Fakamatalaaga 11:1-10
11 KIA liti a hāu a tau mena kai ki luga he vai; ha ko e mena ka mole atu e tau aho loga to liu moua ai e koe.
2 Kia ta age ā e tufaaga ke he tokofitu, po ke tokovalu; ha kua nakai iloa po ke heigoa e mena kelea ke tupu ke he lalolagi.
3 Kaeke kua puke e tau aolagi, kua to hifo ai e uha ke he lalolagi; kaeke foki ke veli atu e akau ke he fahi toga, po ke fahi tokelau, ko e mena kua veli ai e akau ha ha i ai a ia.
4 Ko ia kua manamanatu ke he matagi nakai gana saito e ia; ko ia foki kua kitekite ke he tau aolagi nakai ni helehele saito e ia.
5 Tuga he nakai iloa e koe e puhala he matagi, mo e nakai iloa po ke tutupu fefe e tau hui motua ke he manava he fifine kua fatu, kua pihia foki nakai iloa e koe e gahua he Atua, ko ia kua eke e tau mena oti ni.
6 Kia gana e koe hāu a tau fua saito ke he magaaho pogipogi, ti aua neke okioki ai hāu a lima ke he afiafi; he nakai iloa po ke mena fe ke monuina, po ke mena nai, po ke mena na, po ke fakatau mitaki ai e na mena ua ia.
7 Kua mitaki ni e maama, ko e mena foki ke fiafia ai e tau mata ke kitekite ke he lā;
8 Ka ko e mena ka moui e tagata ke he tau tau loga, kia olioli ai a ia ke he tau tau oti ia; ka kia manatu a ia ke he tau aho ke pouli ai, ha ko e loga ia. Ko e tau mena oti ke hohoko mai, ko e tau mena fakateaga ni haia.
9 Ko e fuata na e kia olioli a a koe ke he hāu a vaha tote, kia fiafia foki a koe ke he tau aho he hāu a vaha fuata, mo e fano a koe ke he tau puhala kua loto a koe ki ai, mo e tau mena kua kitekite ki ai hāu a tau mata; ka kia iloa e koe to fakafili ai he Atua a koe ha ko e tau mena oti ia.
10 Hanai, kia toka a e mamahi he hāu a loto, mo e tuku kehe atu e kelea he hāu a tino; ha ko e vaha tote mo e vaha fuata ko e mena fakateaga haia.