Fakakiteaga 9:1-21
9 KUA ulo foki he agelu ne tokolima aki e pu, ti kitia ai e au e fetu kua to mai he lagi ke he lalolagi; kua ta age foki kia ia e kei he pahua kua nakai gata mai.
2 Kua vevete foki e ia e pahua nakai gata mai; ti hake ai e ahua mai he pahua tuga ne ahua he gutumu lahi, ti pouligia ai e la mo e pu lagi ha ko e ahua he pahua.
3 Kua o atu foki mai he ahua e tau hē akerisi ke he fonua, kua ta age foki kia lautolu e malolo, tuga ne malolo ha ha he tau akarava he vao;
4 Kua tala age foki kia lautolu, aua neke moumou e motietie he fonua, po ke taha lau kou, po ke taha akau; ka ko e tau tagata hokoia ni nakai toka ai e fakamailoga he Atua ke he tau matale ha lautolu.
5 Kua tuku age foki kia lautolu, aua neke kelipopo a lautolu, ka kia fakamamahi hokoia a lautolu ke he lima a mahina; ko e mamahi foki ha lautolu, tuga ne mamahi he tagata ka hoka a ia he akarava.
6 Ko e tau aho foki ia ke kumi ai he tau tagata e mate, ka e nakai moua e lautolu; to manako lahi foki a lautolu ke he mate, ka e hola kehe e mate ia lautolu.
7 Ko e tau hē akerisi foki kua tino mai tuga ne solofanua kua taute ke tau, ko e tau ulu foki ha lautolu, tuga ne toka ai e tau foufou po ke auro, mo e tau mata ha lautolu tuga ne tau mata he tau tagata;
8 Na fai lauulu foki a lautolu tuga ne lauulu he tau fifine; mo e tau nifo ha lautolu tuga ne tau nifo he tau leona;
9 Na fai ufi kahokaho foki a lautolu tuga ne tau ufi kahokaho lapatoa; ko e tuputupu foki he tau tapakau, tuga ne tomumu he tau kariota mo e tau solofanua loga kua tafepoi ke tau.
10 Na fai hiku foki a lautolu, tuga ne tau hiku akarava, kua fai huki foki ke he tau hiku ha lautolu; ha ia lautolu foki e malolo ke fakakelea ai e tau tagata ke he lima e mahina.
11 Ha ia lautolu foki e patuiki, ko e agelu haia he pahua nakai gata mai, ko e hana higoa ke he kupu Heperu ko Apatona, ka ko e hana higoa ke he kupu Heleni ko Apoluona.
12 Kua mole atu e oi taha; kitiala, ne ua e oi ke mumui mai, kua nakaila hoko mai.
13 Kua ulo foki he agelu ne tokoono aki e pu, ti logona ai e au e leo mai he tau hoe ne fa he fatapoa auro ki mua he Atua,
14 Kua pehe atu ke he agelu ne tokoono aki ne toka ai e pu, Vevete a e tau agelu ne tokofa kua lili ke he vailele lahi ko Eufirate.
15 Ti vevete ai e tau agelu ne tokofa, kua tauteute ke he magaaho, mo e aho, mo e mahina, mo e tau, kia kelipopo e lautolu e vahega ne tolu aki e tau tagata.
16 Ko e totouaga he tau kau kua heke solofanua ne ua e teau e tau afe he tau afe; ne logona foki e au e totouaga ha lautolu.
17 Kua pehe foki haku a kitia atu ke he tau solofanua ke he mena ne kitekite ki ai, mo lautolu kua heke ai, ha i ai ia lautolu e tau ufi kahokaho kua kula po ke afi mo e uhi po ke uakini, mo e ago po ke taio; ko e tau ulu foki he tau solofanua tuga ne tau ulu he tau leona, kua fina atu he tau gutu ha lautolu e afi, mo e ahua, mo e taio.
18 Ko e tau mena ia ne tolu ne kelipopo ai e taha vahega ne tolu aki e tau tagata, ko e afi, mo e ahua, mo e taio, ne fina atu he tau gutu ha lautolu.
19 Ha ko e mena ha he tau gutu ha lautolu e malolo ha lautolu; ha ko e tau hiku ha lautolu tuga ne tau gata ia, ha i ai e tau ulu, ko e tau mena foki ia kua fakakelea aki e lautolu e tau tagata.
20 Ko e tau tagata foki kua toe, kua nakai kelipopo he tau malaia nai, nakai tokihala foki a lautolu he tau gahua he tau lima ha lautolu, he hufeilo a lautolu ke he tau temoni, mo e tau tupua auro, mo e ario, mo e apa kula, mo e maka, mo e akau, ko e tau mena kua nakai maeke ke kitekite, po ke fanogonogo, po ke fano;
21 Ti nakai tokihala foki a lautolu he ha lautolu a keli tagata, mo e ha lautolu a tau lagatau taulaatua, mo e ha lautolu a feuaki, mo e ha lautolu a tau kaiha.