Fakamatalaaga 2:1-26
2 NE pehe hifo au ke he haku loto, Hau a, to kamatamata e au a koe ke he olioli, kia fiafia a ke he mena mitaki; ti kitiala, ko e mena fakateaga ni haia.
2 Ne pehe age au ke he kata, Kua heketia a ia; ko e olioli foki, Ko e heigoa kia e mena ne eke e ia?
3 Ne manamanatu au ke he haku loto ke fakamahani ai haku tino mo e uaina, ne takitaki foki au mo e iloilo he haku loto; ke toto atu foki ke he mahani goagoa, ato kitia e au e mena mitaki ke eke ai he tau tagata i lalo he lagi he tau aho oti kua momoui ai a lautolu.
4 Ne eke e au e tau gahua lalahi māku; ne ta e au e tau fale māku; ne to e au māku e tau ulu vine.
5 Ne eke foki e au e tau kaina māku mo e tau fonua ne to ai e tau akau, ne to ai foki e au e tau akau fua kehekehe oti.
6 Ne eke foki e au māku e tau vainamo, ke fakamalu aki mai he tau mena ia e fonua ne tutupu ai e tau akau;
7 Ne fakafua e au māku e tau fekafekau tane mo e tau fekafekau fifine, ha ha ia au foki e tau fekafekau ne fanau ai ke he haku a kaina, ha ha ia au foki e tau fuifui povi mo e tau fuifui mamoe loga, ne homo atu kia lautolu oti ne fakamua atu ia au i Ierusalema.
8 Ne tatanaki foki e au māku e tau ario, mo e tau auro, mo e tau koloa uho he tau patuiki mo e tau koloa uho he tau fahi kautu; ne eke foki e au māku e tau tagata uhu lologo ko e tau tane mo e tau fifine, mo e tau mena kua fiafia ai e tau tagata, ko e tau hoana fakahoa tokologa ni.
9 Ne maukoloa foki au, ne mua foki he loga haku a tau mena ke he tau mena ha lautolu oti ne fakamua atu kia au i Ierusalema; kua tumau foki kia au haku a iloilo.
10 Ko e tau mena oti foki ne fia kitekite ki ai haku tau mata nakai hataki au ki ai; nakai taofi foki e au haku loto he taha mena taha ne fiafia a ia ki ai; ha kua fiafia hoku loto ke he tau gahua oti haku; ne eke foki ia mo tufaaga māku ke he haku a tau gahua oti.
11 Ti kitekite au ke he tau gahua oti ne eke he tau lima haku, mo e tau gahua ne mamahi ai au he eke; ti kitiala, ko e tau mena fakateaga oti ni haia, mo e kai e matagi, kua nakai ni fai mena aoga i lalo he lā.
12 Ti hagao atu foki au ke kitia e iloilo, mo e heketia, mo e goagoa; ha ko e heigoa e mena ne toe kua maeke ke eke he tagata kua mui mai ke he patuiki, nakai kia ko e tau mena kua oti tuai he eke?
13 Ti kitia ai e au kua mua e aoga he iloilo ke he goagoa, tuga ne mua e aoga he maama ke he pouli.
14 Ko e tagata iloilo, ha ha he ulu hana hana tau mata, ka ko e tagata goagoa kua fano a ia mo e pouli; ka e kitia foki e au taha ni e mena kua hoko kia lautolu oti.
15 Ti pehe hifo au ke he haku loto, Tuga he hoko ke he tagata goagoa, kua hoko mai pihia foki kia au nai; ti aoga ha ha foki he mua haku a iloilo ke he hana? Ti pehe hifo au ke he haku loto, Ko e mena fakateaga foki ia.
16 Ha ko e mena nakai manatu ai tukulagi e tagata iloilo, ti pihia foki e tagata goagoa; ha ko e tau mena ha ha i ai nai to nimo oti ni a taha aho. Oi te! kua mate e tagata iloilo tuga ne tagata goagoa.
17 Ko e mena ia kua fakavihia e au e mouiaga nai; ha kua kelea kia au e tau gahua kua eke i lalo he lā; ha ko e tau mena oti, ko e tau mena fakateaga ia, mo e kai e matagi.
18 Ne vihiatia foki e au e tau gahua oti ne mamahi ai au he eke i lalo he lā; ha ko e mena toka ai e au ia ma e tagata ke nofo ai ka mole atu au;
19 Kua iloa e hai foki po ke tagata iloilo po ke tagata goagoa a ia? Ka e pule a ia ke he tau gahua oti ne mamahi ai au he eke, mo e tau mena oti ne eke ai e au mo e haku a iloilo i lalo he lā. Ko e mena fakateaga foki haia.
20 Ti liu manatu hifo ai au ke haga kehe e au haku loto ke aua neke tua ke he tau gahua oti ne mamahi ai au ke eke i lalo he lā.
21 Ha ko e taha tagata kua gahua mo e pulotu, mo e iloilo, mo e monuina; ka e toka ai e ia ma e tagata kua nakai mamahi he gahua ai, ke eke mo tufaaga māna. Ko e mena fakateaga ia, ko e mena kelea lahi.
22 Ha ko e heigoa e mena kua moua he tagata he hana tau gahua oti, mo e fakauka he hana loto, ne mamahi ai a ia he eke i lalo he lā?
23 Ha ko e hana tau aho oti kua fakatutuku ai a ia, ko e mena matematekelea foki hana tau gahua; nakai okioki foki hana loto ke he po. Ko e mena fakateaga foki haia.
24 Nakai fai mena mitaki ke he tagata, ka kia kai ai e ia mo e inu, mo e fakafiafia hana loto ke he tau mena mitaki he hana tau gahua. Ne kitia foki e au e mena na mai he lima he Atua haia.
25 Ha ko hai kua mua kia au nai, he maeke ke kai mena a ia, mo e maeke ke eke e tau mena ne loto ki ai a ia?
26 Ha kua foaki he Atua ke he tagata kua mitaki ki mua hana, e iloilo, kua foaki foki kia ia ke iloa e tau mena, mo e tau mena ke fiafia ai a ia; ka ko e tagata hala kua foaki e ia ki ai e feua ke fakapotopoto, mo e tatanaki ai e tau mena kia foaki atu ai e ia kia ia kua mitaki ki mua he Atua. Ko e mena fakateaga foki ia, mo e kai e matagi.