Fakamatalaaga 4:1-16
4 TI liu manatu ai au ke he tau mahani favale oti kua eke i lalo he lā; kitiala foki e tau hihina mata ha lautolu ne pehia he favale, kua nakai ha ha i ai taha foki ke fakamafana a lautolu; ne lima malolo foki a lautolu ne favale kia lautolu; ka e nakai ha ha i ai taha ke fakamafana a lautolu.
2 Ti fakaheke ai e au kia lautolu kua mamate, ko lautolu ne mamate tuai, kua mua a lautolu kia lautolu kua momoui, ko lautolu kua momoui agaia.
3 Ka e mua he monuina kia laua na, a ia kua nakaila fanau mai, ko ia kua nakai kitia e gahua kelea kua eke i lalo he lā.
4 Ti manatu ai au ke he tau gahua oti ne mamahi ai he eke, mo e tau gahua aoga oti; ko e tau mena ia kua tupu ai e mahekeheke ke he tagata mai ia ia ne katofia mo ia. Ko e mena fakateaga foki ia, mo e kai e matagi.
5 Kua tui he tagata goagoa hana tau lima, ti kai ai e ia hana tino.
6 Kua mua he mitaki taha e puke aloalolima mo e nofo fakatekiteki, ke he na puke aloalolima ua mo e mamahi he gahua, mo e kai e matagi.
7 Ti liu manatu ai au ke he tau mena fakateaga i lalo he lā.
8 Ha ha i ai taha tagata ti nakai ha i ai taha ke tokoua aki a ia; nakai fai tama tane a ia, po ke matakainaga; ka e nakai fai fakahikuaga hana tau gahua oti; ti nakai makona foki hana tau mata he kitekite ke he koloa; ti pehe a ia, Kua gahua au ma hai, mo e nofogati ai au he tau mena mitaki? Ko e mena fakateaga foki haia, ko e mena kelea ni.
9 Kua mua he mitaki e tokoua ke he tokotaha; he ha ha ia laua e taui mitaki he tau gahua ha laua.
10 Ha ko e mena ka veli taha to fakatu e ia ne tokoua aki a laua a ia; oi te fakaalofa foki kia ia ne tokotaha ka veli a ia, he nakai ha i ai taha ke tokoua aki ke fakatu ai a ia.
11 Kaeke foki kua tatakoto fakalataha tokoua e tagata, ti mafana ai a laua; ka e maeke fefe ke mafana a ia ne tokotaha?
12 Kaeke foki ke kautu e tagata kia ia ne tokotaha, to totoko atu kia ia tokoua; ko e toua kave tolu nakai momutu vave ia.
13 Kua mua he mitaki e fuata nofogati ka e iloilo, ke he patuiki motua ka e goagoa, kua nakai tuai fia ako mena.
14 Ko e mena hau a ia he fale puipui ke eke mo patuiki; ko e mena fanau ai a ia ke he hana kautu, ko e tagata nofogati a ia.
15 Ne kitia e au e tau tagata momoui oti kana, ko lautolu ne o fano i lalo he lā, ne fakalataha a lautolu mo e fuata ne ua aki; ko ia ne eke mo hukui hana.
16 Nakai maeke ke totou e motu o tagata oti, ko lautolu oti ne eke a ia mo takitaki ha lautolu; ka ko lautolu foki kua mumui mai kia lautolu nakai fiafia a lautolu kia ia. Ko e mena fakateaga foki haia, mo e kai e matagi.