Fakamatalaaga 1:1-18
1 KO e tau kupu hanai he tagata fakamatala kupu ko e tama a Tavita, ko e patuiki i Ierusalema.
2 Kua pehe mai e tagata fakamatala kupu, Ko e tau mena fakateaga lahi ni, ko e tau mena fakateaga lahi; kua fakateaga ni e tau mena oti kana.
3 Ko e heigoa kia e mena kua moua he tagata ke he hana tau gahua oti ne mamahi ai a ia ki lalo he la?
4 Kua mole atu taha hau, ti hau ai taha hau; ka ko e lalolagi kua tumau tukulagi haia.
5 Kua hake foki e la, kua hifo foki e la, mo e alumaki atu a ia ke he mena ne hake ai.
6 Kua fina atu e matagi ke he fahi toga, mo e takai ai ke he fahi tokelau. Kua agi e matagi mo e liu takai ai, mo e liu foki e matagi ke he hana mena ne agi takai ai.
7 Kua tafe hifo e tau vailele oti ke he tahi, ka e nakai puke ai e tahi; ko e mena kua tafe atu ki ai e tau vailele, kua liliu atu foki a lautolu ki ai.
8 Kua mategugu ai e tau mena oti; nakai maeke ke he tagata ke fakamatala ai; nakai makona e tau mata he kitekite, nakai puke foki e tau teliga he fanogonogo.
9 Ko e tau mena kua oti he tutupu, ko e tau mena ia ni ke liu tutupu foki. Ko e tau mena kua oti he eke, ko e mena ia ni ke liu foki eke; kua nakai ni fai mena fou i lalo he lā.
10 Kua fai mena kia kua maeke ai ke he tagata ke pehe, Kikite mai la, ko e mena fou hanai? ne ha i ai i tuai ne aho mua ne fakamua atu kia tautolu.
11 Nakai fai manatu ke he tau tagata ha ha i ai fakamua, ko e tau tagata fakamui foki ke ha ha i ai ke he tau vaha nakai la hoko mai, nakai fai manatu kia lautolu a lautolu ke mumui mai.
12 Ko au nai ko e tagata fakamatala kupu ne eke au mo patuiki a Isaraela i Ierusalema.
13 Ne fakahagao atu e au haku loto ke kumi mo e kumi mo e pulotu e tau mena oti ni kua eke i lalo he lagi; ko e gahua kelea ni kua tuku mai he Atua ke he tau tagata kia mamahi ai a lautolu he eke.
14 Ne kitekite au ke he tau gahua oti ne eke i lalo he lā; ti kitiala, ko e tau mena fakateaga oti ni haia, mo e kai ai e matagi.
15 Ko e mena kua keu nakai ni maeke ke fakahako; ko e mena foki nakai ha i ai, nakai maeke ke totou ia.
16 Ne vagahau hifo au ke he haku loto kua pehe hifo, Kitiala, kua fakaloga ni e au e iloilo, ne homo atu au kia lautolu oti ha ha i Ierusalema ne fakamua atu kia au; ne lahi foki e iloilo mo e maama ke he tau mena ne moua e au ke he haku loto.
17 Ne fakahagao atu foki e au haku loto ke moua e iloilo, ke iloa ai foki e heketia mo e goagoa; kua kitia foki e au ko e kai e matagi haia.
18 Ha ko e mena ka lahi e iloilo ti lahi ai e mamahi he loto; ko ia foki kua fakalahi hana iloa he tau mena, kua fakalahi ai e ia e fakatutuku.