Fakakiteaga 21:1-27
21 NE kitia foki e au e lagi fou mo e lalolagi fou; ha kua mole atu e lagi fakamua, mo e lalolagi fakamua, ti kua nakai tuai fai tahi.
2 Ko au foki ko Ioane ne kitia e au e māga tapu ko Ierusalema fou, kua hifo mai he Atua mai he lagi, kua taute tuga ne kitofaitane kua taute mo e tane hana.
3 Ne logona foki e au e leo lahi mai he lagi; kua pehe mai, Kitiala, kua fakalataha mo e tau tagata e fale uta fano he Atua, to nofo a ia mo lautolu; to eke a lautolu mo motu hana, to ha ia lautolu e Atua ni, ko e ha lautolu a Atua haia.
4 To holoholo kehe he Atua e tau hihina mata oti mai he tau mata ha lautolu; ti nakai tuai fai mate, po ke fakatutuku, po ke tagi, ti nakai tuai fai matematekelea; ha kua mole atu e tau mena fakamua.
5 Kua tala mai foki a ia kua nofo ke he nofoaiki, Kitiala, kua fakafou tuai e au e tau mena oti. Kua tala mai foki a ia kia au, Tohi ā; ha ko e tau kupu nai kua moli mo e fakamoli ia.
6 Na pehe mai foki a ia kia au, Kua oti tuai he eke. Ko au ko e Alefa mo e Omeka, ko e kamataaga mo e fakahikuaga. To foaki noa atu e au kia ia kua fia inu mai he vai puna he moui.
7 Ko ia ke kautu to moua e ia e tau mena na, to eke foki au mo Atua hana, to eke foki a ia mo tama haku.
8 Ka ko lautolu kua loto lolelole, mo lautolu kua nakai tua, mo lautolu kua eke mena vihiatia, mo e tau keli tagata, mo e tau feuaki, mo e tau taulātua, mo lautolu kua hufeilo ke he tau tupua; katoa mo lautolu oti kua pikopiko, to eke ma lautolu e māga he loloto kua vela ke he afi mo e taio, ko e mate ua haia.
9 Ti fina age ai kia au e taha he tau agelu tokofitu ne toka ai e tau kapiniu ne fitu kua puke ke he tau malaia ne fitu ke fakahiku aki, kua vagahau mai foki a ia kia au, kua pehe mai, Hau ā, to fakakite atu e au kia koe e kitofaitane, ko e hoana ia he Punua mamoe.
10 Kua uta foki e ia au ke he Agaga ke he mouga lahi mo e tokoluga, kua fakakite mai foki kia au a Ierusalema, ko e māga lahi, mo e tapu, ha ne hifo he lagi mai he Atua,
11 Ha ia ia e lilifu he Atua; ho e hana kikila foki tuga ne maka uho lahi haia, tuga foki e maka iasepi hana tioata mai;
12 Na fai pa lahi foki a ia mo e tokoluga, ne hogofulu ma ua e pahala ha i ai, ki luga foki he tau pahala e tau agelu ne tokohogofulu ma ua, kua tohia ai foki e tau higoa, ko e tau higoa haia he tau magafaoa ne hogofulu ma ua he fanau a Isaraela.
13 Ha he fahi uta tolu e pahala, ha he fahi tokelau tolu e pahala, ha he fahi toga tolu e pahala, ha he fahi lalo tolu e pahala.
14 Ne hogofulu ma ua e maka ne fakaveaki e pa he māga, ne toka ai foki e tau higoa he tau aposetolo tokohogofulu ma ua he Punua mamoe.
15 Ko ia foki ne vagahau mo au ha ia ia e kaho auro ke fafati aki e ia e māga, mo e hana tau pahala, katoa mo e hana pa.
16 Kua tu foki e maga fakafahifa tatai, ko e hana loa foki tuga ne hana laulahi ia; kua fafati foki e ia e māga ke he kaho, ne hogofulu e afe, ti ua e afe e satatio; ko e hana loa, mo e laulahi, mo e tokoluga kua tatai ni.
17 Kua fafati foki e ia hana pa, taha ni e teau ti fagofulu ma fa e kupita, ko e fafatiaga he tagata, ko e fafatiaga haia he agelu.
18 Kua ati foki hana pa ke he tau maka iasepi; ko e maga, ko e auro mitaki ia tuga ne tioata tavana.
19 Kua taute foki e tau fakaveaga he pa he māga ke he tau maka uho oti kana; ko e fakaveaga fakamua ko e iasepi haia, ko e ua ko e safaira haia, ko e tolu ko e kakito haia, ko e fa ko e samaraki haia,
20 Ko e lima ko e saritonu haia, ko e ono ko e sarikea haia, ko e fitu ko e tasesa haia, ko e valu ko e soama ia, ko e hiva ko e topasi ia, ko e hogofulu ko e kuasopera ia, ko e hogofulu ma taha ko e uakineto ia, ko e hogofulu ma ua ko e aselama haia.
21 Ko e tau pahala foki ne hogofulu ma ua ko e tau penina ia ne hogofulu ma ua; takitaha e pahala mo e taha penina kua eke aki; ko e hala tu foki he māga ko e auro mitaki ia, tuga ne tioata tavana.
22 Nakai kitia ai foki e au ha faituga; ha ko e hana faituga, ko e Iki ko e Atua haia hana e malolo oti kana, katoa mo e Punua mamoe.
23 Kua nakai aoga foki ke he māga e la po ke mahina ke kikila ai, ha ko e lilifu he Atua kua fakamaamatia ai a ia, ko e Punua mamoe foki ko e hana lamepa haia.
24 Ko e tau motu foki, ko lautolu kua fakamomoui to o fano a lautolu ke he hana maama; ko e tau patuiki foki he lalolagi kua ta mai e lautolu ha lautolu a fakahekeaga mo e lilifu ki ai.
25 Nakai tuai pa foki hana tau pahala ke he aho, ha ko e mena nakai fai po ke he mena ia.
26 To ta mai foki e lautolu e fakahekeaga mo e lilifu he tau motu ki ai.
27 Ti nakai fakai foki ke hu ki ai ha mena kelea taha, po ke taha kua eke mena vihiatia, po ke taha pikopiko; ka ko lautolu hoko lautolu ni kua tohia ke he tohi he moui he Punua mamoe.