Fakamatalaaga 3:1-22
3 KO e mena mo e hana ni a tau ke he tau mena oti ko e hana ni a vaha foki ke he tau mena oti i lalo he lagi;
2 Ko e vaha ke fanau ai, mo e vaha ke mate ai; ko e vaha ke to mena ai, mo e vaha ke taaki ai e tau mena kua to;
3 Ko e vaha ke tamate, mo e vaha ke fakamalolo ai; ko e vaha ke ulu ki lalo, mo e vaha ke ati hake ai.
4 Ko e vaha ke tagi ai, mo e vaha ke kata ai; ko e vaha ke tagi tatuki ai, mo e vaha ke kolikoli ai;
5 Ko e vaha ke liti ai e tau maka, mo e vaha ke tatanaki ai e tau maka; ko e vaha ke taufigita ai, mo e vaha ke toka ai e taufigita;
6 Ko e vaha ke kumi ai, mo e vaha ke fakagalo ai; ko e vaha ke leveki ai, mo e vaha ke tiaki ai;
7 Ko e vaha ke hēhē ai, mo e vaha ke tuitui ai; ko e vaha ke fakanono ai, mo e vaha ke vagahau ai;
8 Ko e vaha ke fakaalofa ai, mo e vaha ke fakavihia ai; ko e vaha ke tau ai, mo e vaha ke nonofo ai mo e mafola;
9 Ko e heigoa kia kua moua he tagata eke gahua ke he mena ne gahua ai a ia?
10 Kua kitia e au e gahua kua tuku mai he Atua ke he tau tagata, ke mamahi ai a lautolu.
11 Ne eke e ia e tau mena oti ke fulufuluola ai ke he ha lautolu ni a tau vaha; kua tuku foki e ia e manatu ke he tukulagi ke he tau loto ha lautolu; ka e nakai kitia he tagata e gahua kua eke he Atua tali mai he kamataaga ke hoko ke he fakahikuaga.
12 Kua iloa e au nakai fai mena kua mitaki kia lautolu, ka kia olioli e tau tagata, mo e eke e tau mena mitaki he momoui ai a lautolu.
13 Hanai foki, kia takitaha e tagata mo e kai, mo e inu, mo e fiafia ai ke he tau mena mitaki he hana tau gahua oti; ko e mena kua foaki mai he Atua haia.
14 Kua iloa e au, ko e tau mena oti kua eke he Atua ko e mena tukulagi haia; nakai maeke ke lafi atu ki ai ha mena, ti nakai maeke foki ke uta kehe ai ha mena; kua eke ai foki he Atua kia matakutaku ai e tau tagata ki mua hana.
15 Ko e tau mena ne ha i ai fakamua, ha ha i ai ainei haia; ko e tau mena foki nakaila ha ha i ai a taha aho, ko e tau mena ne ha i ai fakamua haia; kua kumi foki he Atua e tau mena ne mole atu.
16 Ne kitia foki e au i lalo he lā ko e mena ke fakafili ai, ha ha i ai e mahani kelea; mo e mena kua toka ai e mahani tututonu, ha ha i ai e mahani kelea.
17 Ti pehe hifo au ke he haku loto, To fakafili he Atua e tagata tututonu, katoa mo e tagata mahani kelea; ha ko e takitaha ni mo e hana ni a vaha ke he tau mena oti mo e tau gahua oti ke he mena ia.
18 Ne pehe hifo au ke he haku loto, Kua pihia ha ko e tau tagata, ke kamatamata ai he Atua a lautolu, kia kitia, ai e lautolu, kua lata a lautolu mo e tau manu.
19 Ha ko e mena kua hoko ke he tau tagata, kua hoko foki ia ke he tau manu; taha ni e mena kua hoko kia lautolu; tuga ne mate taha, kua mate ai pihia foki e taha; ko e taha ni e fafagu ia lautolu oti; nakai ni fai mena ne homo ai e tagata ke he manu; ha ko e mena fakateaga oti ni.
20 Kua hoko oti ni ke he mena taha; mai he efuefu oti kana, kua liliu atu oti foki ke he efuefu.
21 Ko hai kia kua iloa e agaga he tagata po ke hake nakai a ia ki luga? ko e agaga foki he manu po ke hifo nakai a ia ki lalo ke he kelekele?
22 Ti kitia ai e au kua nakai fai mena kua mua he mitaki ke he tagata, ka kia olioli a ia ke he hana ni a gahua; ha ko e hana tufaaga haia; ha ko hai kia ke liuaki mai a ia kia kitia e ia e tau mena ke tutupu ai ka mole atu a ia?