Fakamatalaaga 10:1-20
10 KO e tau lago mamate kua elo to uaga ai e lolo manogi he tufuga eke mena manogi; ko e goagoa tote foki ke kelea ai a ia ne talahaua he iloilo mo e lilifu.
2 Ko e loto he tagata iloilo ha ha he lima matau hana; ka ko e loto he tagata goagoa ha ha he lima hema hana haia.
3 Ka fano foki e tagata goagoa ke he puhala kua nakai fai manamanatu a ia, kua pehe atu foki a ia ke he tau tagata oti, ko ia ko e tagata goagoa.
4 Kaeke kua tupu ai e ita he pule kia koe, aua neke toka e koe e mena kua nofo ai a koe; ha ko e mahani totonu kua fakamaulu ai e e ita ke he tau hala lalahi.
5 Ko e mena kelea kua kitia e au i lalo he lā, ko e mena tuga e mena hehe kua tupu mai he iki;
6 Kua kotofa ai e tau tagata goagoa ke he tau mena ne mua ue atu, ka kua nonofo e tau tagata maukoloa ke he tau mena tokolalo.
7 Kua kitia e au e tau fekafekau kua heke solofanua, ka ko e tau iki kua o ai he kelekele po ke tau fekafekau.
8 Ko ia kua keli e luo to to a ia ki ai; ko ia foki kua ulu moumou e kaupa, to gagau he gata a ia.
9 Ko ia kua uta kehe e tau maka to mamahi ai a ia; ko ia kua ihi e tau akau to haofia ai a ia.
10 Kaeke kua penu e lapatoa, ka nakai fakamata ai foki he tagata, ti fakalahi e ia hana malalo ki ai; ka ko e iloilo ko e mena aoga ia ke fakatonu aki.
11 Kaeke kua gagau he gata kua nakai fakavai he tagata fakavai gata, ti nakai tuai aoga ai e tagata fakavai gata.
12 Ko e tau kupu he tagata iloilo ko e tau kupu fakaalofa ia; ka ko e gutu he tagata goagoa kua malaia ai a ia.
13 Ko e kamataaga he tau kupu he hana gutu ko e goagoa ia, ko e fakahikuaga foki he hana vagahau ko e goagoa kelea haia.
14 Kua fakaloga foki he tagata goagoa hana tau kupu; nakai iloa foki he tagata e tau mena ke tutupu; ko hai foki ke fakailoa atu kia ia e tau mena ke tutupu ka mole atu a ia?
15 Ko e gahua he tau tagata goagoa kua tukumate ai a lautolu; ha kua takitaha a lautolu, mo e nakai iloa e puhala ke fina atu ai ke he maga.
16 Ko e motu na e, oi te fakaalofa kia koe ka eke e tama tote mo patuiki hāu, kua taumafa ai foki hāu a tau iki ke he magaaho pogipogi!
17 Ko e motu na e, uhoaki a koe ka eke mo patuiki hāu e aloalomanava he tau tui, kua taumafa foki hāu a tau iki ke malolo ai, ka e nakai inu kia konahia a lautolu!
18 Ko e mahani teva kua popo ai e tuafale, ko e nakai toto foki he tau lima ha mena kua tutulu ai e fale.
19 Kua eke e lautolu e galue ke feki ai, ko e uaina foki kua fiafia ai e tau tagata momoui; ko e tau tupe foki kua aoga ai ke he tau mena oti.
20 Aua neke kaialu a koe ke he patuiki ke he tau manatu ni hāu; ua kaialu foki a koe ke he tau maukoloa ke he hāu a poko mohe; ha ko e mena uta ni he manu lele e leo, ko e mena foki kua fai tapakau to fakailoa ai e ia e kupu.