Fakakiteaga 4:1-11
4 KUA mole atu e tau mena ia, ti kitia atu ai e au, kitiala, ko e pahala kua hafagi ke he lagi, ko e leo fakamua foki ne logona ai e au tuga ne pu ia kua vagahau mai kia au, kua pehe mai, Kia hake mai a koe ke he mena nai, ti fakakite atu ai e au kia koe e tau mena kua lata ke tutupu mai a mui.
2 Ti ha i ai agataha au ke he Agaga; kitiala, ko e nofoaiki kua tu mai ke he lagi, kua nofo foki e taha ke he nofoaiki;
3 Ko ia foki kua nofo ai kua tuga e maka iasepi mo e salikea hana a tino mai; kua agaagai foki e nofoaiki he tagaloa tuga e samaraki hana tino mai.
4 Kua agaagai foki e nofoaiki he tau nofoaiki ne uafulu ma fa; ne kitia foki e au e tau patu ne tokouafulu ma fa kua nonofo ke he tau nofoaiki, kua tapulu a lautolu ke he tau tapulu hina; ha i ai foki ke he tau ulu ha lautolu e tau foufou auro.
5 Kua hohoko mai foki mai he nofoaiki e tau uhila, mo e tau pakulagi, mo e tau leo; ko e tau lamepa foki ne fitu kua puho ai e afi ki mua he nofoaiki, ko e tau Agaga he Atua ia ne tokofitu.
6 Ha i mua foki he nofoaiki e tahi tioata, tuga ne kerutali; ha i ai foki ki loto he nofoaiki, mo e agaagai e nofoaiki he tau mena momoui ne tokofa, kua puke ke he tau mata ki mua katoa foki mo tua.
7 Ko e mena moui fakamua foki tuga ne leona ia, ko e mena moui ne ua tuga ne punua povi, ko e mena moui foki ne tolu kua mata a ia po ke tagata, ko e mena moui foki ne fa tuga ne aeto lele a ia.
8 Ko e tau mena moui foki ne fa kua takitaha mo e hana tau tapakau ne ono. Ko tua mo loto he tau tapakau kua puke ke he tau mata; kua nakai okioki foki a lautolu ke he aho mo e po he pehe atu, Kua tapu, kua tapu, kua tapu e Iki, ko e Atua hana e malolo oti kana, ko ia ne moui tuai, kua moui nai foki, ko ia foki ka haele mai.
9 Kua fakaheke, mo e fakalilifu, mo e fakaaue e tau mena momoui kia ia kua nofo ke he nofoaiki, ko ia kua moui tukulagi tukumuitea,
10 Ti fakaveli fakafohifo ai e tau patu ne tokouafulu ma fa ki mua hana kua nofo ke he nofoaiki, mo e hufeilo kia ia kua moui tukulagi tukumuitea, ti tolo e lautolu ha lautolu a tau foufou ki mua he nofoaiki, kua pehe atu,
11 Ko e Iki na e, kua lata ni a koe ke tuku atu ki ai e fakahekeaga, mo e lilifu, mo e malolo; ha kua eke e koe e tau mena oti, ha ko e hau a finagalo foki ne ha ha i ai a lautolu; mo e eke ai a lautolu.