Fakakiteaga 2:1-29
2 KIA tohi e koe ke he agelu he ekalesia i Efeso, Ko e tau mena nai kua talahau mai e ia kua toto e tau fetu ne fitu ke he lima matau hana, ko ia kua faifano ke he vaha loto he tau tuāga lamepa auro ne fitu,
2 Kua iloa e au hau a tau gahua, mo e hau a gahua lahi, mo e hau a fakauka, kua nakai maeke kia koe ke ha i ai a lautolu kua mahani kelea; kua kamatamata foki a lautolu kua talahau mai ko e tau aposetolo a lautolu, ka e nakai fakai; kua iloa foki e koe ko e tau tagata pikopiko a lautolu,
3 Kua fakauka foki a koe, to ha ia koe e fakamanavalahi, kua gahua fakalahi foki a koe ha ko e haku a higoa, ka e nakai fakalolelole.
4 Ka kua iloa e au taha mena kia koe, ha kua toka e koe hau a fakaalofa fakamua.
5 Ko e hanai, kia manatu e mena ne to mai ai a koe, ti tokihala, mo e eke e tau gahua fakamua; ka nakai, ti fina atu vave au kia koe, mo e uta kehe hau a tuāga lamepa mai he mena ne tu ai, kaeke ke nakai tokihala a koe.
6 Ka e ha ia koe e mena nai, kua vihiatia e koe e tau gahua he tau tagata Nikalaitai, ko au foki kua vihiatia ai.
7 Ko ia kua fai teliga, kia fanogonogo a a ia ke he mena kua talahau mai he Agaga ke he tau ekalesia. Ko ia kua kautu, to foaki e au kia ia ke kai ke he akau he moui ha i loto he Parataiso he Atua.
8 Kia tohi foki e koe ke he agelu he ekalesia i Semurana, Ko e tau mena nai kua tala mai a ia kua fakamua, ko ia foki kua fakamui, ko ia ne mate, ka kua moui mai,
9 Kua iloa e au hau a tau gahua, mo e hau a matematekelea, mo e hau a nofogati, (ka kua maukoloa ni a koe,) mo e kupu kelea ha lautolu kua tala mai ko e tau tagata Iutaia a lautolu, ka e nakai fakai, ka ko e sunako a Satani a lautolu.
10 Ua matakutaku a koe ke he tau mena ko e mamahi ai ha ne fai a koe. Kitiala, ko e tuku ne fai he tiapolo e falu a mutolu ke he fale puipui, kia kamatamata ai a mutolu; to po hogofulu foki ke matematekelea ai a mutolu. Kia fakamoli a koe ato hoko ke he mate, ti ta atu ai e au e foufou he moui kia koe.
11 Ko ia kua fai teliga, kia fanogonogo a a ia ke he mena kua talahau mai he Agaga ke he tau ekalesia. Ko ia kua kautu to nakai haofia a ia he mate laga ua.
12 Kia tohi foki e koe ke he agelu he ekalesia i Perekamo, Ko e tau mena nai kua tala mai a ia ha i ai e pelu mata fakafahiua kua matila ni,
13 Kua iloa e au e mena kua nofo ai a koe, ko e mena ha i ai e nofoaiki a Satani, kua taofi foki e koe haku a higoa, ti nakai fakatikai e tua kia au ke he tau aho ni a Anetipa ko e haku a talahau fakamoli, ne kelipopo a ia ha ia mutolu ke he mena kua nofo ai a Satani.
14 Ka e ha ia au e falu a mena gahoa kia koe, ha kua ha ha ia koe a lautolu kua taofi ke he tau kupu fakaako a Palāmo, ko ia ne fakaako a Palako ke tuku atu ki mua he fanau a Isaraela e mena ke tupetupe ai, ke kai e tau mena ne keli mo e tau tupua, mo e feuaki a lautolu.
15 Ti pihia foki mo e falu ha ha ia koe kua taofi ke he tau kupu fakaako he tau tagata Nikalaitai; ko e mena kua vihiatia ai e au.
16 Kia tokihala a; ka nakai, ti fina atu vave au kia koe, ti tau foki au mo lautolu ke he pelu mai he gutu haku.
17 Ko ia kua fai teliga, kia fanogonogo mai a a ia ke he mena kua talahau mai he Agaga ke he tau ekalesia. Ko ia kua kautu, to ta atu e au kia ia e manai galo ke kai ai; ti ta atu foki e au kia ia e maka hina, kua tohi foki ke he maka e higoa fou, nakai iloa he taha ka ko ia ni kua moua.
18 Kia tohi foki e koe ke he agelu he ekalesia i Tuataira, Ko e tau mena nai kua tala mai he Tama he Atua, ko ia ke tuga e puho he afi hana na fofoga, ko e hana tau ve foki tuga ne apa kula kikila;
19 Kua iloa e au hau a tau gahua, mo e hau a fakaalofa, mo e hau a fekafekau mai, mo e hau a tua, mo e hau a fakauka, mo e hau a tau gahua, kua mua foki e tau mena fakamui ke he tau mena fakamua.
20 Ka e ha ia au e falu mena gahoa kia koe, ha kua toka e koe e fifine ko Iesepela, kua talahaua e ia a ia ko e perofeta fifine, ke fakaako mo e fakahehe haku a tau fekafekau, ke feuaki mo e kai e tau mena kua keli mo e tau tupua.
21 Ne tuku atu foki e au kia ia e tau aho ke tokihala ai he hana feuaki, ka e nakai tokihala a ia.
22 Kitiala, to palu e au a ia ke he mohega, katoa mo lautolu kua faivao mo ia, kia matematekelea lahi ai, kaeke ke nakai tokihala a lautolu he tau gahua ha lautolu;
23 To fakaoti foki e au hana fanau ke he mate; to iloa foki he tau ekalesia oti, ko au ni kua kumi ke he tau manako mo e tau loto; to ta atu foki e au kia mutolu takitokotaha ke lata mo e ha mutolu a tau gahua.
24 Ka kua tala atu e au kia mutolu, katoa mo e falu ha i Tuataira, ko lautolu kua nakai ha i ai e tau kupu fakaako na, mo e nakai iloa e lautolu e tau mena hokulo a Satani, (he talahau e lautolu,) Kua nakai tuku atu e au ha kavega kehe kia mutolu.
25 Ka ko e tau mena ha ha ia mutolu kia taofi mau ai, ato fina atu au.
26 Ko ia foki kua kautu, mo e eke haku a tau gahua ato hoko ke he fakahikuaga, to ta atu e au kia ia e pule ke he tau motu kehe;
27 To pule foki a ia kia lautolu ke he tokotoko lapatoa, to malipilipi a lautolu tuga ne tau kapiniu he tagata eke kapiniu kelekele, tuga au foki ne moua e au mai he haku a Matua;
28 To ta atu foki e au kia ia e fetu aho.
29 Ko ia kua fai teliga, kia fanogonogo a a ia ke he mena kua talahau mai he Agaga ke he tau ekalesia.