Fakakiteaga 17:1-18
17 KUA hau foki e taha he tau agelu tokofitu ha i ai e tau kapiniu ne fitu, kua vagahau mai a ia kia au, kua pehe mai kia au, Ati hau ā, to fakakite atu e au kia koe e fakahala he fifine fakataka lahi kua nofo ki luga he tau vai loga;
2 Kua feuaki mo ia e tau patuiki he lalolagi kua konahia foki a lautolu kua nonofo ke he lalolagi, ke he uaina he feuaki hana.
3 Kua uta foki e ia au ke he Agaga; ke he tutakale ti kitia ai e au e fifine kua nofo ki luga he manu favale kula, kua puke ke he tau higoa amuamu, ne fitu la hana tau ulu, ti hogofulu e hoe.
4 Kua tapulu foki e fifine ke he ie uhi mo e kula, kua fakatufele foki ke he auro, mo e tau maka uho mo e tau penina, ha ha he lima hana e kapiniu auro kua puke ke he tau mena vihiatia mo e kelea he hana tau feuaki,
5 Kua tohi foki ke he hana matale a higoa, KO E MENA GALO, PAPELONIA, KO E MAGA LAHI, KO E MATUA HE TAU FIFINE FAKATAKA, MO E TAU MENA VIHIATIA HE LALOLAGI.
6 Ne kitia foki e au e fifine kua konahia ke he toto he tau tagata tapu, mo e toto he tau talahau kia Iesu; kua kitia e au a ia, ti ofomate lahi ni au.
7 Ti pehe mai ai e agelu kia au, Ko e ha kia ne ofomate ai a koe? To tala atu e au kia koe e alito galo he fifine, mo e manu favale kua heke e ia, ne fitu la hana tau ulu, ti hogofulu e hoe.
8 Ko e manu favale ne kitia e koe, ne moui a ia, ti kua nakai moui foki to hake foki a ia mai he pahua nakai gata mai, to fina atu foki a ia ke he malaia; ko lautolu kua nonofo ke he lalolagi, (kua nakai tohia ha lautolu a tau higoa ke he tohi he moui tali mai he fakaveaga he lalolagi,) to ofomate a lautolu he kitia e lautolu e manu favale ko ia ne moui, ti kua nakai moui, ka e pete ia kua moui agaia.
9 Ko e mena hanai ha i ai e loto hana e iloilo. Ko e tau ulu ne fitu ko e tau mouga haia ne fitu, kua nofo ai e fifine;
10 Ko e tau patuiki foki ia ne tokofitu; kua veveli tuai e tokolima, toka agaia foki e taha, kua nakai la hoko mai foki e taha, ka hoko mai a ia ti tumau ai a ia ke he vaha tote ke lata ai.
11 Ko e manu favale foki ne moui, ti kua nakai moui, kua tokovalu aki a ia, mai he tokofitu foki a ia, kua fina atu foki a ia ke he malaia.
12 Ko e tau hoe foki ne hogofulu ne kitia e koe, ko e tau patuiki ne tokohogofulu haia, kua nakai la moua e lautolu ha kautu, ka e moua e lautolu e pule tuga e patuiki ke he taha magaaho fakalataha mo e manu favale.
13 Kua loto fakalataha a lautolu nai, to ta age foki e malolo mo e pule ha lautolu ke he manu favale.
14 To tau a lautolu nai ke he Punua mamoe, ka e kautu e Punua mamoe kia lautolu; ha ko ia ko e Iki he tau iki mo e Patuiki he tau patuiki, ko lautolu foki kua fakalataha mo ia kua uiina, mo e fifili, mo e fakamoli.
15 Kua tala mai foki a ia kia au, Ko e tau vai ne kitia e koe, kua nofo ki ai e fifine fakataka, ko e tau motu ia, mo e tau moto tagata, mo e tau atu motu, mo e tau vagahau kehekehe.
16 Ko e tau hoe foki ne hogofulu ne kitia e koe ke he manu favale, to fakavihia e lautolu e fifine fakataka mo e moumou a ia, mo e uta kehe hana tau tapulu, to kai foki e lautolu hana tino, mo e huhunu a ia ke he afi.
17 Ha kua tuku atu he Atua ke he tau loto ha lautolu ke eke hana finagalo, kia loto fakalataha foki a lautolu, ke ta age foki e lautolu ha lautolu a tau kautu ke he manu favale, ato fakakatoatoa ai e tau kupu he Atua.
18 Ko e fifine foki ne kitia e koe, ko e māga lahi haia, ha i ai e pule ke he tau patuiki he lalolagi.