Fakamatalaaga 5:1-20
5 KIA leveki e koe hāu a tau hui ka fina atu a koe ke he fale he Atua; kua mitaki ke fakatata atu a koe ke fanogonogo, ka e kelea ke fakatata atu a koe ke ta atu e poa he tau tagata goagoa; he nakai iloa e lautolu kua eke e lautolu e mena kelea.
2 Aua neke fakatepetepe hāu a gutu, aua neke alumaki foki hāu a loto ke vagahau atu ha kupu ki mua he Atua; ha ko e Atua ha ha he lagi a ia, ka e ha ha he lalolagi nai a koe; ko e mena ia kia gahoa ai hāu a tau kupu.
3 Ha ko e loga e tau mena kua eke kua tupu ai e miti; ko e loga foki e tau kupu kua iloa ai e leo he tagata goagoa.
4 Ka omonuo ai a koe e omonuo ke he Atua, aua neke fakamule ke ta atu e tau mena ne omonuo ai a koe; ha kua nakai fiafia a ia ke he tau tagata goagoa; kia eke e koe e mena ne omonuo ai a koe.
5 Kua mitaki ke nakai omonuo, ka e kelea ke omonuo mo e nakai eke e tau mena ne omonuo ai.
6 Aua neke hala a koe ke he hāu a gutu; aua foki neke pehe atu a koe ki mua he agelu, Ko e mena hehe haia. Ko e heigoa kia e mena ke ita mai ai e Atua ke he hāu a leo, mo e fakaoti ai e ia e gahua he hāu a tau lima?
7 Kua hohoko ai e tau mena ia ha ko e tau miti loga, mo e tau mena fakateaga loga, katoa mo e tau kupu loga; ka kia matakutaku a a koe ke he Atua.
8 Kaeke kua kitia e koe e favale ke he tagata nofogati, mo e fakafiliaga mo e fakatonuaga he tau mena kua uta kehe ke he fahi kautu, aua neke ofo a koe he mena na; ha kua kitekite ki ai taha ne mua ke he tagata lahi na; ha ha i ai foki kua mua ue atu kia laua.
9 Ko e tau mena kua tutupu ke he kelekele, ma e tau tagata oti ia; ko e patuiki foki kua moua e ia hana tau mena mai he fonua.
10 Ko ia kua manako ke he ario, to nakai makona ai a ia ke he ario; ko ia foki kua manako ke he tau koloa loga to nakai makona a ia ke he hana mena ne moua ai; ko e mena fakateaga foki ia.
11 Ka fakaloga ai e tau mena mitaki, kua fakatokologa foki a lautolu kua kai ai; ko e heigoa foki kua moua e ia hana e tau mena, ka kua kitekite ni a ia ki ai he hana tau mata?
12 Kua mitaki e mohe he tagata eke gahua, po ke gahoa, po ke loga hana tau mena kai; ka ko e maukoloa, nakai maeke kia ia ke mohe he makona.
13 Ha ha i ai e mena kelea ke mamahi ai kua kitia e au i lalo he lā, hanai ko e koloa lahi kua leveki ai ma lautolu ha lautolu e koloa ke mamahi ai a lautolu.
14 Ha kua fakaoti e koloa ia ke he gahua kelea; kua fanau foki e ia hana tama tane, ti nakai fakai ke fai mena a ia.
15 Tuga ne hau a ia he manava he hana matua fifine mo e nakai fai felevehi a ia; to liu atu foki a ia tuga he hau ai a ia; nakai uta foki e ia ha mena he hana tau gahua kua toto ai ke he hana lima he fano a ia.
16 Ko e mena kelea foki ke mamahi ai hanā, tuga he hau a ia, kua pihia ni he liu atu a ia; ko e heigoa foki e mena kua moua he tagata kua gahua ma e matagi?
17 Kua kai foki a ia mo e pouli ke he tau aho oti hana, mo e mamahi lahi a ia, mo e gagao, mo e ita.
18 Kitiala e mena kua kitia e au; ko e mena mitaki, mo e fulufuluola ke he tagata ke kai, mo e inu, mo e fiafia ke he mitaki mai he tau gahua oti hana ne eke ai e ia i lalo he lā, ke he tau aho oti he hana moui kua foaki mai he Atua kia ia; ha ko e mena kua eke māna haia.
19 Ko e takitaha foki e tagata kua foaki he Atua ki ai e tau mena loga mo e koloa lahi, mo e foaki e ia kia ia ke maeke ke kai ai e tau mena ia; kia eke foki e ia hana tufaaga, mo e olioli ai ke he hana tau gahua; ko e mena kua foaki mai he Atua haia.
20 Ti nakai manatu lahi a ia ke he tau aho he hana moui, ha kua foaki mai ai he Atua e olioli ke he hana loto.