favale, mo e fakatino hana, mo e hana fakamailoga, mo e totouaga he hana higoa, kua tutu a lautolu ki luga he tahi tioata, ha ia lautolu e tau kitara he Atua.
3 Kua lologa foki a lautolu e lologo a Mose e fekafekau he Atua, mo e lologo he Punua mamoe, kua pehe atu, Ko e Iki na e, ko e Atua mana, kua lalahi hau a tau gahua ke ofomate ai, kua tonu mo e fakamoli hau a tau puhala, ko e Patuiki he tau tagata tapu na e.
4 Ko hai kia taha, ma Iki na e, kua nakai matakutaku kia koe, mo e nakai fakaheke atu ke he hau a higoa? ha ko koe hoko koe ni kua mitaki; ha ko e mena to o mai e tau motu oti, mo e hufeilo ki ho mua; ha kua fakakite mai tuai hau a tau fakafiliaga tonu.
5 Kua mole e tau mena ia, ti kitia atu ai e au, kitiala, kua hafagi ke he lagi e faituga he fale uta fano he fakakiteaga;
6 Ti o atu ai mai he faituga e tau agelu tokofitu ha ha i ai e tau malaia ne fitu la, kua tapulu a lautolu ke he lino kua mea mo e kikila, kua pipi foki ha lautolu a tau fatafata ke he tau pipi auro.
7 Ko e taha foki he tau mena momoui ne fa kua age e ia ke he tau agelu tokofitu e tau kapiniu auro ne fitu, kua puke ke he ita he Atua ko ia kua moui tukulagi tukumuitea.
8 Kua puke foki e faituga ke he ahua he lilifu he Atua, katoa mo e mana hana; kua nakai maeke foki ia taha ke hu atu ke he faituga, ato fakaoti he tau agelu tokofitu e tau malaia ne fitu.