Fakakiteaga 19:1-21
19 KUA mole e tau mena ia, ti logona ai e au tuga ne leo lahi he moto tagata tokologa ha ha he lagi, kua pehe atu, Haleluia; kia ha ha he Iki ha tautolu a Atua e fakamouiaga, mo e fakahekeaga mo e lilifu, mo e malolo;
2 Ha kua fakamoli, to tonu hana tau fakafiliaga; ha kua fakafili e ia e fifine fakataka lahi, ko ia ne fakakelea e lalolagi ke he hana feuaki, ti kua taui tuai e ia kia ia ni e toto he hana tau fekafekau.
3 Kua liu foki tala atu e lautolu, Haleluia ti hake ai hana ahua tukulagi tukumuitea.
4 Kua veveli fakafohifo foki e tau patu tokouafulu ma fa, mo e tau mena momoui ne fa, ti hufeilo ke he Atua kua nofo ke he nofoaiki kua pehe atu, Amene; Haleluia.
5 Kua hoko mai foki e leo mai he nofoaiki, kua pehe mai, Kia fakaheke ke he Atua ha tautolu, ko mutolu hana tau fekafekau oti, mo mutolu kua matakutaku kia ia, ko e tau lalo tagata katoa mo e tau iki.
6 Kua logona foki e au tuga ne leo he moto tagata tokologa, tuga foki e go he tau vai loga, tuga foki e tomumu he tau pakulagi lalahi, kua pehe atu, Haleluia; ha kua eke mo patuiki e Iki ko e Atua hana e malolo oti kana.
7 Kia fiafia a tautolu mo e kolikoli mo e tuku atu e fakahekeaga kia ia; ha kua hoko mai e taonaga he Punua mamoe, ko e hana hoana foki kua taute tuai e ia a ia.
8 Kua tuku atu kia ia ke tapulu a ia ke he ie mitaki, kua mea mo e kikila; ha ko e ie mitaki ko e tututonu ia he tau tagata tapu.
9 Kua tala mai foki a ia kia au, Kia tohi ā, Uhoaki a lautolu kua talahaua ke o mai ke he taonaga he Punua mamoe. Kua tala mai foki a ia kia au, Ko e tau kupu moli ia he Atua.
10 Ti fakaveli fakafohifo ai au ki mua he na ve hana mo e hufeilo kia ia; ti tala mai a ia kia au, A koe, aua ia; ko au ko e hau a matakainaga a fekafekau, ko e taha foki he hau a tau matakainaga ne toka ai e talahauaga kia Iesu; kia hufeilo ke he Atua; ha ko e talahau kia Iesu ko e agaga ia he perofetaaga.
11 Ne kitia foki e au e lagi kua hafagi, kitiala, ko e solofanua hina, ko ia foki kua heke ai kua higoa a ia ko e Fakamoli, mo e Moli, ko e tututonu foki ne fakafili ai e ia, mo e tau ai.
12 Tuga ne puho he afi hana na fofoga ha i luga foki hana fufuga e tau foufouiki loga; ha ia ia e higoa kua tohia kua nakai iloa e taha, ka ko ia ni hokoia.
13 Kua tapulu foki a ia ke he tapulu kua fuifui ke he toto; kua fakahigoa foki a ia, Ko e Loko he Atua.
14 Ne mumui atu foki kia ia e tau kau ha ha he lagi, kua heke e tau solofanua hina, kua tapulu foki a lautolu ke he tau tapulu ie mitaki kua hina mo e mea.
15 Kua fina atu foki mai he fofoga hana e pelu matila, ke ta aki e ia e tau motu; to pule foki a ia kia lautolu ke he tokotoko lapatoa; to holi foki e ia e holiaga vine he ita lahi he Atua hana e malolo oti kana.
16 Ha ha ia ia foki e higoa kua tohi ke he hana tapulu mo e hana tega, KO E PATUIKI HE TAU PATUIKI, MO E IKI HE TAU IKI.
17 Ne kitia foki e au e taha agelu kua tu ke he la; kua ui foki a ia mo e leo lahi, kua pehe atu ke he tau manu lele oti kua lele ke he pulagi, likoliko, O mai a, mo e fakapotopoto age a mutolu ke he kaiaga mena he Atua lahi,
18 Kia kai e mutolu e tau tino he tau patuiki, mo e tau tino he tau iki he tau kau, mo e tau tino he tau tagata malolo, mo e tau tino he tau solofanua mo lautolu kua heke ai, mo e tau tino he tau tagata oti, ko lautolu kua toka noa katoa mo e tau tupa, ko e tau lalo tagata katoa mo e tau iki.
19 Ti kitia ai e au e manu favale, mo e tau patuiki he lalolagi, mo e tau kau ha lautolu, kua fakapotopoto ke tau kia ia kua heke e solofanua mo e hana tau kau.
20 Ti tapaki ai e manu favale katoa mo e perofeta pikopiko, ko ia ne eke e tau fakamailoga ki mua hana, kua fakahehe ai a lautolu ne talia e fakamailoga he manu favale, mo lautolu kua hufeilo ke he hana fakatino; kua liti moui a laua ke he loloto afi kua vela ke he taio.
21 Ka ko lautolu kua toe kua kelipopo a lautolu ke he pelu kua fina atu he fofoga hana kua heke e solofanua; kua mamakona foki e tau manu lele oti he tau tino ha lautolu.