Fakakiteaga 22:1-21
22 TI fakakite mai ai e ia kia au e vailele tavana ko e vai he moui, kua tavana tuga ne tioata, kua lele mai he nofoaiki he Atua mo e Punua mamoe.
2 Ha i ai ke he vaha loto he hana hala tu, mo e na fahi takitaha he vailele e akau he moui, kua fua mai ke he tau fua ne hogofulu ma ua, kua takitaha e mahina mo e fua mai ai hana fuaaga; ko e tau lau foki he akau ke fakamalolo ai e tau motu.
3 Ti nakai tuai fai kaialu, to tu ai foki e nofoaiki he Atua, mo e Punua mamoe ko e hana tau fekafekau foki ke fekafekau a lautolu kia ia.
4 To kitekite atu foki a lautolu ke he hana fofoga, to ha i ai foki ke he tau matale ha lautolu hana higoa.
5 Ti nakai tuai fai po ke he mena ia, nakai aoga foki kia lautolu ha i ai e lamepa po ke maama he la; ha ko e Iki ko e Atua kua fakamaama e ia a lautolu; to eke a lautolu mo tau patuiki tukulagi tukumuitea.
6 Ti pehe mai ai a ia kia au, Ko e tau kupu na kua fakamoli mo e moli; ko e Iki foki ko e Atua he tau perofeta tapu kua fakafano mai e ia hana agelu ke fakakite ke he hana tau fekafekau e tau mena kua lata ke hohoko vave mai.
7 Kitiala, to fina atu vave au; uhoaki a ia kua omaoma ke he tau kupu he perofetaaga he tohi nai.
8 Ko au foki ko Ioane, ne kitekite au mo e fanogonogo ke he tau mena na; kua fanogonogo foki mo e kitekite au, ti fakaveli fakafohifo ai au mo e hufeilo ke he na ve he agelu ne fakakite mai e tau mena na kia au.
9 Ka e tala mai a ia kia au. A koe, aua ia; ha ko au ko e hau a matakainaga a fekafekau, mo e taha he hau a tau matakainaga e tau perofeta, mo e taha a lautolu kua omaoma ke he tau kupu he tohi nai; kia hufeilo ke he Atua.
10 Kua tala mai foki a ia kia au, Ua fakamau fakamailoga e tau kupu he perofetaaga he tohi nai, ha kua tata tuai e aho.
11 Ko ia kua mahani hepehepe kia toka a ia ke hepehepe ai, ko ia kua kelea kia toka a ia ke kelea ai, ko ia foki kua tututonu kia toka a ia ke tututonu ai, ko ia kua tapu kia toka a ia ke tapu ai.
12 Kitiala, to fina atu vave au; ha ha ia au foki haku a taui ke taui atu takitokotaha fakalata ke he hana mahani ne eke e ia.
13 Ko au ko e Alefa mo e Omeka, ko e kamataaga mo e fakahikuaga, ko e fakamua mo e fakamui.
14 Uhoaki a lautolu kua unu ha lautolu a tau tapulu, kia lata a lautolu ke moua e akau he moui, mo e huhū atu a lautolu ke he tau pahala ke he māga.
15 Ha ha i tua he pa e tau kuli, mo e tau taulātua, mo e tau tagata feuaki, mo e tau keli tagata, mo lautolu kua hufeilo ke he tau tupua, katoa mo lautolu oti kua fiafia ke he pikopiko mo e eke ai.
16 Ko au ko Iesu kua fakafano atu e au haku a agelu ke talahau kia mutolu e tau mena ia ke he tau ekalesia. Ko au ko e Vaka mo e fanau a Tavita, ko e fetu aho kikila.
17 Kua pehe mai foki e Agaga mo e kitofaitane, Ati hau ā; kia pehe atu foki a ia kua fanogonogo, Ati hau ā; ko ia foki kua fia inu kia hau a ia, katoa foki mo ia kua manako ki ai, kia uta noa e ia e vai he moui.
18 Ha kua fakatonu atu e au kia lautolu oti kua fanogonogo ke he tau kupu he perofetaaga he tohi nai, Kaeke ke lafilafi e taha ha kupu ke he tau kupu he tohi nai, to lafilafi he Atua kia ia e tau malaia kua tohi ke he tohi nai.
19 Kaeke foki ke uta kehe e taha ha kupu mai he tau kupu he tohi he perofetaaga nai to uta kehe he Atua hana tufaaga he tohi he moui, mo e māga tapu, mo e tau mena kua tohi ke he tohi nai.
20 Ko ia kua talahau mai e tau mena nai, kua pehe mai a ia, Ko e moli, to fina atu vave au. Amene. Haia ni, ko e Iki na e ma Iesu, kia haele mai a koe.
21 Kia ha ha ia mutolu oti e fakaalofa noa he Iki ha tautolu ko Iesu Keriso. Amene.