Fakakiteaga 5:1-14
5 NE kitia foki e au ke he lima matau hana kua nofo ke he nofoaiki, e tohi kua tohi a loto mo tua, kua fakamau ke he tau fakamau fakamailoga ne fitu.
2 Ne kitia foki e au e agelu malolo kua fakamatala atu mo e leo lahi, Ko hai kia kua lata ke fofola e tohi, mo e vevete hana tau fakamau fakamailoga?
3 Ka e nakai emo taha ke he lagi, po ke lalolagi, po ko lalo he lalolagi, ke maeke ke fofola e tohi, po ke kitekite ki ai.
4 Ti tagi lahi ai au he nakai moua taha kua lata ke fofola mo e totou e tohi, po ke kitekite ki ai.
5 Ti tala mai e taha he tau patu kia au, Ua tagi a koe; kitiala, kua kautu e Leona he magafaoa a Iuta, ko e Vaka a Tavita, kia fufuke e ia e tohi mo e vevete hana tau fakamau fakamailoga ne fitu.
6 Ne kitia atu foki e au, kitiala, kua tu mai ke he vaha he nofoaiki mo e tau mena momoui ne fa, ha i tua foki e tau patu, ko e Punua mamoe tuga ne mena keli, ne fitu la e tau hoe hana ti fitu foki hana tau mata, ko e tau Agaga haia he Atua ne tokofitu kua fakafano atu ke he lalolagi oti.
7 Kua fina atu a ia, mo e toto mai e tohi mai he lima matau hana kua nofo ke he nofoaiki.
8 Kua toto e ia e tohi, ti fakaveveli fakafohifo ai e tau mena momoui ne fa mo e tau patu ne tokouafulu ma fa ki mua he Punua mamoe, kua igatia a lautolu mo e kitara, mo e kapiniu auro kua puke ke he tau mena manogi ke huhunu, ko e tau liogi haia he tau tagata tapu;
9 Kua lologo foki e lautolu e lologo fou, kua pehe atu, Kua lata ni a koe ke toto e tohi, mo e vevete hana tau fakamau fakamailoga; ha ko e mena ne keli a koe, ti fakafua foki e koe a mautolu ma e Atua ke he toto hau, mai he tau magafaoa oti, mo e tau vagahau kehekehe, mo e tau motu, katoa mo e atu motu;
10 Kua eke foki e koe a mautolu mo tau patuiki, mo tau ekepoa ke he Atua ha mautolu; kua eke foki a mautolu mo tau patuiki ke he lalolagi.
11 Ne kitia foki e au mo e logona e leo he tau agelu tokologa, ko lautolu kua agaagai e nofoaiki, mo e leo he tau mena momoui ne fa katoa mo e tau patu; ko e katoatoa foki ha lautolu ka totou, ne afe mo afe, mo e tau afe he tau afe,
12 Kua pehe atu mo e leo lahi, Kua lata ni e Punua mamoe ne keli ke tuku atu ki ai e pule, mo e koloa, mo e iloilo, mo e malolo, mo e fakahekeaga, mo e fakamonu.
13 Ne logona foki e au e tau mena oti kua eke ha he lagi, mo e lalolagi, mo lalo he lalolagi, mo e tau mena foki ha he tahi, katoa mo e tau mena oti ha ha i ai ke he tau mena ia, kua pehe atu, Kia ha ha ia ia kua nofo ke he nofoaiki, katoa mo e Punua mamoe e fakamonu, mo e lilifu, mo e fakahekeaga, mo e malolo tukulagi tukumuitea.
14 Ti tala atu ai e tau mena moui ne fa, Amene; ti fakaveveli fakafohifo ai e tau patu ne tokouafulu ma fa, mo e hufeilo kia ia kua moui tukulagi tukumuitea.