Fakamatalaaga 12:1-14
12 HANAI, kia manatu a a koe ke he hāu a vaha fuata kia ia ne eke a koe, ka kua nakaila hohoko mai e tau aho kelea, ka kua nakaila fakatata mai e tau tau ke pehe ai a koe, Nakai tuai fiafia au ki ai;
2 Ka kua nakaila fakapouligia e lā, mo e maama, mo e mahina, mo e tau fetu, mo e nakai liliu mai e tau aolagi ka mole atu e uha;
3 Ko e aho ia to vivivivi a lautolu kua leveki e fale, mo e tukutukuhifo ai e tau tagata malolo, mo e nakai tuai gahua e tau tagata holo saito he tokogahoa a lautolu, mo e fakapouligia a lautolu kua kitekite atu he tau fakamaama,
4 Mo e pa ai e tau gutuhala ke he puhala, he tote e kalī he holo saito, kua matike foki a ia he kololo he manu lele, kua lolelole foki e tau tama fifine uhu lologo oti;
5 To matakutaku foki a lautolu he tau mena tokoluga, mo e matakutaku ai ke he puhala; to vihia foki e sikati, mo e eke e hē mo mena mamafa, mo e nakai tuai fai manako; ha kua fano e tagata ke he hana fale tukulagi, kua o fano foki e tau tagata kua tagi tatuki ke he tau puhala;
6 Ka kua nakaila vevete e afo ario, po ke mafela ai e kapiniu auro, po ke malipilipi ai e vai ke he vaipuna, po ke mapaki e mena ne tavili aki e vai ke he vaikeli;
7 Mo e nakaila liu atu foki e efuefu ke he kelekele tuga he ha i ai a ia, mo e liu atu foki e agaga ke he Atua ko ia ne foaki mai ai.
8 Kua pehe mai a ia kua fakamatala kupu, Ko e tau mena fakateaga lahi, kua fakateaga e tau mena oti ni.
9 Ne mua e iloilo Hana ne fakamatala kupu, ko e mena ia ne homo atu a ia he fakaako atu ke he tau tagata ke iloilo ai; ti manamanatu a ia; mo e kumi, mo e taute ai e tau fakatai loga.
10 Ne kumi a ia ne fakamatala kupu ke moua e tau kupu ke fiafia ai e tau tagata; ko e tau mena foki kua tohi ko e tonu ia, ko e tau kupu moli ni.
11 Ko e tau kupu he tau tagata iloilo kua tuga ne tau huki ia ne ta hoka aki e tau povi, po ke tau fao kua fakamau ai e tau patu he tau fakapotopotoaga kua kotofa ia he leveki mamoe ne tokotaha.
12 Hanai, haku tama na e, kia fakaako ai a koe ia lautolu; nakai fai fakahikuaga he tohi e tau tohi loga; ko e kumi lahi foki ke he tau kupu kua lolelole ai e tino.
13 Kia fanogonogo a a tautolu ke he fakahikuaga he tau mena oti ia, Kia matakutaku a ke he Atua, mo e omaoma ke he hana tau fakatufono; ha ko e mena ia kua lata ke eke he tau tagata oti kana.
14 Ha ko e mena to fakafili he Atua e tau gahua oti, katoa mo e tau mena galo oti ni, ko e tau mena mitaki katoa mo e tau mena kelea.